Hop blong Yumi, Laet blong Yumi, Paoa blong Yumi

I Kam long Elda Ronald A. Rasband

Blong Kworom blong Olgeta Twelef Aposol

I kamaot long Wan Naet wetem Wan Jeneral Atoriti brodkas blong ol tija blong relijin we oli bin holem long namba 8 Febwari 2019.

Taem oli bin odenem mi olsem wan Aposol, dia Presiden Thomas S. Monson (1927–2018) i bin talem se bae mi wan spesel witnes blong nem ia blong Jisas Kraes long ful wol. Mi no bin tekem toktok o wok ia i nating. Mi stadi had long ol skripja, mi faenemaot huia Lod tru long ol nem blong Hem, mo tru long ol taetol blong Hem. Evri samting ia we bambae mi serem wetem yufala, oli kamaot long ol ves blong ol skripja we oli mekem yumi tingtingbak abaot hop blong yumi we i stap long Hem.

Hem i hop blong Isrel (Jeremaea 17:13), Mi Moning Sta Ya we I Stap Saen Gud (Revelesen 22:16), Gudfala Man blong Lukaot long Sipsip (Doktrin mo Ol Kavenan 50:44), Kaonsela (Aesea 9:6; 2 Nifae 19:6), Pikinini we I Stamba blong Pis ( Aesea 9:6; 2 Nifae 19:6), Man blong Sevem Man (Rom 11:26), Laet blong Ol Man blong Wol (Jon 8:12), mo Hae Pris blong ol gudfala samting we bambae i kam yet (Hibrus 9:11). Hem i gat Paoa blong sevem man (Alma 34:18; Doktrin mo Ol Kavenan 133:47) mo Hem i Wan ia we i gat evri paoa (Doktrin mo Ol Kavenan 61:1).

Paoa, mak mo help blong Kraes i kavremap evriwan. Hemia i stap ia taem yumi foldaon mo taem yumi stap traehad blong muv fored. Mo sapos yumi glis i go, “laet [blong Hem] i saen long tudak” (Doktrin mo Ol Kavenan 6:21) i saen we i saen i bitim bifo. Hem i lavem yumi long ol taem blong yumi we i saen gud, mo tu, long ol taem we oli tudak moa.

Blong stap olsem wan disaepol blong Jisas Kraes i no wan geswok. Rod blong Hem, Hem i makem gud long wokbaot blong leg blong Hem. Taem yumi stap folem Hem, yumi kam blong lavem wanem we Hem i lavem. Taem yumi stap riniu ol kavenan blong yumi wetem Hem evri wik taem yumi tekem mo kakae tabu sakramen, yumi groap long save blong yumi abaot Hem olsem Ridima blong wol (Doktrin mo Ol Kavenan 93:9), Spirit blong Trutok (Doktrin mo Ol Kavenan 93:9), mo olsem Toktok Ya (Doktrin mo Ol Kavenan 93:8).

Ol dia fren, hemia nao Sevya we mi mi save, we mi lavem mo stap presem wetem evri hat blong mi. Dip insaed long sol blong mi, mi testifae abaot Hem mo gud fasin mo sore blong Hem. Hem i bin promes: “Yufala i ol fren blong mi, mo yufala i gat raet blong kasem wan ples long kingdom wetem mi” (Doktrin mo Ol Kavenan 93:45).

Oltaem Jisas Kraes i ansa long ol problem mo ol jalenj we oli pat blong eksperiens ia long laef ia long wol. Taem yumi andastanem misin blong Hem mo gospel blong Hem, lav blong yumi long Hem, mo bilif blong yumi long Hem mo fasin blong yumi blong stap dipen long Hem i givim paoa long yumi.