Ol Eksampol blong Fet
Sakiusa mo Salote Maiwiriwiri
Suva, Fiji
Mi no save bilivim pis mo hapines we mi bin faenem insaed long hom blong ol Maiwiriwiri. I nomata we tufala i gat tu pikinini we oli ded finis, oli stap laef wetem glad mo stamba tingting evri dei.
Les Nilsson, Hem we i tekem foto
Salote:
Tu yia i pas, afta we boe blong mitufala, Esa i bin ded from hem i kasem kansa long lang blong hem, gel blong mitufala, Esalynn i bin ded from wan sik long hed blong hem. Insaed long tempol, mi bin filim strong blong toktok wetem wan senia sista misinari we i bin stap ia, we hem tu i bin lusum tufala pikinini sam yia bifo i kam. Hem i talem long mi: “Sapos yu mekem hom blong yu i wan tabu ples, yu save filim se ol pikinini blong yu oli stap ia.”
Hemia i kam olsem gol blong mitufala. Evri samting we yumi stap mekem, i blong mekem hom blong yumi i kam wan tabu ples. Yumi wantem blong filim se yumi stap kolosap long hem.
Yumi no save olsem wanem blong stap olsem wan papa mo mama blong ol pikinini blong yumi we oli go narasaed long vel. Be sapos yumi stap mekem bes blong yumi blong stap laef long wan stret mo gud laef, mifala i biliv se bambae oli filim ol hadwok blong yumi. Long ol famli divosen blong mifala, mifala i welkamem Esa mo Esalynn mo talem nem blong tufala.
Insaed long hom blong mifala, iven taem mifala i no stap agri, mifala i traem blong stretem kwiktaem. Mifala i wantem hom blong mifala i stap wan tabu ples, long bes wei we i posibol. Taem mifala i bin mekem olsem, mifala i bin filim hop, mo hiling mo lav.
Sakiusa:
Eksperiens ia blong lusum Esa mo Esalynn, long en, i mekem famli blong mifala i kolosap tugeta moa. Mifala i stap kaonsel tugeta wetem ol nara pikinini. Mifala i stap go long tempol olsem wan famli. Mifala i stap laef long wan simpol wei, mo jusum blong talem tangkyu, evri dei. Taem mifala i stap tokbaot mining blong sil olsem wan famli insaed long tempol, siling ia i kam laef insaed long mifala. Mo tru long evri samting ia, mifala i stap filim we ol pikinini blong mitufala i stap ia.
Wan long ol fas samting we mifala i mekem blong mekem se hom blong mifala i kam tabu moa, i blong stat blong ridim Buk blong Momon evri dei. Long fas taem, mitufala i bin serem ol stori long Buk blong Momon wetem ol pikja, blong ol yangfala pikinini blong mifala. Afta, mifala i ademap ol vidio. Naoia, mifala i stap rid moa long Buk blong Momon. Mi save testifae abaot paoa blong Buk blong Momon.
Mi save testifae tu abaot paoa long plan ia blong fasin blong sevem man. Taem we mifala i mekem plan blong ol fenerol blong Esa mo Esalynn, mifala i bin disaed se bae i no gat ol bigfala fenerol, we i wan kastom long kalja blong Fiji. Be, waef blong mi mo mi, mitufala nomo i toktok, mo mitufala i tokbaot plan blong fasin blong sevem man. Plante long ol memba blong ol nara famli blong mitufala oli bin joenem Jos afta we oli bin harem ol trutok ia long ol fenerol seves ia.
Sakiusa i tijim famli blong hem se i no gat fasin blong go arier long laef, be blong go fored nomo. “Evri dei, yumi kam moa gud moa,” hem i talem. Oli stap laef long wan simpol wei, mo lukluk nomo blong talem tangkyu.
Salote i faenem bigfala glad blong spendem taem wetem ol pikinini blong hem mo blong stap tijim gospel long olgeta.
Maiwiriwiri famli i gat wan strong testemoni blong fasin blong sil insaed long tempol. Oli kipim ol trutok ia i kolosap long hat blong tufala taem we oli stap tingbaot Esa mo Esalynn.
Taem we oli stap lukluk nomo blong laef long simpol laef, mo stap muv i go fored, Maiwiriwiri famli i talem tangkyu from ol blesing blong olgeta evri dei. “Mifala i talem tangkyu from ol samting we mifala i gat,” Sakiusa i talem.