Ol Mitinghaos—Ol Ples blong Stap Revren mo Stap Wosip
I Kam long Bisop Dean M. Davies
Fas Kaonsela long Prisaeding Bisoprik
Spirit blong Lod i stap insaed long ol mitinghaos blong yumi mo bae i givim insperesen long yumi taem yumi stap mekem samting wetem respek long fored blong Hem.
Wan gudfala fren blong mi, long wan taem i bin serem wetem mi wan eksperiens we hem i bin gat taem hem i bin gat wok blong stap putumbak ol jea mo klinim gud stek senta afta long wan stek konfrens. Afta 30 minit we hem i stap mekem ol diuti ia, hem i luksave se hem nao i las man we i stap long bilding. Hem i no gat fasin ia blong filim se hem i stap hemwan mo i hariap blong go, be, hem i bin luk se semfala swit filing blong pis ia we hem i bin filim long taem blong konfrens, i bin stap wetem hem, mo i stap kam moa bigwan.
Taem hem i finisim wok we oli bin givim long hem, mo i glad blong save aot long mitinghaos, hem i faenem wan nara memba we i stap lukluk gud hem wetem tingting. Taem hem i luksave wanem ia we fren blong mi i bin stap mekem, memba ia i tekem han blong hem, mo talem: “Brata, Lod i luk ol smol samting ia we yu stap mekem blong Hem, mo Hem i lukluk i kam daon mo i smael from ol samting ia.”
Sam yia afta, taem hem i bin stap olsem wan bisop, semfala fren ia i faenem se hem i stap hemwan bakegen insaed long mitinghaos blong wod blong hem. Afta we hem i ofem ol laet blong japel, hem i stap smol moa taem we laet blong mun i saen tru long ol windo i go long pulpit.
Filing blong pis ia we hem i save gud long hem, i kavremap hem bakegen, mo hem i sidaon kolosap long fored blong japel, mo i tingtingbak long ol plante tabu taem we hem i bin gat long ples ia—ol plante taem we hem i bin stap luk ol pris oli brekem bred long sakramen tebol, ol taem we hem i bin filim Tabu Spirit i stap wetem hem taem hem i stap givim wan toktok long wod konfrens, ol seves blong baptaes we hem i bin lidim, naes kwaea we hem i bin harem, mo plante long ol testemoni we i kam long ol memba blong wod we i bin tajem hem bigwan. Hem i sidaon hemwan insaed long japel ia we i tudak, nao hem i filim long hem olsem wanem evri eksperiens i jenisim laef blong hem, mo laef blong ol memba blong wod blong hem, nao hem i benem hed blong hem, wetem wan bigfala tangkyu.
Fren blong mi, i bin tijim long raet wei mo wetem waes, se plante long ol tabu ples long wol ia, oli tempol mo hom, be tru long tufala eksperiens we mi tokbaot antap ia, hem i bin kam tu blong andastanem se ol mitinghaos blong yumi, oli tabu. From se prishud atoriti i dediketem olgeta, ol bilding ia oli kam ol ples we Lod i stap kapsaetem ol revelesen long ol pipol blong Hem, mo insaed long ol bilding ia, “paoa we i olsem hemia blong God, i kamaot” tru long ol odinens we i stap tekem ples insaed ia (luk long Doktrin mo Ol Kavenan 84:20).
Mitinghaos i joen wetem hom blong mekem se promes blong Lod i hapen, we i blong ol fetful Sent oli save gat glad ia long Sabat dei. Hem i kam wan ples we ol memba oli kam tugeta blong wosip; hemia i mekem hat blong olgeta “oli joen tugeta blong kam wan long lav, lav we wan i gat long narawan” (Mosaea 18:21) mo long Sevya. Long yumi, blong givim stret tangkyu mo respek from ol bigfala blesing long saed blong spirit we oli kam long yumi tru long ol mitinghaos blong yumi, yumi mas go insaed long ol ples blong wosip ia wetem wan fasin we i gat dip mo tru fasin blong stap revren o respek.
Mining blong Stap Revren o Gat Respek
Long kalja blong yumi tedei, toktok ia, revren i gat semmak mining wetem toktok ia, kwaet. I nomata se fasin blong toktok slo insaed long ol japel blong yumi, i wan stret fasin, hemia i stap blokem lukluk blong yumi long fasin blong stap revren, mekem se yumi no kasem ful mining blong toktok ia. Revren oli save folemap i go kasem toktok long Latin we i revereri, we i minim, “Blong stanap wetem sapraes long.”1 ?Bae yumi save faenem wan toktok we i talemaot gud moa ol filing blong sol blong yumi taem we yumi rili lukluk longtaem long wanem we Sevya i bin mekem blong wanwan long yumi?
Spirit i mekem mi mi tingbaot ol toktok blong naes hym we yumi stap singsing taem yumi stap long ol japel blong yumi: “Mi sapraes tumas we Jisas Hem i lavem mi.”2 Dip fasin blong talem tangkyu ia, mo sapraes, hem i stamba blong fasin blong stap revren, mo i pusum mo talem stret long yumi se yumi mas lego eni kaen lanwis o fasin we bae i prapa spolem ol filing ia insaed long yumi o ol narawan.
Foto blong woman long pulpit i kam long Tiffany Myloan Tong
Ol Mitinghaos mo Sabat dei
Aot long revelesen blong tedei, yumi save se wan stamba pat blong Sabat wosip blong yumi, hem i blong “go long haos blong prea mo mekem ol tabu seremoni long tabu dei blong [Lod]” (Doktrin mo Ol Kavenan 59:9). “Haos blong prea” we yumi stap kam tugeta long hem long Sabat i tabu mitinghaos blong yumi.
Presiden Russel M. Nelson i bin helpem yumi blong andastanem moa wanem i joen bitwin respek blong yumi long Sevya mo ol filing blong yumi long Sabat dei. Taem hem i serem eksperiens blong hem blong kam blong givim ona long Sabat, Presiden Nelson i talem: “Mi lanem aot long ol skripja se wei we mi mekem mi mo fasin blong mi long Sabat i stap olsem wan saen bitwin mi mo Papa blong yumi long Heven.”3
Semmak olsem wei we yumi stap mekem samting mo fasin blong yumi long Sabat oli wan saen blong strong tingting mo hat blong yumi i go long Lod, wei we yumi stap mekem samting, fasin blong yumi, mo iven wei we yumi dresap taem yumi stap long haos blong prea, oli save talemaot hamas respek nao yumi stap filim i go long Sevya.
Ol Mitinghaos mo Ol Odinens
Elda Jeffrey R. Holland blong Kworom blong Olgeta Twelef Aposol i helpem yumi bigwan blong andastanem tingting ia, mo i talem:
“Antap long fasin blong mekem taem blong tijim gospel long hom olsem senta, Sandei seves blong yumi we i jenis, … i lukluk moa long sakramen blong Lod Sapa, olsem tabu klia stamba poen we yumi akseptem, blong wosip eksperiens blong yumi long wik. Yumi mas tingbaot tu, yumiwan stret, se Kraes i bin ded from hat we i fulap long sore, mo Hemwan i tekem ol sin mo ol harem nogud blong ful famli blong ol man.
“Folem hamas yumi stap kontribiut long hevi trabol ia we Hem i stap tekem, yumi mas putum taem blong givim respek blong yumi.”4
Hem i impoten blong tingbaot se ples we Lod i jusum from bigfala tabu taem ia blong givim respek i go long Sevya, hem i mitinghaos o japel. Antap long respek ia we yumi stap filim long taem blong wik odinens blong sakramen, ol filing blong stap revren mo respek oli kam moa bigwan taem yumi tingting long ol nara prishud odinens mo blesing we oli stap mekem mo givim insaed long mitinghaos, olsem blong givim nem mo blesem ol pikinini, baptaes mo konfemesen, prishud odinesen mo setem apat pipol blong kasem koling. Wanwan long ol odinens mo blesing ia oli save karem i kam bigfala paoa blong Tabu Spirit, sapos olgeta we oli tekpat mo olgeta we oli kam, oli kam wetem wan fasin blong gat revren.
Foto i kam long James Iliff Jeffery
Ol Mitinghaos mo Wosip
Sabat dei i givim yumi janis blong wosipim Lod long taem blong hom stadi blong yumi, mo long taem blong ol sakramen mo nara miting olsem wan kongregesen. Stat long ol fas dei blong Jos, Ol Sent oli bin stap glad blong kam tugeta blong mit tugeta mo mekem ol rilesensip olsem ol brata mo sista i kam strong. Ol mitinghaos blong yumi, plan blong olgeta i gat ol spes blong gat ol aktiviti long taem blong wik. Yumi neva mas lus tingting long stamba tingting blong olgeta bilding ia we i blong givim wan ples blong stap wosip.
Wosip mo fasin blong stap revren, tufala i kolkolosap. “Taem yumi wosip long God, yumi kam long Hem wetem wan kwaet lav, tingting we i stap daon, mo respek. Yumi luksave mo akseptem Hem olsem bigfala King blong yumi, Krieta blong wol, Papa we yumi lavem mo lav blong hem i nogat en.”5
Stamba ples ia blong wosip, i mas stap blong lidim tingting blong yumi long fasin we yumi stap mekem samting long ol mitinghaos, iven taem yumi stap gat ol sosol o pleiplei aktiviti. Yumi mas lukaot bigwan blong no mekem samting i go olbaot tumas, no mas mekem doti, o no mas damejem eni pat blong bilding ia taem yumi gat ol Jos aktiviti; mo yumi mas kwik blong klinim o riperem bilding sapos yumi bin spolem.
Oli save tijim long ol pikinini mo ol yut se fasin blong stap revren o gat respek, mo kea long mitinghaos, i no stap hapen nomo long ol Sandei miting. Ol memba oli mas tekpat blong klinim mitinghaos—speseli ol papa mo mama wetem ol pikinini blong olgeta—from hemia i wan gudfala wei blong developem wan fasin blong gat respek long ol tabu bilding blong yumi. Olsem we i bin kamaot klia long eksperiens blong fren blong mi blong stap putum gud evri samting afta long stek konfrens, stret aksen ia blong stap kea long mitinghaos i wan wei blong wosip, mo i stap invaetem Spirit blong Lod.
Foto blong ol memba oli stap stanap aotsaed i kam long Massimo Criscione
Ol Mitinghaos mo Sevya
Anda long daereksen blong Presiden Nelson, olsem profet, i bin gat ol bigfala efot we oli bin mekem blong meksua se oli neva tekemaot nem blong Jisas Kraes taem yumi stap tokbaot Jos blong Hem. Long wan semmak wei, yumi no mas letem Sevya i kamaot long stamba blong wosip blong yumi—mo i tekem tu, ol ples blong yumi blong wosip.
Yumi stap oltaem tokbaot se tempol i haos blong Lod, we i stret mo i wan impoten nem. Be yumi save fogetem isi se wanwan long ol mitinghaos blong yumi, wan prishud atoriti i bin dediketem olsem wan ples we Spirit blong Lod bae i stastap long hem, mo wan ples we ol pikinini blong God —tugeta insaed mo aotsaed long Jos—bae oli save kam long hem blong “save Ridima blong olgeta” (Mosaea 18:30).
Wok we oli jes anaonsem blong flasem ol mitinghaos blong yumi wetem ol artwok we i soem Sevya mo ol tabu taem blong laef blong Hem long wol ia mo afta long laef blong Hem long wol ia, long wan fasin we i gat respek, i blong pulum ae, maen, mo hat blong yumi i go kolosap moa long Hem. Taem yufala i stap go insaed long ol haos ia blong prea blong gat ol miting mo ol aktiviti, mifala i invaetem yufala, wetem lav, blong stop smol, blong lukluk raon, mo lukluk gud ol tabu peinting ia, blong lukluk olgeta wetem ol pikinini blong yufala, mo blong letem olgeta oli gat moa filing blong wosip mo revren mo respek i go long God.
Profet blong OlTesteman, Habakuk, i talem: “Be Hae God, hem i stap long tabu haos blong hem long heven. Mo olgeta man long wol oli mas stap kwaet long fes blong hem” (Habakuk 2:20). Bae yumi tu, yumi tingbaot se Spirit blong Lod i stap insaed long ol mitinghaos blong yumi, mo bae i protektem wanwan hat blong yumi i kasem mak ia we bae yumi gat fasin mo mekem samting wetem respek mo kwaet fasin long fored blong Hem.