Sapos Yu Yu Wan Viktim blong Abius

?Wanem Hem i Abius?

Abius i taem wan i no wantem save blong mekem gud long ol narawan, o taem wan i no tritim gud ol narawan (olsem wan pikinini, wan olfala, wan we i gat disabiliti, o eniwan); taem wan i tritim narawan long wan wei we i givim kil o soa long saed blong bodi, filing o seks. Hemia i go agensem ol tijing blong Sevya.

“Ples we Jos i stanap long hem, i we, abius, oli no save akseptem eni kaen wei blong hem” (General Handbook: Serving in The Church of Jesus Christ of Latter-day Saints [2020], 38.6.2). Abius i go agensem ol loa blong God, mo tu, i save agensem ol loa blong sosaeti.

Ol Defren Kaen blong Abius

Ol Abius long Saed blong Bodi Ol fasin o aksen we oli strong mo oli vaelen we wan i givim wetem ful save i go long wan narawan, mo long en, i gat kil o soa long bodi.

Abius long Saed blong Seks Ol aktiviti o kontak long saed blong seks, we wan i mekem mo i yusum fos, o strong toktok, o i profite long ol viktim we oli no save toktok o oli no save talem se oli no agri. Evri aksen long saed blong seks, bitwin wan adalt mo wan pikinini, i wan abius, i nomata se pikinini i talem yes.

Abius long Saed blong Toktok o Filing: Wan paten blong fasin we wan i minim mo i stap ripitim ol atak blong hem long wan long ol wei we i no tajem bodi, olsem i givim ol strong toktok, i mekem wan i fraet, o i tantanem toktok o man, o i daonem man blong mekem hem i sem. Hemia i mekem se wan i nomo tingting gud abaot hemwan, mo i nomo gat respek long hemwan. I nomata we abius ia i no long saed blong bodi, be kaen abius ia i save prapa spolem gudlaef blong wan long saed blong tingting mo filing blong hem.

Olsem Wanem blong Kasem Help

Lod i askem tu blong yumi mekem evri samting blong stopem abius mo blong protektem mo helpem olgeta we oli bin ol viktim blong abius. I no gat wan we oli putum se bae hem i stap gohed nomo blong stap tekem ol fasin blong abius. Sapos hemia i stap hapen naoia o i bin stap hapen longtaem finis i kam, yu save faenem ol risos blong stap helpem yu long abuse.ChurchofJesusChrist.org.