Sa Maliwai Keda na Kalou
Sa tiko maliwai keda na Kalou—ka vakaitavi sara ga o Koya ena noda bula ka sa tuberi ira tiko na Luvena.
Ena veitabagauna, sa dau vosa tiko na Kalou mai vei ira na Nona italai, na profita.1 Ena mataka nikua sa ka dokai ni da rogoca na parofita ni Kalou ni vosa tiko ki vuravura taucoko. Keimami lomani iko, Peresitedi Nelson, ka’u sa vakayaloqaqataki ira na tamata kecega e veivanua kecega me ra vulica ka rogoca na nomuni vosa.
Niu se bera ni yacova na yabaki 12, sa vakasaurarataki oti vakarua na noqu matavuvale me keitou dro tani mai vale ka laki tekivu vou tale ena maliwa ni bula leqaleqa, nuiqawaqawa, kei na veilecayaki e kauta mai na veivaluvaluti, kei na tatawasewase vakapolitiki. Sa dua na gauna ni nanamaki vei au, ia a gauna vakadomobula beka vei rau na noqu itubutubu.
Erau sega soti ni dau wasea vei keitou na icolacola oqo na lewe va na gone na tinaqu kei tamaqu. Erau a colata na oca kei na veivakararawataki ena kena vinaka duadua erau rawa ni rawata. A bibi sara beka na nuiqawaqawa, e kania vakalevu na nodrau gauna ka vakabatabatataka na nodrau vakanuinui.
Na gauna dragali oqo ni oti na iKarua ni iValu Levu a laiva tu na kena imawe e vuravura. A laiva tu na kena imawe vei au.
Ena gauna ni noqu galili levu duadua, au dau vakataroga, “Se vo tu beka e dua na inuinui ena vuravura oqo?”
Era Maliwai Keda na Agilosi
Niu vakasamataka vakatitobu na taro oqo, au vakasamataki ira na noda daukaulotu ni Amerika gone ka ra a veiqaravi vei keimami ena veiyabaki oya. Era biuta tu yani na veitaqomaki ni nodra veivale ena yasa kadua ni vuravura ka lako mai ki Jamani—na vanua era se qai veimecaki wale toka ga—me ra mai solia na inuinui vakalou vei ira na neimami. Era sega ni lako mai me ra mai veibeitaki, veivosataki, se veivakamadualaki. Era tuvakarau me ra solia na nodra bula gone ka ra sega ni via nanuma e dua na ka vakavuravura me ra rawata, era vinakata ga me ra vukei ira na tani me ra kunea na reki kei na vakacegu era sa vakila tu.
Vei au, era a uasivi sara na cauravou kei na goneyalewa oqo. Au vakabauta ni a tu na nodra malumalumu, ia e sega ni vakakina vei au. Au na dau vakasamataki ira tu ga ni ra levu cake mai na bula—na agilosi ni rarama kei na lagilagi, italatala ni yalololoma, yalovinaka, kei na dina.
Ni lutudromu tu ko vuravura ena tawa veivakabauti, na yaloca, na veicacati, kei na nuiqawaqawa, a vakasinaiti au ena inuinui na nodra ivakaraitaki kei na ivakavuvuli na itabagone oqo. Na itukutuku ni kosipeli era wasea e uabaleta na politiki, na itukutuku makawa, na veicati, kei na nanuma vaka tamata. E solia na isaunitaro vakalou ki na veitaro bibi a tu vei keimami ena veigauna dredre oqo.
Na itukutuku sai koya ni bula tiko na Kalou ka kauwaitaki keda tiko, ena gauna sara mada ga ni veilecayaki, na lomalomarua, kei na bula leqaleqa. Ni a rairai dina mai ena noda gauna me vakalesuya mai na dina kei na rarama—Nona kosipeli kei na Nona Lotu. Ni sa vosa tale tiko o Koya vei ira na parofita; ni sa tiko maliwai keda na Kalou—ka vakaitavi sara ga o Koya ena noda bula ka sa tuberi ira tiko na Luvena.
E veivakadrukai na veika eda rawa ni vulica ni da raica yani vakavoleka na nona ituvatuva ni veivakabulai na Tamada Vakalomalagi kei na bula vakalou, na ituvatuva ni marau, baleti ira na Luvena. Ni da nanuma ni da sa sega soti ni kauwaitaki, biliraki, ka guilecavi, eda sa vulica ni rawa ni da vakadeitaki ni sega ni sa gulicavi keda na Kalou—ia, ni sa solia tu vei ira na Luvena kece sara e dua na ka e sega ni vakasamataki rawa: ni da rawa ni yaco me “taukena na veika ni Kalou, ka itaukei vata kei Karisito.”2
Na cava na kena ibalebale oqo?
Ni da na bula tawamudu, ka rawata na taucoko ni marau,3ka da rawa ni rawata na “itikotiko vakaturaga, na veimatanitu, na veivanua vakatui, kei na kaukauwa.”4
E vakaciriloloma toka me da qai kila ni rawa ni yaco na vunilagi vakasakiti ka lagilagi vaqo—sega ni baleta o cei o keda ia e baleta o cei na Kalou.
Ni da sa kila na veika oqo, me da na qai lolosi, vosakudrukudru, se yalorarawa rawa vakacava ena dua na gauna? Me da qai vakacuva ulu rawa tu vakacava ni sa sureti keda na Tui ni tui me da dro yani ki na dua na vunilagi sega raitayaloyalotaki rawa ni marau vakalou?5
Na Veivakabulai ena Keda Maliwa
Ena vuku ni nona loloma sa uasivi sara na Kalou kei na nona solibula tawamudu ko Jisu Karisito, na noda ivalavala ca—na ka lelevu kei na ka lalai—e rawa ni bokoci laivi ka sega ni nanumi tale.6 E rawa ni da tu e Matana ena savasava, kilikili, ka vakatabui.
E vuabale na yaloqu ena vakavinavinaka vua na Tamaqu Vakalomalagi. Au sa qai kila ni a sega ni laivi keda tu na Luvena o Koya me da mai lakova na bula oqo ka sega kina na inuinui ki na dua na vunilagi rarama ka tawamudu. Sa vakarautaka o Koya na idusidusi ka vakatakila na sala lesu ki Vua. Ka kena itakele taucoko sara na Luvena Lomani, ko Jisu Karisito7 kei na veika sa mai vakayacora o Koya ena vukuda.
Na nona iSoro tawayalani na iVakabula e veisautaka vakadua na ivakarau eda dau raica tu kina na noda ivalavala ca kei na noda malumalumu. Me da kakua ni vesuki tu kina ka nanuma ni da na sega ni sereki rawa mai kina, e rawa ni da vuli mai kina ka vakanuinui.8 Na isolisoli veivakasavasavataki ni veivutuni sa rawa kina vei keda me da vakanadakuya na noda ivalavala ca ka yaco me dua na tamata vou.9
Ena vukui Jisu Karisito, me kakua ni keda ivakatakilakila na noda malumalumu. Era na vakasavasavataki keda!
Me vaka e dua na dauqiriqiri e vakatovotovotaka tiko e dua na vakatasuasua, e rawa ni da raica noda butu cala, na cala, kei na ivalavala ca me madigi ni noda dau liaci keda vakalevu cake, loloma e titobu ka dina vakalevu cake vei ira na tani, kei na veivakasavasavataki ena veivutuni.
Kevaka eda veivutuni, eda na sega ni vakadonui ena cala. Era tiki ni noda toso.
Eda se gonedramidrami kece ni vakatauvatani ki na tamata vakalagilagi ka vakaturaga eda a buli mai me da vaka. E sega ni dua na tamata sa bau toso mai na qasi ki na lako ki na cici me sega ni tacaqe, coqa, ka drakusi. Oqori eda na vuli kina.
Kevaka eda vakatovotovo tikoga vagumatua, tovolea tikoga mo maroroya na ivunau ni Kalou, ka vagoleya na noda igu ena veivutuni, vosota vakadede, ka vakayagataka tiko na veika eda vulica, laini ena laini, eda na sokumuna na rarama ki yaloda.10 E dina beka ni da na sega ni kila taucoko sara na veika eda rawa ni rawata ena gauna oqo, “Oqo ga eda sa kila, ni na rairai mai [na iVakabula],” eda na vakataki Koya, ka “da na raica na matana dina.”11
Sa dua na yalayala lagilagi!
Io, sa levu na tiko yavavala e vuravura. Io, e tu na noda malumalumu. Ia me da kakua ni vakacuva ulu ena yalodruka, baleta ni rawa ni da vakararavi vua na Kalou, e rawa ni da vakararavi vua na Luvena, ko Jisu Karisito, ka rawa ni da ciqoma na isolisoli ni Yalo me tuberi keda ena salatu oqo ki na dua na bula ka sinai tu ena reki kei na marau vakalou.12
E Maliwai Keda ko Jisu
Au dau vakataroga vakalevu, na cava beka ena vakavuvulitaka ka kitaka ko Jisu kevaka e tiko maliwai keimami voli nikua?
Ni sa oti na Tucake tale, a vakayacora o Jisu Karisito na Nona yalayala me sikovi ira na Nona “sipi tale eso.”13
E tukuna na iVola i Momani: E Dua Tale na iVakadinadina kei Jisu Karisito e dua na rairai vakaoqo vei ira na tamata mai Amerika. E tu vei keda na ivola vakamareqeti oqo me dua na ivakadinadina eda rawa ni taura e ligada ni nona cakacaka na iVakabula.
O ira na tamata ena iVola i Momani era vakaitikotiko ena yasa ni vuravura kadua—na nodra itukutuku makawa, itovo vakavanua, kei na draki vakapolitiki e duidui sara vakalevu mai vei ira na tamata a vakavulica o Jisu ena Nona gauna ni bula vakatamata. Ia a vakavulica vei ira e vuqa na veika vata ga a vakavulica mai na Vanua Tabu.
Na cava e cakava kina o Koya na ka o ya?
E dau vakavuvulitaka na iVakabula na veidina sega ni yalani na kena gauna. E baleti ira na tamata ena veitabayabaki kei na ituvaki ni bula kecega.
E itukutuku ni vakanuinui na Nona, ena gauna oya ka vaka tiko kina nikua—e dua na ivakadinadina ni se sega ni laivi ira na Luvena na Kalou na Tamada Vakalomalagi.
E Maliwai Keda na Kalou!
Ena ruanadrau na yabaki sa oti, sa lesu tale mai kina ki vuravura na iVakabula. Erau a rairai vata mai kei na Kalou na Tamana vei Josefa Simici yabaki 14 ka vakacuruma mai kina na Vakalesui mai ni kosipeli kei na Lotu i Jisu Karisito. Mai na siga oya ka lako yani, sa tadola na lomalagi, ka ra siro sobu mai na agilosi mai na veivanua lagilagi tawacava rawa. Sa tasova mai na rarama kei na kilaka mai na itikotiko vakaturaga ni selesitieli.
A vosa tale na Turaga ko Jisu Karisito ki vuravura.
“Na cava e a kaya o Koya?”
Me da kalougata kina, e vuqa na Nona vosa era sa volai tu ena Vunau kei na Veiyalayalati—ka sa vakarautaki tu ki na tamata kecega e vuravura e vinakata me wilika ka vulica. Na veimalanivosa oqo e sega ni volia rawa vei keda nikua na ilavo!
Ka sega ni dodonu me da kidacalataka ni vakavuvulitaka tiko na iVakabula na uto ni itukutuku ni Nona kospeli: “Mo lomana na Turaga na nomu Kalou ena lomamu taucoko, kei na yalomu taucoko, kei na nomu kaukauwa taucoko; io mo qaravi Koya ena yaca i Jisu Karisito.”14 E vakauqeti keda o Koya me da vakasaqara na Kalou15 ka bula ena ivakavuvuli sa vakatakila mai ko Koya vei ira na Nona italai, o ira na parofita.16
E vakavulici keda o Koya me da veilomani17 ka “vakasinaiti na lomamuni ena loloma uasivi vei ira na tamata kecega.”18
E surei keda o Koya me da ligana, me da lako voli ka dau caka vinaka.19 “Me da kakua ni loloma ena vosa ga, se ena yameda; ena cakacaka ga kei na lomadina.”20
Sa bolei keda o Koya, meda vakamuria na Nona lewa, me da loloma, veiwasei, me da sureta na tamata kecega ki na Nona kosipeli kei na Nona Lotu.21
Sa vakaroti keda o Koya me da tara na veivaletabu ka curu kina ka veiqaravi kina.22
E vakatavulici keda, me yaco me Nona tisaipeli—me kakua ni guta na yaloda na irogorogo, na iyau, na qoroi, se na itutu. E vakavulici keda o Koya me da “kakua ni domona na iyau vakavuravura, ia mo vakasaqara na iyau e uasivi sara.”23
E vakauqeti keda o Koya me da vakasaqara na reki, veivakararamataki, na vakacegu, marau,24 kei na yalayala ni tawamate rawa kei na bula tawamudu.25
Me da tosoya kiliu ena dua na ikalawa na ka oqo. Taura mada kevaka e lako mai nikua ko Jisu ki na nomu tabanalevu, ki na nomu tabana, se ki na nomu itikotiko. Ena vakaivei beka?
Ena raica sara ko Koya na utomu. Sa na yali na bibi ni irairai e taudaku. Ena kilai iko o Koya ena kemu ituvaki dina. Ena kila o Koya na gagadre ni yalomu.
Na yalmalua kei na yalomalumalumu ena laveta ko Koya.
Na tauvimate ena vakabula ko Koya.
Na lomalomarua ena vakabulabulataka ko Koya ena vakabauta kei na yaloqaqa me vakadinata.
Ena vakavulici keda ko Koya me da dolava na yaloda vua na Kalou ka dolele yani vei ira na tani.
Ena kidava ka rokova ko Koya na dina, yalomalua, bula dokai, yalodina, yalololoma, kei na loloma cecere.
Eda na raica ga na yaloka ni matana ka da na sega tale ni qai vakataki keda e liu. Eda sa na veisau vakadua. Veisautaki ni da sa qai kila vakamatata, ni dina sara, sa tiko maliwai keda na Kalou.
Na Cava Meda Cakava?26
Au railesu ena yalovinaka vua na cauravou oya, o au, ena veiyabaki ni noqu tubu cake Kevaka e rawa niu lesu tale ki na gauna oya, au na vakayaloqaqataki koya ka tukuna vua me vakasaqaqara tikoga. Kau na kerei koya me sureti Jisu Karisito ki na nona bula, ni sa maliwai keda na Kalou!
Vei kemuni na taciqu kei na ganequ lomani, vakakina vei kemuni kece o ni vaqara isaunitaro, na dina kei na marau, au solia talega vei kemuni na ivakasala vata oya: vakasaqaqara tikoga ena vakabauta kei na vosota vakadede.27
Kerekere, ka na soli. Tukituki, ka na dolavi vei kemudou.28 Vakabauta na Turaga.29
Ena noda bula e veisiga sa noda cakacaka bibi duadua ka noda madigi veivakalougatataki me da sota vata kei na Kalou.
Ni da biuta vakatikitiki na dokadoka ka lakova na Nona itikotiko ena yalo raramusumusu ka bibivoro,30 ena toro voleka mai vei keda ko Koya.31
Ni da segata me da muri Jisu Karisito ka lakova na salatu ni bula vakatisaipeli, laini ena laini, ena yaco mai na siga eda na rawata kina na isolisoli sega ni raitayaloyalotaki rawa oya ni noda ciqoma na reki e taucoko.
Kemuni na noqu itokani lomani, na Tamada Vakalomalagi e lomani kemuni ena loloma e uasivi sara. Sa vakadinadinataka oti o koya na Nona loloma ena veisala tawamudu rawa, ia na kena ilutua na Nona solia na Luvena e Duabau Ga me isoro ka iloloma vei ira na Luvena me ra kitaka me ka dina na lesu tale vei rau na itubutubu vakalomalagi.
Au vakadinadinataka ni bula tiko na Tamada Vakalomalagi, ni liutaka tiko Nona Lotu o Jisu Karisito, ka Nona parofita o Peresitedi Russell M. Nelson.
Au vakauta yani vei kemuni na noqu iloloma kei na veivakalougatataki ena gauna rekitaki oqo ni Siganimate. Dolava na yalomuni vua na noda iVakabula ka Dauveivueti, se cava ga na ituvaki o tu kina, vakatovolei, rarawa, se caka cala, e rawa ni o kila ni bula tiko o Koya, ni lomani iko, ia ena Vukuna, ena sega sara ni rawa ni o tu duadua.
Sa Maliwai keda na Kalou
Au sa vakadinadinataka ena yaca i Jisu Karisito, emeni.