Noda Rarawa Ena Vuki me Reki
Au sureti ira kece era vakila na rarawa, o ira kece era vakataroga na cava e yaco ni da sa mate, mera biuta nodra vakabauta vei Karisito.
Ena vica na yabaki sa oti, ni’u a tiko ena soqoni eso e Salt Lake City, au a kidavaki mai vua na noda parofita lomani, o Russell M. Nelson. Ena nona ivakarau veikauwaitaki kilai tani vakai koya ga, a taroga mai, “Marika, sa vakaevei tiko beka o nomu na?”
Au a tukuna vua ni’u a tiko sara ga kei koya ena itekivu ni macawa oya ena nona itikotiko e Niu Siladi ka sa qase sara tiko mai o koya ia a sinai tu ena vakabauta ka dua na dauveivakauqeti kivei ira kece era kilai koya.
A qai kaya o koya, “Yalovinaka qai solia vua noqu iloloma … ka tukuna vua ni’u nanamaki me’u na raici koya tale.”
Au a via kurabui ka taroga yani, “E dua beka nomu ilakolako lokuci wale tikoga oqo ki Niu Siladi?”
Ena yalo dina ni vakasama bibi a sauma o koya, “E sega, au na raici koya ena bula tarava.”
E a sega ni dua na ka e mamada ena nona isaunitaro. E a dua na ivakaraitaki matau ni ka dina. Ena gauna mareqeti, maroroi oya, au a rogoca ka vakila kina na ivakadinadina titobu mai vua e dua na parofita e bula tiko ni bula e tomani tikoga ni oti na mate.
Ena koniferedi ni mua ni macawa oqo o ni na rogoci ira kina na iapositolo kei na parofita ni ra vakadinadinataka na Tucaketale i Jisu Karisito. “Na yavu ni ivakavuvuli ni noda Lotu o ya na nodra ivakadinadina na iApositolo kei na Parofita me baleti Jisu Karisito, ni a mate, bulu, ka tucaketale ena ikatolu ni siga, … kei na veika kece tale eso e salavata kei na noda Lotu era sa tokona walega [na dina oqo].”1 Au yalataka ni o vakarorogo ena inaki dina, ena vakadeitaka na Yalo ki na nomu vakasama kei na vu ni yalomu na dina ni ivakadinadina oqo.2
O ira na iApositolo ni gauna makawa i Jisu era a veisautaki tawamudu ni a rairai oti o Koya vei ira ni oti Nona mate. E le tini vei ira a raica sara ga vakataki ira ni sa tucaketale o Koya. O Tomasi, ni a yali taumada, a tukuna, “Kevaka ka’u na sega ni raica … au na sega ni vakadinata.”3 Emuri a vunauci Tomasi o Jisu: “Mo kakua ni vakatitiqa, mo vakadinata ga.”4 Sa qai vakatavulica na Turaga na itavi bibi ni vakabauta: “Sa kalougata ko ira era sa sega ni raica, ka ra sa vakadinata.”5
Na Turaga vakaturicake tale a solia vei iratou na Nona iApositolo na ilesilesi me ratou vakadinadinataki Koya. Me vakai ira na noda iApositolo bula nikua, era biuta tu yani nodra cakacaka vakavuravura ka vakayagataka na vo ni nodra bula ena nodra vunautaka tiko vakadoudou ni Kalou sa vakaturacake na Jisu oqo. Na nodra ivakadinadina kaukauwa a veimuataki ki na nodra ciqoma na udolu vaka udolu na veisureti me ra papitaiso.6
Na itukutuku lagilagi ni matakalailai ni Siganimate e sai usutu ni Lotu Vakarisito kecega. Sa tucake tale mai na mate o Jisu Karisito, ena vuku ni ka oqo, o keda talega eda na bula tale ni da sa mate oti. Na kila oqo e solia na ibalebale kei na inaki ki na noda bula. Kevaka eda toso ki liu ena vakabauta, eda na saumaki tawamudu, me vakai ira na iApositolo ni gauna makawa. O keda, me vakataki ira, eda na rawa ni vosota e dua ga na dredre sa rawa ena vakabauti Jisu Karisito. Na vakabauta oqo e solia talega vei keda na inuinui me baleta e dua na gauna na “rarawa ni loma[da] ena vuki me reki.”7
Na noqu vakabauta vakai au a tekivutaki ni oti e dua na gauna ni rarawa.
Ko tamaqu kei tinaqu erau a daususu sipi e Niu Siladi.8 Erau a marautaka nodrau bula. Ni rau a se dua na veiwatini gone, erau a vakalougatataki ni tolu na luvedrau yalewa lalai. O koya ka gone duadua vei iratou a yacana o Ana. Ena dua na siga ni ratou a gade vata voli ena dua na drano, a mani lako tata-balebale yani o Ana vula-17. Ni oti e vica na miniti ni vaqaqara ena taqaya, a qai laukune matemate toka o koya e loma ni wai.
Na leqa vakacalaka oqo a vakavuna na rarawa tawa-tukuni rawa. A qai vola ena vica na yabaki emuri o Ta ni a lako tani vakadua eso na veidredrevaki mai na nodratou bula. A vakavuna talega e dua na gagadre me baleta na isau ni taro bibi duadua ni bula: “Na cava beka ena yaco vua na neitou Ana taleitaki? Keitou na raici koya tale beka? Ena rawa beka vakacava me qai marau tale vakadua na neitou matavuvale?
Vica na yabaki ni oti na leqa oqo, erau a lako mai ki na neitou vanua ni susu sipi e rua na daukaulotu gone mai Na Lotu i Jisu Karisito ni Yalododonu Edaidai. Erau a tekivu vakatavulica na dina eso e kune ena iVola i Momani kei na iVolatabu. Na dina eso oqo e oka kina na veivakadeitaki ni o Ana sa bula tiko oqo ena vuravura ni yalo. Ena vuku ni Tucaketale i Jisu Karisito, o koya talega ena tucake tale. Erau a vakatavulica ni sa vakalesui tale mai ki vuravura na Lotu i Jisu Karisito kei na dua na parofita bula kei na tinikarua na iApositolo. Ka rau a vakatavulica na ivakavuvuli uasivi ka vakasakiti ni matavuvale e rawa ni vauci vata me tawamudu ena lewa ni matabete vata ga a solia o Jisu Karisito vua na Nona iApositolo liu, o Pita.9
A vakila o Na ena gauna vata ga oya na dina ka ciqoma e dua na ivakadinadina ni Yalotabu. Ia, o Ta, a vakataroga voli ena yabaki tarava ena maliwa ni vakatitiqa kei na veiusoraki vakayalo. A se sega talega ni lomana me veisautaka nona ivakarau ni bula. Ena dua na mataka ni oti e dua na bogi ni moce vakaca, ka yabeta wavoki tiko na fuloa, a vuki yani o koya vei Na ka kaya, “Au sa na papitaiso ga nikua se ena sega vakadua.”
A tukuna o Na vei rau na daukaulotu na ka a yaco, ka rau a kila totolo sara na udre cake mai ni vakabauta vei tamaqu ka dodonu me sa na uturi sara ga oqo se sa na boko laivi.
Ena mataka ga oya a lako yani na neitou matavuvale ki na baravi voleka duadua. Ena lecaika ni veika a yaco tiko, keitou a pikiniki voli na gone ena veinuku ni rau kauti rau yani noqu itubutubu o Elder Boyd Green kei Gary Sheffield ki na waitui ka papitaisotaki rau. Ena dua na ikuri ni cakacaka ni vakabauta, a yalataki koya o Ta vua na Turaga ni veitalia na veika ena yaco mai, ena dina tu ga o koya ena nona bula taucoko ki na yalayala e sa vakayacora.
Oti e dua na yabaki a vakatabui e dua na valetabu e Hamilton, Niu Siladi. Ni oti vakalekaleka oya na neitou matavuvale, vata kei dua e matataki Ana tiko, a tekiduru wavokita na itutu ni veivauci ena vale rokovi oya ni Turaga. E kea, ena lewa ni matabete, keitou a vakaduavatataki vaka dua na matavuvale tawamudu ena dua na cakacaka vakalotu rawarawa ka totoka. Oqo a kauta mai na vakacegu kei na reki cecere.
Ena vuqa na yabaki emuri a qai tukuna vei au o Ta ni kevaka a sega na mate vakaloloma nei Ana, ke a sega ni yalomalumalumu rawa o koya me ciqoma na kosipeli vakalesuimai. Ia na Yalo ni Turaga a tugana na inuinui ni veika rau a vakatavulica na daukaulotu e dina. A tubu tikoga nodrau vakabauta na noqu itubutubu yacova ni rau sa vakatakatai yadua ena bukawaqa ni ivakadinadina ka a dusimaka vakamalua ena yalomalumalumu na nodrau vei vakatulewa kece ni bula.
Au na dau vakavinavinakataka tu ga na nodrau ivakaraitaki na noqu itubutubu ki na vei itabatamata mai muri. E sega ni rawa ni vakarautaki na iwiliwili ni bula e veisautaki tawamudu baleta na nodra cakacaka ni vakabauta ena vuku ni rarawa bibi.
Au sureti ira kece era vakila na rarawa, o ira kece era veisolesole kei na vakatitiqa, o ira kece era vakataroga na cava e yaco ni da sa mate, mera biuta nodra vakabauta vei Karisito. Au yalataka ni kevaka o gadreva mo vakadinata, qai cakacaka ena vakabauta ka muria na vakasolokakana ni Yalo, o na kunea na reki ena bula oqo kei na vuravura se bera mai.
Sa dua na ka noqu nanamaki ki na siga au na sotavi ganequ o Ana kina. Au nanamaki ki na dua na veivakaduatavataki mamarau vata kei tamaqu, ka a se mate sivia e 30 na yabaki sa oti. Au vakadinadinataka na reki e dau kune ena bulataki ni vakabauta, na vakadinata ka sega ni raica, ia ka kila tiko ena kaukauwa ni Yalo Tabu ni sa bula o Jisu Karisito. Ena vu ni yaloqu taucoko, au digitaka me’u muri Jisu Karisito kei na Nona kosipeli vakalesuimai. Oqo e dau vakalougatataka na veitiki kece ni noqu bula. Au kila ni o Jisu na Karisito, na Luve ni Kalou, na noda iVakabula ka noda Dauveivueti. Ena yaca i Jisu Karisito, emeni.