“Raica! Sa i Au na Kalou ni Caka Mana”
Na cakacaka mana, ivakatakilakila, kei na veikatalei e yaco vei ira na imuri i Jisu Karisito edaidai, ena nomu bula kei na noqu.
Kemuni na taciqu kei na ganequ lomani, sa dua na ka talei meu tu e matamuni edaidai. Au duavata kei ira era sa vosa oti ena koniferedi oqo, meu vakadinadinataka vei kemuni ni o Jisu Karisito e bula tiko. E dusimaka tiko na Nona Lotu; ka vosa vua na Nona parofita o Peresitedi Russell M. Nelson, ka lomani ira kece na luvena na Tamada Vakalomalagi.
Ena Sigatabu ni Mate qo eda marautaka kina na Tucaketale i Jisu Karisito, na noda iVakabula ka Dauveivueti,1 na Kalou Qaqa, na Tui ni Sautu.3 Na Nona Veisorovaki, sa vakacerecerei ena Nona Tucaketale ni oti e tolu na siga ena ibulubulu kerei, sa vakatakila ni cakacaka mana qaqa duadua ena itukutuku ni bula ni kawatamata. “Ia raica,” a kaya, “Koi au na Kalou; kau sa Kalou ni cakacaka mana.”3
“Sa mudu li na cakacaka mana ni sa lako cake ki lomalagi na Karisito ka sa tiko sobu ena liga imatau ni Kalou?”4 a taroga oqo na parofita o Momani ena iVola i Momani. A sauma, “E segai; sa sega tale ga ni mudu na nodra veiqaravi na agilosi vei ira na luve ni tamata.”5
Ni oti na Vakoti e Kauveilatai, a rairai e dua na agilosi ni Turaga kivei Meri, ni a lako tiko kei ira eso tale na marama, ki na ibulubulu mera laki lumuta na yagoi Jisu. A kaya na agilosi:
“Ena cava dou sa mai vakasaqarai koya sa bula ena kedra maliwa na mate?6
“Sa sega eke ko koya, sa tucake tale.”7
Na parofita ni iVola i Momani o Apinatai a tukuna na cakacaka mana o ya:
“Ia kevaka me a sega ni tucake tale mai na mate na Karisito, … ke na sega ni rawa na tucake tale mai na mate.
“Ia ena yaco na tucake tale mai na mate, o koya sa sega kina na kaukauwa ni ibulubulu, ka sa tiloma ko Karisito na bati gaga ni mate.”8
Na cakacaka mana i Jisu Karisito a vakavuna mera a kayavaka na tisaipeli e liu: “Ko cei beka oqo! sa vakarota na cagi kei na wai, a rau sa talairawarawa vua.”9
O ira na Apositolo e liu era muri Jisu Karisito ka rogoci Koya ni vakavulica na kosipeli, ka vakadinadinataka e vuqa na cakacaka mana. Era raica nodra, “sa rai na mataboko, ka lako na lokiloki, sa vakasavasavataki na vukavuka, ka rogo rawa na didivara, sa vakaturi cake tale na mate, a sa vunautaki na itukutuku vinaka vei ira na dravudravua.”10
Na cakacaka mana, ivakatakilakila, kei na veikatalei e yaco vei ira na imuri i Jisu Karisito edaidai, ena nomu bula kei na noqu. Na cakacaka mana era sa, ivakaraitaki, ka vakatakilakila vaKalou ni kaukauwa kei na veivakadeitaki tawayalani ni “sai koyakoya tikoga na Kalou e nanoa, ena siga edaidai, ka sega ni mudu.”11 Sai Jisu Karisito, ka bulia na wasawasa, e rawa ni maravutaka; a dolava na matadra na mataboko sa rawa me dolava na matada ki lomalagi; sa savai ira na vukavuka sa rawa me tudonutaka na noda malumalumu; a vakabula na tamata sa wamalai ni sa rawa meda tu yani ni sa kacivi keda “Lako mai, mo muri au.”12
E vuqa vei kemuni o ni sa raica na cakacaka mana, ko ni sa kurabui kina. Era rairai ka lailai sara ni vakatauvatani vei Jisu ni a vakabula na mate. Ia na kena levu e sega ni veidutaitaka na cakacaka mana, ia baleta ga ni sa mai vua na Kalou. Eso era kaya ni cakacaka mana sa ka ni veisotari donu se ka ni laki. Ia na parofita o Nifai e cudruvi ira era “sa beca ga na kaukauwa kei na nona cakacaka mana na Kalou, ka ra vakacaucautaka vei ira na nodra yalomatua kei na nodra kilaka, mera rawa ka kina.”13
Na cakacaka mana era sa yaco ga ena kaukauwa vakalou mai Vua sa “kaukauwa me ia na veivakabulai.”14 Na cakacaka mana era sa ikuri ni ituvatuva tawamudu ni Kalou; sa cakacaka mana era sa yatunibula mai lomalagi ki vuravura.
Ena vulaitubutubu sa oti keirau a gole kei Sister Rasband ki Goshen, Utah, ki na Veivosaki Votu e vuravura raraba a kaburaki ki na sivia e 600,000 na tamata ena 16 na veimataqali vosa.15 Na parokaramu me raicamatua na kena yaco na Vakalesuimai ni kosipeli i Jisu Karisito kei na nodra taro na itabagone qase cake e vuravura raraba. Keirau a raica vata kei Sister Rasband na veitaro oqori; ka solia vei keirau na madigi me vakadinadinataki Josefa Simici ni sa parofita ni Kalou, na kaukauwa ni ivakatakila ki na neirau bula, na drodro tiko ni Vakalesuimai ni kosipeli i Jisu Karisito, kei na dina kei na ivakaro keirau sa vakamareqeta. E vuqa era vakarorogo tiko nikua era a tiki ni kena yaco na cakacaka mana o ya.
Taumada na kakaburaki a dodonu me vakayacori mai na Veikau Tabu ena vualiku kei New York, a vakadinadinataka kina o Josefa Simici: “Au sa raica e rua na Tamata, ka sega ni vakamacalataki rawa na kedrau iserau kei na lagilagi, e rau tucake tu e macawa donumaki au. A sa kacivi au e dua vei rau, dusi koya na kena ikarua ka kaya—Oqo na Noqu Gone ni Toko. Rogoci Koya!16 Oya, kemuni na taciqu kei na ganequ, na caka mana.
Na mate veitauvi ni vuravura sa vagolei keda meda laki kakaburaki ki Goshen, e Utah, na vanua sa tavoca vou kina na Lotu i Jisu Karisito ni Yalododonu Edaidai, na yaloyalo, ni dua na tiki makawa kei Jerusalemi. Keirau sa voleka sara yani kei Sister Rasband ki Goshen ena yakavi Siga Tabu o ya ka raica na kubou buto sa gole tiko mai ena vanua me keirau lako kina. Sa kama levu mai na veikau ena vanua o ya, ka keirau sa lomaleqataka ni na rawa me vakaleqai na kakaburaki. E dina sara, ni vo e ruasagavulu na miniti me ono na kaloko, na gauna ni neimami kakaburaki, sa boko vakadua na livaliva ena vale taucoko. Sega na livaliva! Sega na kakaburaki. A tiko e dua na jenereita era nanuma eso me na vakavurea mai na livaliva, ia a sega na veivakadeitaki mena tokona rawa na veimisini lelevu era tiko.
Oi keimami kece na vakaitavi, oka kina na daukakaburaki, daunivakatagi, kei na daunimisini, vakakina—e 20 na itabagone qase cake ni noqu matavuvale, era a vakarautaki tu ena veika me yaco. Au a gole tani mai na nodra tagi kei na veilecayaki ka vakamamasu vua na Turaga me yaco na cakacaka mana. “Tamaqu Vakalomalagi,” au a masu, “Au a sega ni dau masu me yaco na cakacaka mana, ia oqo au sa kerea me na yaco. Na soqoni oqo me sa na yaco me baleti ira na neimami itabagone qase cake e vuravura raraba. Keimami sa gadreva sara na livaliva me waqa kevaka me sa Nomuni lewa ga”
Ni oti na ono ena vitu na miniti, me vaka ga na totolo ni a boko na livaliva, sa waqa totolo tale mai. Sa tekivu cakacaka na ka kecega, mai na sereivakatagi kei na gusu ni ivosavosa ki na vidio kei na misini kece ni kakaburaki. Keimami sa tekivu ka toso sara. Keimami a sotava e dua na cakacaka mana.
Ni keirau sa lesu tale tiko ki vale kei Sister Rasband ena motoka ena yakavi o ya, rau a tekstaka mai o Peresitedi kei Sis. Nelson na itukutuku oqo: “Ron, keirau gadreva mo drau kila ni gauna ga sa rogovaki mai ni sa boko na livaliva, keirau a masu me yaco e dua na cakacaka mana.”
“Ia koi au na Turaga au sa dodoka yani na ligaqu me’u vakatakila na kaukauwa mai lomalagi; dou sa sega ni raica rawa edaidai, ia me tei vakalailai mada dou na qai raica, ka kila ni sai Au, au na lako mai ka lewai ira na noqu tamata.”17
Sai koya sara ga oqori na veika a yaco. Na Turaga sa dodoka mai na Ligana ka sa waqa tale mai na livaliva.
Na cakacaka mana ena kaukauwa ni vakabauta, me vaka e vakatavulica vei keda o Peresitedi Nelson ena soqoni sa oti. “Ni kevaka sa sega na vakabauta ena kedra maliwa na luve ni tamata, ena sega ni cakava rawa e dua na cakacaka mana na Kalou ena kedra maliwa; a sa sega kina ni vakaraitaki koya vei ira me yacova ni ra sa vakabauta.”
E tomana:
“Raica, sa bale ki na qele na vale ni veivesu ena nodrau vakabauta ko Alama kei Amuleki.
“Raica, ena nodrau vakabauta ko Nifai kei Liai, era sa veisau kina na Leimanaiti ka ra papitaiso ena bukawaqa kei na Yalo Tabu.
Raica, ena vakabauta i Amoni kei iratou na wekana, sa vakayacori kina na caka mana levu ena kedra maliwa na Leimanaiti.
“Ka a sega tale ga ni dua na gauna me a vakayacori kina e dua, na veicakacaka mana me yacova ni ra sa vakabauta; o koya era sa vakabauta taumada kina na Luve ni Kalou.”18
Au sa rawa ni kuria na veitaravi ni ivolanikalou oqori, “Ena nodra vakabauta na itabagone qase cake gugumatua mera vakaitavi, ira na daukakaburaki, iliuliu kei na lewe ni Lotu, dua na iApositolo, kei na parofita ni Kalou era a vakasaqara na caka mana cecere o ya ka waqa tale na livaliva ena dua na vanua vakatikitiki ni caka iyaloyalo mai Goshen, Utah.”
Na cakacaka mana e rawa me yaco mai me isau ni masu. Era sa sega ni dau kena eda na kerea se na ka eda namaka, ia ni da nuitaka na Turaga, ena tiko kina o Koya, ka dau dina o Koya. Ena sotara donu o Koya na cakacaka mana ena gauna eda gadreva dina kina.
Sa vakayacora na Turaga na cakacaka mana meda nanuma tiko na Nona kaukauwa, ni sa lomani keda, ni sa dodoliga tiko mai lomalagi ki na noda bula vakatamata, kei na Nona gagadre me vakavulica na veika sa yaga bibi duadua. “Ni ko koya sa vakabauti au me vakabulai,” a kaya o Koya vei ira na Yalododonu ena 1831, kei na yalayala oqo sa tomani tiko nikua, “ka sa sega ni lewai me mate, ena bula ga.”19 Sa tu na lawa sa lewai oti mai lomalagi, ka sa baleti keda tikoga.
Sa dau yaco ena so na gauna eda nuitaka kina na cakacaka mana me vakabulai e dua na daulomani, me sukalesu e dua na cakacaka cala, se vakamalumutaka e dua na yalo ni tamata sa cudru se tuvakatani. Ni raici na veika ena matada vakayago, eda sa gadreva na Turaga me takoso, ka vakavinakataka na ka sa vakacacani. Ena vakabauta, ena yaco mai na cakacaka mana, dina ga ni sega ena noda gauna se ena kena iwali eda a gadreva kina. Sa kena ibalebale beka o ya ni sa lailai noda yalodina se sega ni kilikili kaya ki na Nona veivuke mai? Sega. O keda na tamata lomani ni Turaga. A solia na Nona bula ena vukuda, kei na Nona Veisorovaki sa tomana tikoga me sereki keda mai na icolacola kei na ivalavala ca ni kevaka eda na veivutuni ka toro voleka Vua.
Sa veivakananumi vei keda na Turaga, “Sa duatani na noqu ivalavala ka dua tani na nomudou ivalavala.”20 E kaci tu ko Koya, “Dou lako mai vei au, koi kemudou vakaaduaga sa oca, ka colata na icolacola bibi, ia kau na vakacegui kemudou”21—vakacegu mai na lomaleqa, rarawa, rere, talaidredre, kauwai vei ira na daulomani, kei na lalawa sa yali se vakacacani. Na vakacegu ena loma ni veilecayaki se rarawa o ya na cakacaka mana Nanuma na vosa ni Turaga: “Au a sega li ni vakaceguya na nomu vakasama me baleta na ka oqo? Ai vakadinadina uasivi cava o rawa ni taukena ma na kena mai vua na Kalou?”22 Na cakacaka mana sai koya o Jisu Karisito, o Jiova sa Kaukauwa Sara, na Luvei Koya sa Cecere Daudau, sa solia tiko mai na vakacegu.
Me vaka ga a rairai vei Meri ena were, ka kacivi koya ena yacana, sa kacivi keda o Koya meda cakacakataka na noda vakabauta. A namaka tiko o Meri me qaravi Koya ka karoni Koya. Na Nona Tucaketale a sega ni kena a namaka tiko o Meri, ia sa yaco ena vuku ni ituvatuva cecere ni Bula Marau.
“Mo kevu sobu mai na kauveilatai,”23 era a vosa vakacacataki Koya mai Kalivari na lewevuqa tawavakabauta. A rawa Vua me vakayacora e dua na cakacaka mana vaka oya. Ia sa kila tu o Koya na kena itinitini mai na kena itekivu, ka sa gadreva me yalodina tiko ki na ituvatuva nei Tamana. Na ivakaraitaki oqo me kakua sara ni yali maivei keda.
Ki na noda veigauna ni vakatovolei a kaya kina o Koya “Drau nanuma tiko na we ni moto e sarisariqu kei na we ni ivako ena ligaqu kei na yavaqu; ia mo drau yalodina ka muria sara na noqu ivakaro, ia drau na rawata vakaidina na matanitu vakalomalagi.”24 O ya, kemuni na taciqu kei na ganequ, na cakacaka mana sa yalataki kece tu vei keda.
Ena Sigatabu ni Mate oqo ni da marautaka na caka mana ni Tucaketale ni Turaga, niu sa Apositolo i Jisu Karisito, sa noqu masu mo ni na vakila na kaukauwa nei Dauveivueti ena nomuni bula, ni nomuni vakamamasu vua na Tamada Vakalomalagi ena saumi mai ena loloma kei na yalodina sa vakaraitakai o Jisu Karisito ena Nona gauna taucoko ni cakacaka vakalotu. Sa noqu masu mo ni tudei ka yalodina tikoga ena veika kece era na lako mai. Kau sa vakalougatataki kemuni ni na yaco vei kemuni na cakacaka mana me vaka keimami a sotava mai Goshen—ke sa lewa ga ni Turaga. Mo ni vakasaqara na veivakalougatataki mai lomalagi oqo ena nomuni bula mo “dou vakasaqarai Jisu oqo, o koya era sa volavola kina na parofita kei ira na apositolo, me nomudou tiko ga kina na loloma soli wale ni Kalou ko Tamada, kei na Turaga ko Jisu Karisito kei na Yalo Tabu, o koya sa tukuni rau me tikoga kei kemudou ka sega ni mudu.”25 Ena yaca i Jisu Karisito, emeni.