Na Noda iVakabula Yadua
Ena vuku ni Nona isoro ni veivakaduavatataki, e tu vua na iVakabula na kaukauwa me savata, vakabula, ka vakaukauwataki keda yadudua.
Au vakavinavinaka vakalevu niu mai tiko kei kemuni ena mataka ni Siganimate talei nikua. Niu vakananuma na Siganimate, au taleitaka meu cavuta ena noqu vakasama na vosa ka a tukuna na agilosi vei ira na a tiko ena iBulbulu ena Were: “Ena cava dou sa mai vakasaqarai koya sa bula ena kedra maliwa na mate? Sa sega eke ko Koya, sa tucake tale.”1 Au vakadinadinataka ni a tucake tale ko Jisu na kai Nasareci ka sa bulatiko o Koya.
Na Cava Ko Nanuma baleti Karisito?
Ena tolusagavulu ka va na yabaki sa oti, keirau a sotava ka vakatavulica kei na noqu itokani vakaulotu e dua na tamata vuli vinaka sara mai na ka dauvolavola ena niusipepa e kea e Davao, Filipaina. Keirau marautaka na vakatavulici koya baleta ni levu nona taro ka dau vakarokorokotaka vinaka na neirau vakabauta. Na taro daunanumi dina ka a tarogi keirau kina oya “Na cava drau nanuma baleti Karisito?”2 E dina ga ni keirau wasea ena matalau na neirau vakila eso ka tukuna na ivakadinadina baleti Jisu Karisito. E tabaka emuri o koya e dua na itukutuku ena ulutaga vata ga ka lewena na veivosa momona kei na matavosa baleta na iVakabula. Au nanuma niu a tarai ia au a sega soti sara ni laveti. E tu kina e levu na itukutuku vivinaka ia e vaka ga me lala tu ka yali na kena kaukauwa vakayalo.
Tubucake tikoga na nomu Kilai Koya
“Na cava ko nanuma baleti Karisito?” Au kila ena noqu vakavolekati au vua na iVakabula ena vakayarayataka vakalevu na noqu rawata meu rogoci Koya ka cakacakataki au kina. Ena vica na yabaki sa oti, a taroga kina o Elder David A. Bednar na taro eso oqo me tiki ni nona vosa: “Eda kila walega baleta na iVakabula, se e tubu tikoga na noda kilai Koya? Ena yaco vakacava meda mai kila na Turaga?”3
Niu vuli ka tugana tiko au qai kilavotu naka au kila baleta na iVakabula e bibi cake sara mai na levu ni noqu kilai Koya. Au sa qai vakadeitaka ekea meu solia e levu cake na igu meu kilai Koya. Au vakavinavinakataka vakalevu na ivolanikalou, kei na nodra ivakadinadina na turaga kei na marama yalodina tisaipeli i Jisu Karisito. Na noqu ilakolako vakai au ena vica na yabaki sa sivi e a kauti au ki na vuqa na sala ni vuli kei na vakasaqaqara. Au masu me na kauta vei kemuni na Yalo Tabu nikua me dua na itukutuku ka uasivi cake mai na veivosa takiveiyaga kau sa vola mai.
A iMatai, e gadrevi meda kilavotu ni noda kila na iVakabula e sasaga bibi duadua ni noda bula. E dodonu me vakaliuci mai na veika kece tale eso.
“Ia sai koya oqo na bula tawamudu, me ra kilai kemuni na Kalou dina duadua ga, kei Jisu Karisito ko koya ko ni a tala mai.”4
“Sa kaya vua ko Jisu, Oi au na sala, kei na vu-ni-dina, kei na vu-ni-bula, sa sega ni torovi Tamaqu walega e dua na tamata, ena vukuqu ga.”5
“Oi au na rarama kei vuravura: ko koya sa muri au ena sega ni lako ena butobuto, ena tu ga vei koya na rarama ni bula.”6
A iKarua, ni sa toro cake tiko ga na noda mai kila na iVakabula, na vei umavosa ni ivolanikalou kei na nodra vosa na parofita ena mai vakaibalebale vakavoleka sara vei keda ka sa yaco me noda vosa sara ga. E sega ni baleta na noda vakatotomuria na nodra vosa, vakila, kei na veika era sotavi na tani oqo na ka e yaco ni da sa qai kilai keda tiko, ena noda sala duidui, ni da sa vakatovolea tiko na vosa7 ka ciqoma na ivakadinadina mai na Yalo Tabu. Me vaka e a vakaraitaka na parofita o Alama:
“O ni sa sega ni nanuma li niu sa kila na veika oqo? Raica, au sa vakadinadinataka vei kemuni ni’u sa kila ni sa dina na veika au sa tukuna oqo. Ia dou sa kila li na vuna au kaya kina ni sa dina?
“Raica au sa kaya vei kemuni, sa vakatakilai ira vei au na Yalo Tabu ni Kalou. Raica, au a lolo ka masu ena vuqa na siga meu kila kina na veika oqo. Ia oqo au sa kila ni ra sa ka dina; ni sa vakatakila vei au na Turaga na Kalou ena kaukauwa ni nona Yalo Tabu; ia oqo na yalo ni vakatakila sa tiko vei au.”8
A iKatolu, tubu tiko na noda kilaka me baleta na Veisorovaki i Jisu Karisito e baleti keda saraga koi keda yadudua ena vukei keda meda kilai Koya. Vuqa na gauna e rawarawa vei keda meda vakasamataka ka vosa baleta na Veisorovaki i Karisito ka tukuna vakarabailevu mai na noda kilavotu na kena bibi ena noda bula. Na Veisorovaki i Jisu Karisito e tawayalani ka tawamudu ka kovuta-taucoko ena kena raba kei na kena titobu ka ni yadudua ena kena vakavotukana. Ena vuku ni Nona isoro ni veivakaduavatataki, e tu vua na iVakabula na kaukauwa me savata, vakabula, ka vakaukauwataki keda yadudua.
Na gagadre ni iVakabula, a Nona inaki duadua, mai na ivakatekivu sara, oya me kitaka na lewa nei Tamada. Na lewa nei Tamada sa ikoya me vukea oKoya me [vakavuna] na tawa-mate rawa kei na bula tawamudu ni tamata”9 me mai noda “dautataro vei Tamada.”10 Ia, “sa dina ga sa Luvena ko Koya, a sa vakatavuci ga ena ivalavala ni talairawarawa, ni sa vosota tiko na ka rarawa; ia ni sa vakarautaki oti sa yaco me vu ni bula tawamudu vei ira kecega sa talairawarawa vua.”11
“Ia ena lako yani ko koya, ena vakila na mosi kei na vakarawarawataki kei na veivakatovolei kecega. …
“Ia ena mate ko koya, me tasereka kina na ivau ni mate … ia sa ciqoma ko koya na nodra malumalumu, me vakasinaiti na lomana ena loloma cecere, … me rawa kina ni vakila me vaka na veika vakayago na sala me vukei ira kina na nona tamata me vaka na nodra veimalumalumu.
“… O koya ena vakararawataki kina na Luve ni Kalou me vaka na veika vakayago me colata kina na nodra ivalavala ca na nona tamata, me bokoca kina na nodra talaidredre me vaka na kaukauwa ni nona veivueti.”12
Au vinakata meu wasea e dua na ka au sotava ka vakaibalebaletaka na ogaoga e dau yaco vei keda ni da ciqoma na ituvaki voleka ni Veisorovaki ni Turaga.
Vica na yabaki sa oti, ena veisureti ni noqu iliuliu, au a wilika kina na iVola i Momani mai na kena waqa kina kena waqa ka makataka na veitikina ka tukuni kina na Veisorovaki ni Turaga. E sureti au talega o na noqu iliuliu meu vakarautaka e dua na tiki dua ni vakaleleka ni veika au sa vulica. Au kaya lo, “Dua na drauna? Dina, qori e rawarawa.” Au kurabui, ia, au kunea ni dredre sara kau mani guce.
Au sa qai kilavotu niu a guce baleta niu calata na maka niu nanuma cala. A iMatai, au a namaka ni na ivakaleleka ena vakauqeti ira kece. Na ivakaleleka e a baleti au ka sega ni baleta e dua tani tale. E a baleta na veika au vakila kei na lomaqu me baleta na iVakabula kei na ka e sa cakava o Koya baleti au ka me gauna kece au wilika kina, ena kauta votu mai na veika sotavi vakayalo e talei, vakananumi, ka voleka.
Ai Karua, au namaka na ivakaleleka me dokai ka momona ka lewena na vosa lelevu kei na matavosa eso. E a sega ga ni baleta na vosa lelevu. E a nakiti me a dua na itukutuku matata ka rawarawa ni yalodei. “Ia ni dau rekitaka na yaloqu na ka e matata; ni sa dau cakacaka vakakina oqo na Turaga na Kalou ena kedra maliwa na luve ni tamata. Sa solia na Turaga na Kalou na rarama me ra kila.”13
A iKatolu, au a namaka ni na vinaka taucoko, e dua na icavacava ni ivakaleleka ka—me sega ni dua me kuria e dua na cakacaka ka—toso tiko kau rawa ni kuria e dua na vosa eke se dua na matavosa ekea ni sa matua cake tiko na noqu kila na Veisorovaki i Jisu Karisito.
iVakadinadina kei na Veisureti
Niu se cauravou, au vuli vakalevu mai na noqu veitalanoa kei na noqu bisopi. Ena veiyabaki ni gone oya, au vulica meu taleitaka na qaqa ni serenilotu talei oqo:
Loloma i Jisu au na dau qoroya tu,
Au qai kurabui nona dau karoni au.
Au rere niu kila vukuqu mai rube, rarawa ka mate no.
Au rere niu kila, a mate meu bula ga, vukuqu mai rube, rarawa ka mate no.
Sa taleitaki tu, Nona lomani au ka mai mate kina
Ka mai mate kina!
Sa taleitaki tu, talei tu vei au!14
E a sureti keda na parofita ko Moronai ka vaka: “Ia oqo, au sa vakauqeti kemudou mo dou vakasaqarai Jisu, o koya era sa vola na parofita kei ira na apositolo.”15
E a yalataka o Peresitedi Russell M. Nelson ni “kevaka [eda] toso ni vulica na ka kece [eda] rawata baleti Jisu Karisito, na [noda] rawata meda vuki tani mai na ivalavala ca ena tubu cake. Na [noda] gagadre me da maroroya na ivunau ena nawa ki lagi.”16
Ena Sigatabu ni Siganimate oqo, me vaka ga na lako mai ni iVakabula mai na Nona ibulubulu vatu, me da qai yadra mai na noda sosovu vakayalo ka cabe baleta na kabu ni vakatitiqa, na veivesu ni rere, na veivakasesei ni viavialevu, kei na vakawelewele. E bula ko Jisu Karisito kei Tamada Vakalomalagi. Au vakadinadinataka na Nodrau loloma uasivi e baleti keda. Ena yaca i Jisu Karisito, emeni.