Vakanuinui vei Karisito
Eda guta meda vukei ira kece era galili se vakila ni ra sega ni okati. Meu vakamacalataka, vakabibi, o ira era sega tiko ni vakamau.
Kemuni na taciqu kei na ganequ, ena Siga ni Mate oqo eda sa raimatua ki na Tucaketale lagilagi ni noda Turaga ka iVakabula, o Jisu Karisito. Eda nanuma kina na Nona veisureti yalololoma mo “dou lako mai vei au, koi kemudou vakayadua ga sa oca ka colata na icolacola bibi, ia kau na vakacegui kemudou.
“Vakataqara vei kemudou na noqu ivua, ka vuli vei au; ni’u sa yalomalua ka yalomalumalumu: dou na kunea kina na vakacegu ni yalomudou.
Ni sa rawarawa na noqui vua, ka mamada na noqu icolacola.”1
Na veisureti ni iVakabula meda lako Vua sa dua na veisureti kivei keda kece sega walega ni da gole Vua ia meda sa lewena talega na Nona Lotu.
Ena tikina ni bera na veisureti yalololoma oqo, a vakavulica o Jisu na sala me vakayacori kina na noda vakasaqara meda muri Koya. A kaya kina, “Ia sa sega ni dua na turaga [se marama] sa kila na Luvena, ia ko Tamana duadua ga, se dua tale na turaga [se marama] e kila na Tamana, ia ko Luvena duadua ga, kei koya sa vinakata na Luvena me vakatakilai koya vua.”2
Sa gadreva vei keda o Jisu meda kila na Kalou ni sa Tamada Vakalomalagi sa dauloloma.
Ni da kila ni sa lomani keda na Tamada Vakalomalagi ena vukea meda kila o cei o keda ka kila ni da sa lewe ni Nona matavuvale cecere tawamudu.
E vakaraitaka kina na Mayo Clinic: “Na kila ni da lewe ni dua na ka sa ka bibi sara. … Voleka ni veituvaki kece ni noda bula sa tuvanaki ena noda sa okati tiko ena dua na ka.” E kuri ena ripote, “Eda na sega ni tawasea rawa na bibi ni yalo sa okati mai na noda bula vakayago kei na vakasama.”3kau kuria kina na noda bulabula vakayalo.
Ena yakavi ni bera na Nona vakararawataki e Kecisemani ka mate ena kauveilatai, a sotavi ira Nona tisaipeli na iVakabula ena iOtioti ni Kana Vata. A kaya vei iratou, “Dou na kunea e vuravura na rarawa; ia mo dou vakacegu; au sa vakamalumalumutaki vuravura.”4 Ni bera ni karobo na siga e tarava, a vakararawataki o Jisu Karisito ka a “mate [ena kauveilatai] ena vuku ni noda ivalavala ca.”5
Au vakasamataka na levu ni nodra galili mai Jerusalemi na yalewa kei na tagane era dau muri Koya ni sa dromu na siga ka solegi ira mai na butobuto kei na rere.6
Me vakai ira na tisaipeli makawa e liu volekata na 2,000 na yabaki sa oti, e vuqa vei kemuni o ni rairai daugalili ena veigauna eso. Au sa sotava talega na galili vakaoqo ena nona mai takali na watiqu talei, o Barbara, ena rua veimama na yabaki sa oti. Au kila na cava na voliti tu ena lewe ni vuvale, itokani, kei na veiwekani ia seu vakila ga na galili—baleta o noqu daulomani ni noqu bula sa sega tale ni tiko e yasaqu.
Na mate raraba na COVID-19 sa vakarabailevutaka sara na mataqali tutaudua kei na galili oqo vei ira e vuqa. Ia, se cava na ibolebole eda sotava ena bula oqo, eda rawa ni, vaka ena isevu ni mataka ni Siga ni Mate, meda yadra mai ki na dua na bula vou vei Karisito ena veimadigi vou ka totoka kei na veika vou ni da gole vua na Turaga ena inuinui ka okati.
Au kila deivaki na mosi sa tu vei ira era sega tu ni dau okati. Niu sarava na itukutuku kei vuravura raraba, au raica e vuqa e vaka mera sotava tiko na galili oqo. Au vakabauta, ni vuqa, sa baleta era rairai sega ni kila ni sa lomani ira na Tamada Vakalomalagi ka sa okati kece ki na Nona vuvale tawamudu. Ni da vakabauta ni lomani keda tiko na Kalou ka da sa Luvena sa veivakacegui ka veivakadeitaki sara.
Baleta ni da sa luvena vakayalo na Kalou, na tamata kece sa vakalou na nona itekitekivu, ivakarau, kei na igu ni rawa ka. Oi keda yadua sa “luvena tagane se yalewa vakayalo ni noda itubutubu vakalomalagi.”7 Oqo na noda ivakatakilakila! Oqo oi keda dina!
Na noda ivakatakilakila vakayalo e vakarabailevutaki ni da sa kila vinaka e vuqa noda ivakatakilakila vakayago, kei na kawa tamata, itovo, se iyau ni vanua.
Na kila vakayalo kei na ivakatakilakila vakavanua oqo, loloma, kei na okati e rawa ni uqeta na inuinui kei na lomani Jisu Karisito.
Au tukuna tiko na nuitaki Karisito sega ni vakanananu walega. Ia, au tukuna tiko na vakanuinui ni sa namaki tiko me na kilai. Na vakanuinui vakaoqo sa ka bibi me uabaleti kina na meca, susugi na valulesu vakayalo kei na kaukauwa, ka me kilai ni sa lomani keda o Tamada Tawamudu ka da sa Luvena eda sa oka ki na Nona matavuvale.
Ni da sa vakanuinui tiko vei Karisito, eda na qai kila ni gadrevi meda na cakava ka maroroya na veiyalayalati tabu, sa qai yaco na noda gagadre talei kei na tatadra me na vakavotukanataki mai Vua.
Eratou sa veivakasalataki na Kuoramu ni iApositolo Le Tinikarua ena yalo masumasu kei na gagadre dina mera kila vinaka na sala mera vukei kece era sa galili tu se nanuma ni ra sega tu ni okati. Sa lomada meda vukei ira kece era vakila tu oqo. Meu vakamacalataka, vakabibi, vei ira era sega tiko ni vakamau.
Taciqu kei na ganequ, e sivia e veimama na uabula ena Lotu edaidai era sa yada, sere, se sega mada ni bau vakamau. Eso era vakasamataka tiko na nodra veimadigi donu kei na tikina ena ituvatuva ni Kalou vakakina ena Lotu. Sa dodonu meda kila vinaka ni bula tawamudu e sega ni baleta ga na ituvaki ni bula vakamau edai ia meda bula vakaitisaipeli ka “gumatua ena vakadinadinataki Jisu.”8 Na nodra vakanuinui kece era sega tu ni vakamau sa tautauvata vei ira kece na lewe ni Lotu vakalesuimai ni Turaga—me rawata na loloma soliwale i Karisito ena “talairawarawa ki na lawa kei na cakacaka vakalotu ni Kosipeli.”9
Au kaya kina ni tiko eso na ivakavuvuli bibi e gadrevi meda na kila vinaka.
iMatai, na ivolanikalou kei ira na parofita edaidai era vakadeitaka ni ira kece sa yalodina ena maroroi ni veiyalayalati ni kosipeli ena yaco mera na bula vakacerecerei E vakavulica o Peresitedi Russell M. Nelson: “Ena sala kei na gauna ni Turaga, ena sega na kalougata mera vakuwai kina na Nona Yalododonu yalodina. Ena vakatulewa na Turaga ka saumi ira na tamata yadua me vaka na gagadre dina ni yalodra vakakina na nodra cakacaka.”10
iKarua, na gauna donu kei na ivakarau sa soli kina na veivakalougatataki ni bula vakacerecerei era se bera ni vakatakilai kece mai, ia era sa vakadeitaki tiko11 E vakamacalataka o Peresitedi Dallin H. Oaks ni so na ituvaki ni “bula oqo ena vakatudonutaki ena Mileniumi, o ya na gauna me vakacavari na veika kece se bera ni oti ena ituvatuva cecere ni bula marau vei keda kece na luvena kilikili na Tamada.”12
E sega ni kena ibalebale ni kalougata kece sa tu vakawawa me yacova na Mileniumi; ni so era sa ciqomi oti, kei na so tale ena tomani tiko na kena ciqomi me yacova na siga o ya.13
iKatolu, na waraka na Turaga sai koya me tomani tiko na talairawarawa kei na tubu vakayalo yani ki Vua Na waraka na Turaga e sega ni tukuna meda wawa ena noda gauna. Mo kakua vakadua ni nanuma ni ko tiko vaka wawa ena rumu.
Na waraka na Turaga sai koya meda cakacakataka. Au sa vulica ena veiyabaki ni noda nuitaki Karisito ena tubu ni da qaravi ira na tamata. Ni da veiqaravi vakataki Jisu, sa na tubu ga na noda nuitaki Koya.
Me rawata na nona tubu e dua nikua ni waraka tiko na Turaga kei na Nona yalayala sa gacagaca tabu bibi ni Nona ituvatuva kivei keda vakayadua. Na nona cau e dua nikua me vukea na kena tarai cake na Lotu e vuravura ka sokumuni o Isireli sa gadrevi sara vakaidina. Na bula vakamau e sega ni tarova nona gumatua e dua me veiqaravi. Na Turaga sa dokai ira era sa veiqaravi ka waraki Koya tiko ena vosota kei na vakabauta.14
iKava, na Kalou sa solia na bula tawamudu vei ira kece na Luvena O ira kece sa ciqoma na isolisoli ni loloma ni veivutuni na iVakabula ka bulataka na Nona ivakaro ena rawata na bula tawamudu, dina ga ni ra sega ni taura kece na kena ivakarau kei na kena uasivi ena bula oqo. O ira sa veivutuni era na sotava na veivosoti ni Turaga sa tu rawa, ni sa vakadeitaka o Koya, “Io, ena veigauna kece era veivutuni kina na noqu tamata au na vosota kina na nodra lako sese vei au.”15
Ena iotioti ni veitudaitaki, na nona gugumatua, gagadre, kei na veimadigi e dua ena vuku ni galala kei na digidigi, kei na ilavaki ni kalougata tawamudu, sa nona ga na Turaga me vakataulewa kina.
iKalima, ni da nuidei ena veivakadeitaki oqo sa titobu tu ena vakabauti Jisu Karisito, ena loloma soliwale sa tudonu kina na veika kece ni bula oqo.16 Na kalougata kece a yalataki sa rawati mai Vua, mai na Nona Veisorovaki, “sa lako sobu mai ki ra sara”17 ka sa “vakamalumalumutaki vuravura.”18 Sa “tiko sobu ena liga imatau ni Kalou, me taura mai vei Tamana na nona dodonu me tu kina vua na loloma cecere vei ira na luve ni tamata[;] … sa dau valataka kina ko koya na veika me baleti ira na luve ni tamata.”19 Ni sa oti, “era na vakasinaiti na yalododonu ena nona lagilagi, ka ciqoma na nodra ivotavota”20 ka “sa itaukei vata kei Karisito.”21
Sa nosa gagadre ni veivakavuvuli oqo ena vukei ira kece sa torocake nodra nuitaki Karisito ka vakila e yalodra ni ra sa itaukei.
Kakua ni guilecava ni ko sa luve ni Kalou, na Tamada Tawamudu, nikua ka tawamudu. E lomani iko o Koya, kei na Lotu sa vinakata ka gadrevi iko. Io, keimami gadrevi iko! Keimami gadreva na domomu, taledi, kila-ka, nomu vinaka, kei na ivalavala dodonu.
Ena vuqa na yabaki, eda sa tukuni ira tiko na “itabagone qase cake,” “itaba qase sega ni vakamau,” kei na “qase.” Na veitutu oqori ena rawa me veivuke vakaveiqaravi veiliutaki ena so na gauna ia sa rawa me veisau vakasauri noda kila rawa eso tale.
E tiko beka na sala meda lako tani mai na ivakarau vakaoqo e rawa ni tawasei keda mai vua e dua?
Sa kerei keda o Peresitedi Nelson meda sa vakatokai keda meda sa lewe ni Lotu i Jisu Karisito ni Yalododonu Edaidai. Eda sa na oka taucoko beka kina, se vavei?
Sa tiko na kaukauwa ena kosipeli i Jisu Karisito me vakaduavatataki keda. Eda sa vaka meda sa tautauvata sara ka sega ni duidui. Ni da sa lewe ni vuvale ni Kalou, eda sa qai veitacini ka veiganeni dina sara. A kaya o Paula, “A sa buli ira [na Kalou] era sa dra vata na lewe ni veivanua kecega, mera tiko ena dela i vuravura taucoko.”22
Kemuni na peresitedi ni iteki, bisopi, kei na iliuliu ni kuoramu kei na marama, au sa kerea mo ni raici ira na lewe yadua ni nomuni iteki, tabanalevu, kuoramu, se mataisoqosoqo era sa lewenilotu e rawa ni ra cau ka veiqaravi ena itutu eso ka vakaitavi ena vuqa na sala.
Na lewe yadua ni noda kuoramu, mataisoqosoqo, tabanalevu, kei na iteki era sa vakaisolisoli ka vakataledi mai vua na Kalou ka rawa ni tara cake na Nona matanitu nikua.
Meda sa kacivi ira noda lewenilotu era sega tu ni vakamau mera na veiqaravi, veilaveti, ka veivakavulici. Guilecava na ivakarau kei na vakasama makawa sa dau vakavuna vakatawadodonu mera yalo galili kina ka sega tu ni okati se sega ni veiqaravi rawa.
Au sa vakadinadinataka ena Siga ni Mate oqo na noda iVakabula o Jisu Karisito kei na inuinui tawamudu e solia o Koya vei au kei ira kece era vakabauta na Yacana. Au wasea na ivakadinadina oqo ena yalo e vakarokoroko ena Yacana tabu, sai Jisu Karisito, emeni.