Sa Tucaketale na Karisito; Na Vakabauti Koya ena Tosoya na Ulunivanua

Mai vei Peresitedi Russell M. Nelson

Peresitedi ni Lotu i Jisu Karisito ni Yalododonu Edaidai

Na vakabauti Jisu Karisito sa kaukauwa cecere sa tu me noda ena bula oqo. Sa rawarawa na ka kecega vua sa vakabauta.

Kemuni na taciqu kei na ganequ lomani, au vakavinavinaka ena madigi meu vosa vei kemuni ena Siga Tabu ni Mate oqo.¹ Na solibula ni isoro kei na Tucaketale i Jisu Karisito sa veisautaka na noda bula yadua me tawamudu. Eda lomani Koya ka sokalou vakavinavinaka Vua kei na Tamada Vakalomalagi.

Ena ono na vula sa oti, eda sa valuta tiko mai matedewa raraba e vuravura. Au qoroya na nomuni valulesu kei na qaqaco vakayalo ni sotavi na mateveitauvi, mate, kei na galili. Au masu vakawasoma, ena ka kece oqo, mo vakila na loloma tawadruka ni Turaga vei kemuni. Ke o a valutalesu na nomu vakatovolei ena kaukauwa vakatisaipeli, na yabaki sa oti a sega ni dodonu me takiveiyaga.

Ena mataka nikua, eda a vakarorogo vei ira na iliuliu ni Lotu era tadu mai na veivanua lelevu kei vuravura. E dina, na veivakalougatataki ni kosipeli sa baleti ira yadua na kawatamata, duivosavosa, kei na tamata. Na Lotu i Jisu Karisito e lotu ni vuravura raraba. O Jisu Karisito e noda iliuliu.

Vinaka vakalevu, na matedewa mada ga a sega ni rawa ni vakabera na toso ki liu ni Nona dina. Na kosipeli i Jisu Karisito sai koya dina na ka e gadrevi ena vuravura oqo ni veilecayaki, veileti, ka luluqa.

Na luve ni Kalou yadua sa nodra na madigi mera rogoca ka ciqoma na itukutuku veivakabulai, ka veivueti i Jisu Karisito. Oqo ga na itukutuku sa bibi cake ki na noda bula marau—nikua ka tawamudu.² Oqo ga na itukutuku e sinai vakalevu tu ena inuinui. Oqo ga na itukutuku e rawa ni tagutuva na veileti ena noda itikotiko raraba.

Na vakabauti Jisu Karisito sa yavu ni vakabauta kecega kei na sala ni kaukauwa vakalou. E kaya na iApositolo o Paula: “Kevaka sa sega na vakabauta sa dredre sara me vinakati keda na [Kalou]: o koya sa torova na Kalou e dodonu me vakabauta ni sa bula ko koya, ni sa saumi ira talega era sa dau vakasaqarai koya.”³

Na veika vinaka kece ni bula—na veimadigi ni kalougata ni veika tawamudu—e tekivu ena vakabauta. Ni da vakatara na Kalou me lewa na noda bula ena tekivu ena vakabauta ni sa lewa me dusimaki keda. Na veivutuni dina e tekivu ena vakabauta na kaukauwa i Jisu Karisito meda savasava, vakabulai, ka qaqaco kina.⁴

“Kakua ni cakitaka na kaukauwa ni Kalou,” a kaya o parofita Moronai, “ni sa cakacaka ena kaukauwa, me vaka na nodra vakabauta na luve ni tamata.”⁵ Ni noda vakabauta sa dolavi kina na kaukauwa ni Kalou ki na noda bula.

Ia, na cakacakataka na vakabauta e rawa ni veiuabaleti. Eso na gauna eda rairai nanuma meda sa daunivakabauta meda ciqoma na kalougata eda gadreva dina tu. Ia, na Turaga sa dau kauta tani na rere oqori ena vosa i parofita Alama mai na iVola i Momani.

Sa kerei keda ga o Alama meda vakatovolea na vosa ka “vakatovotovotaka vakalailai na vakabauta, io, kevaka mada ga [meda] gadreva [meda] vakabauta.”⁶ Na malanivosa “vakalailai na vakabauta” e votuvaka vei au na yalayala vakaivolatabu ni Turaga ni tu vei keda “na vakabauta e vaka na sore ni musita,” ena rawa meda “kaya ki na ulunivanua oqo, Lako tani ki kea; ka na lako tani; a sa sega na ka ena dredre vei kemudou.”⁷

Na Turaga sa kila vinaka tu na noda malumalumu. Eda cala kece ena so na gauna. Ia e kila talega na noda gugumatua qaqa. Na soreni musita e tekivu ka lailai ia e tubu cake me vunikau levu ka vakasova na manumanu vuka e tabana. Na soreni musita e matataka na vakabauta e lailai ka na tubu cake.⁸

Na Turaga e sega ni gadreva na vakabauta e uasivi meda rawata kina na Nona kaukauwa e uasivi . Ia e kerea o Koya meda vakadinata.

Kemuni na taciqu kei na ganequ lomani, au kacivi kemuni ena mataka ni Siga ni Mate oqo me tekivu nikua mo tara cake na nomu vakabauta. Ni ko vakabauta, o Jisu Karisito ena vakatubura na nomuni rawa ni tosoya na ulunivanua ni nomu bula,⁹ dina ga ni nomuni dui ibolebole ena via ka levu vakataka na Mount Everest.

Na nomu ulunivanua e rawa ni nomu galili, vakatitiqa, tauvimate, se lomaleqa tale eso. Na nomu ulunivanua ena duidui, ia na iwali ni nomu ibolebole yadua me levu cake na nomu vakabauta. Mena cakacakataki. Ira na vuli dauvucesa kei na tisaipeli luluqa era na dredre ni rawata na vakabauta lailai.

Me caka na ka vinaka e gadrevi na sasaga. Mo tisaipeli dina i Jisu Karisito o na sega ni vakuwai kina. Mo vakalevutaka nomu vakabauta ka nuitaki Koya e cakacakataki. Meu solia mada e ono na vakatutu me vukea cake nomu vakabauta kei na inuinui o ya.

iMatai, na vuli. Mo dua na dauvuli gumatua. Dromuci iko ena ivolanikalou mo kila vinaka na ilesilesi kei na veiqaravi i Karisito. Mo kila na vunau i Karisito mo kila vinaka na kena kaukauwa ena nomu bula. Tugana na dina ni Veisorovaki i Jisu Karisito ni sa baleti iko. A taura ki Vua na nomu rarawa, nomu cala, nomu malumalumu, kei na nomu ivalavala ca. A sauma na ivoli ni loloma ka vakarautaka na kaukauwa vei iko mo tosoya kina na ulunivanua yadua o na sotava. O na rawata na kaukauwa o ya ena vakabauta, vakanuinui, kei na gagadre mo muri Koya.

Na tosoya na nomu ulunivanua ena gadrevi kina na cakamana. Vulica na veika ni cakamana. Na cakamana e yaco ni ko vakabauta na Turaga. Na usutu ni vakabauta o ya na nuitaka na Nona lewa kei na gauna—na sala kei na gauna e vakalougatataki iko kina ena veivuke ni cakamana o gadreva. Na nomu tawavakabauta ga ena tarova na Kalou me vakalougatataki iko ena cakamana mo tosoya kina na ulunivanua ena nomu bula.¹⁰

Na levu ga ni nomu vulica na iVakabula, na rawarawa mo nuitaka na Nona loloma veivueti, Nona loloma tawayalani, kei na Nona kaukauwa mo qaqaco, vakabulai, ka vueti kina. Na iVakabula sa dau voleka sara ni ko sotava se kabata tiko e dua na ulunivanua ena vakabauta

iKarua, digitaka mo vakabauti Jisu Karisito. Ke o lomataro tiko baleta na Kalou na Tamana kei na Luvena Daulomani, se dina ni Vakalesuimai se na dodonu ni sa kacivi vakalou o Josefa Simici me parofita, digitaka mo vakabauta¹¹ ka yalodina tiko. Mo kauta na nomu taro vua na Turaga kei na ivurevure dina tale eso. Vuli ena gagadre mo vakabauta sega ni nuitaka mo kunea e dua na cicila ena isulu ni bula ni parofita se dua na luluqa ena ivolanikalou. Kakua ni tosoya nomu vakatitiqa ena nomu cakava tiko vata kei ira na dauvakatitiqa. Vakatara vua na Turaga me liutaki iko ena nomu ilakolako ni vaqaqara vakayalo.

iKava, cakacaka ena vakabauta. Na cava beka o na cakava ke levu tu nomu vakabauta? Vakasamataka. Mo vola sara. Mo qai ciqoma vakalevu na vakabauta ni ko cakava na ka e gadrevi vakalevu kina na vakabauta.

iKava, votai ena cakacaka tabu ena kilikili. Na cakacaka vakalotu e tadolava na kaukauwa ni Kalou baleta na nomu bula.¹²

Ka ikalima, kerea vei Tamada Vakalomalagi, ena yaca i Jisu Karisito, mo vukei.

Na vakabauta e cakacakataki. Na ciqomi ni ivakatakila e cakacakataki. Ia “sa rawata ko koya yadua sa kerekere; ka sa kunea ko koya sa vakasaqaqara; ka na dolavi vua sa tukituki.”¹³ Na Kalou e kila na ka me vukea me tubu nomu vakabauta. Kerea, ka qai kerea tale.

O tawavakabauta e na kaya beka ni vakabauta e nodra na malumalumu. Ia na vosa oqo e raibeca na kaukauwa ni vakabauta. A rawa beka vei ira na iApositolo ni iVakabula mera vakavulica tikoga na Nona vunau ni sa mate, ni ra na kune mate kina, ke ra a vakatitiqataki Koya?¹⁴ A rawa beka vei Josefa kei Airame Simici me rau mate ena tutaka na Vakalesuimai ni Lotu ni Turaga vakavo ga rau sa vakadinadinataka sara ni sa ka dina? A rawa beka ki na 2,000 na Yalododonu mera mate ena ilakolako ni painia¹⁵ ke a sega nodra vakabauta na kosipeli i Jisu Karisito sa vakalesuimai? Dina, na vakabauta sa kaukauwa era na rawata kina na luluqa na veika e sega ni rawa.

Kakua ni vakalailaitaka nomu vakabauta sa tiko oqori. E taura na vakabauta mo lewena na Lotu ka yalodina tikoga. E taura na vakabauta mera muri na parofita ka segai na kenadau kei na vakasama kilai levu. E taura na vakabauta mo laki kaulotu ena gauna ni mate raraba. E taura na vakabauta mo bula kilikili tiko ni voqataka tiko o vuravura ni lawa ni tiko savasa ni Kalou sa makawa. E taura na vakabauta me vakavulici na kosipeli vei ira na gone e vuravura. E taura na vakabauta mo kerea me bula e dua na daulomani kei na vakabauta levu mo ciqoma na kena isau rarawa.

Rua na yabaki sa oti, keirau a gole kei Sister Nelson ki Samoa, Tonga, Viti, kei Tahiti. Na veivanua yanuyanu yadua oqo a sotava tiko mai na veisiga taubi ni uca. Era a lolo ka masu na lewenilotu me yaco na nodra soqo e tautuba oqo me taqomaki mai na uca.

E Samoa, Viti, kei Tahiti, ni se qai tekivu ga na soqoni, a mudu na uca. Ia mai Tonga, a sega ni mudu na uca. Ia na 13, 000 na Yalododonu yalodina sa vakaauwa nodra sa mai dabe, ka wawa tu ena taubi ni uca, oti era a qai dabe tiko ena rua na auwa suasua ni soqoni.

Era dabe tu ena tautau ni uca na Yalododonu mai Tonga

Keirau a raica na vakabauta qaqa sa gumatua vei ira yadua na kai yanuyanu—na vakabauta a rawa me tarova na uca kei na vakabauta me vosota tiko ni sega ni mudu na uca.

Na ulunivanua ni noda bula e sega ni dau toso ena sala se gauna eda vinakata kina. Ia na noda vakabauta ena dau tosoi keda ki liu. Na vakabauta ena dau vakatubura noda rawata na kaukauwa vakalou.

Mo kila: ke na ka kece kei na tamata yadua e vuravura o sa nuitaka ena luluqa, o Jisu Karisito kei na Nona Lotu ena sega vakadua ni biuti iko. Na Turaga sa sega ni sosovu, se dau moce.¹⁶ “Sai koyakoya tikoga na Kalou enanoa, na siga edaidai ka sega ni mudu.”¹⁷ Ena sega vakadua ni biuta na Nona veiyalayalati, Nona yalayala,¹⁸ se Nona lomani ira na Nona tamata. E cakamana edaidai ka na cakamana tikoga e ni mataka.¹⁹

Na vakabauti Jisu Karisito sa kaukauwa cecere sa tu me noda ena bula oqo. Sa rawarawa na ka kecega vua sa vakabauta.²⁰

Ni tubu nomu vakabauti Koya ena tosoya na ulunivanua—sega ni veiuluvatu e sauna na vuravura—ia na ulunivanua ni rarawa ni nomu bula. Na nomu vakabauta bulabula ena vukea mo vukica na ibolebole me ka bula ka madigi tawatauvatani rawa.

Ena Siga Tabu ni Mate oqo, ena yaloqu taucoko ni loloma kei na vakavinavinaka, au sa vakadinadinataka ni o Jisu Karisito sa tucake dina tale. Sa tucaketale me liutaka na Nona Lotu. Sa tucaketale me vakalougatataka na nodra bula na luvena kece na Kalou, ena nodra itikotiko cava ga. Ena vakabauti Koya, sa rawa meda tosoya na ulunivanua ena noda bula. Au sa vakadinadinataka ena yaca tabu i Jisu Karisito, emeni.