iTukutuku ni Lotu

Tomani tiko na Toso ni Valetabu

Ena iotioti ni nona vosa ena koniferedi raraba, a kacivaka kina o Peresitedi Russell M. Nelson na ituvatuva me tara e 20 na valetabu vou e vuravura raraba (raica na tabana e 127). Na iwiliwili levu e liu me baleta eso na valetabu a kacivaki ena dua na gauna sa ikoya na 12 na valetabu a kacivaka o Peresitedi Nelson ena 7 ni Okotova, 2018.

A kacivaka o Peresitedi Gordon B. Hinckley na ituvatuva me ra tara e 32 na valetabu vovou ena koniferedi raraba ni Epereli 1998 ia era sega ni tuva na vanua me ra tara kina.

Tekivu mai na gauna a yaco kina me Peresitedi ni Lotu ena 2018, e sa kacivaka oti kina o Peresitedi Nelson na kena tara e 69 na valetabu vou. A kacivaka e 19 na valetabu ena yabaki oya, 16 ena 2019, kei na 14 ena 2020. E 43 na valetabu era sa tara tiko se vakavinakataki tiko ena gauna oqo, ka dina ga ni a matedewa, a caka na vakasobuduru ena 21 na valetabu vou ena 2020. Ena gauna oqo sa kacivaka na Lotu e 251 na valetabu , se tara tiko, se sa veiqaravi tiko.

Me ikuri ni kacivaki ni valetabu, a vakamacalataka o Peresitedi Nelson na va na ituvatuva me baleta na kena dolavi tale na valetabu ni sa seyavu tiko yani na matedewa.