Na Cava sa Cakava na Noda iVakabula ena Vukuda?
Sa cakava oti o Jisu Karisito na veika kece sara e gadrevi ena noda ilakolako ni bula oqo ki na icavacava sa tuvai tu ena Nona ituvatuva na Tamada Vakalomalagi.
Ena dua na soqoni ni bogi ni Vakarauwai ena dua na koniferedi ni iteki ena vuqa na yabaki sa oti, au a sotava kina e dua na marama ka kaya ni ra sa kerei koya eso na nona itokani me lesu tale mai ki lotu ni oti e vuqa na yabaki na nona luluqa tu, ia e sega ni vakasamataka rawa e dua na vuna me lesu mai kina. Meu vakayaloqaqataki koya au a kaya kina, “Ni ko vakasamataka na veika kece sa cakava vei iko na iVakabula, sa levu kina na vuna mo lesu mai ka sokalou ka qaravi Koya.” Au a kurabui ni tukuna mai: “Na cava sa cakava vei au o Koya?”
Na cava beka sa cakava vei keda yadua ko Jisu Karisito? Sa cakava oti o Koya na veika kece sara e gadrevi ena noda ilakolako ni bula oqo ki na icavacava sa tuvai tu ena Nona ituvatuva na Tamada Vakalomalagi. Au na vosa me baleta e va na veika taumada ena ituvatuva oya. Vei ira yadua oqo sa tu me kena itakele na Luvena e Duabau Ga, ko Jisu Karisito. Na kena ivakadei na “loloma ni Kalou sa sovaraki koya yani ki na yalodra na luve ni tamata; o koya, sa ka gadrevi vakalevu duadua kina mai vei ira na ka kecega” (1 Nifai 11:22).
I.
Ni se bera na Sigatabu ni Siganimate, sa kena gauna donu me tukuni taumada na vakaturi cake tale i Jisu Karisito. Na tucake tale mai na mate sai koya na duru veivakadeitaki vakatamata yadua ni noda vakabauta. Sa vakaikuritaka na ibalebale ni noda vakabauta, uqeta na noda itovo, ka inuinui ena noda veisiga ni mataka.
Baleta eda vakabauta na itukutuku ruarua ena iVolatabu kei na iVola i Momani me baleta na tucaketale i Jisu Karisito, eda ciqoma talega na ivakavuvuli vakaivolanikalou e vuqa ni na yaco mai vei keda kece na tamata eda sa mai bula ena vuravura oqo e dua na tucaketale e tautauvata kaya.1 Me vaka e vakavuvulitaka ko Jisu, “niu sa bula koi Au, dou na bula talega vakakina” (Joni 14:19). Ka ra vakavuvulitaka na Nona iApositolo “era na tucake tale ko ira sa mate me ra sega tale ni mate rawa” ia “na yago vuca oqo sa na sega tale ni vuca rawa” (1 Korinica 15:52, 54
Ia na tucaketale sa solia vei keda vakalevu cake mai na veivakadeitaki walega ni tawamate rawa. Sa veisautaka na ivakarau ni noda raica na bula oqo.
Na Tucaketale sa solia vei keda na ivakarau ni rai kei na igu me da vosota na bolebole ni bula oqo ka dau sotava o keda yadua kei ira eda dau lomana. Sa solia vei keda e dua na ivakarau vou me da raica kina na leqa vakayago, ni vakasama, se na leqa e lomada ka da sucu vata kaya mai se qai mai yaco ena bula oqo. Sa solia vei keda na igu me da vosota na rarawa, na druka, kei na veilecayaki. Baleta ni sa vakadeitaki tu vei keda yadua na tucaketale, eda kila ni malumalumu eso ni bula oqo kei na veisaqasaqa era na sega ni tudei.
Sa solia talega vei keda na Tucake tale e dua na ibili kaukauwa me da muria na ivakaro ni Kalou ena noda gauna ni bula oqo. Ni da sa tucake mai na mate ka gole yani ki na noda iOtioti ni Veilewai sa parofisaitaki tu, eda vinakata me da sa vakadonui tu ki na veivakalougatataki digitaki sa yalataki tu vei ira na tamata era sa vakaturi cake.2
Kena ikuri, na yalayala ni rawa ni okati ena Tucaketale e dua na madigi me da laki duavata tale vakamatavuvale—tagane, watina, ira na gone, itubutubu, kei ira na kawa—sa dua na veivakayaloqaqataki kaukauwa me taucoko noda qarava na noda itavi vakamatavuvale ena bula oqo. E vukei keda talega me da bula vata ena veilomani ena bula oqo, ka na solia vei keda na vakacegu ni mate e dua eda dau lomana. Eda kila ni veitawasei ena bula oqo e lekaleka walega, ka da nanamaki tiko ki na dua na veivakaduavatataki rekitaki ena veisiga ni mataka. Na tucake tale e solia vei keda na inuinui kei na igu me da dauvosota ni da wawa voli. Sa vakarautaki keda talega ena yaloqaqa kei na bula dokai me da sotava na noda mate—ia na mate dole sara mada ga.
Na revurevu kece oqo ni Tucaketale era tiki ni imatai ni isaunitaro ki “Na cava sa cakava vei au ko Jisu Karisito?”
II.
E vuqa vei keda, na madigi me da vosoti ena ivalavala ca sai koya na ibalebale levu ni Veisorovaki i Jisu Karisito. Ena sokalou, eda lagata ena vakarokoroko:
A vosota na noda iVakabula ka Dauveivueti na veivakararawataki e sega ni vakasamataki rawa me colata kina na isau ni ivalavala ca ni tamata kecega ena veivutuni. Na isoro oqori e soli kina na ulumatua ni vinaka, na Lami savasava sa sega na kena ca, me baleta na levu ni ca, na ivalavala ca ni vuravura taucoko. Sa dolava na katuba vei keda yadua me da savai mai na noda dui ivalavala ca me rawa kina ni da vakacurumi tale ki na iserau ni Kalou, na Tamada Tawamudu. Na katuba oqo sa tadola tu vei ira kece na luve ni Kalou. Ena sokalou, eda lagata:
Au druka ni siro mai nai itutu sa dokai
Vueta na yalo kaukauwa vaka i au,
Na Nona loloma qai solia mai vei au.4
Na revurevu vakasakiti ka sega ni vakasamataki rawa ni Veisorovaki i Jisu Karisito e yavutaki ena nona loloma na Kalou vei keda yadua. E vakadeitaka na Nona vosa “sa ka talei na yalo ni tamata”—oqori na tamata kece sara—“ena mata ni Kalou” (Vunau kei na Veiyalayalati18:10). E na iVola Tabu, e vakamacalataka na Tamada mai Lomalagi na veivosa oqo ena ivakatautauvata ni loloma “Ni sa lomani ira na kai vuravura vakaoqo na Kalou, me solia kina na Luvena e duabauga sa vakatubura, me kakua ni rusa ko ira yadua era sa vakabauti koya me ra rawata ga na bula tawamudu” (Joni 3:16). Ena ivakatakila ni gauna oqo e kaya kina na noda Dauveivueti, ko Jisu Karisito ena Nona “sa rui lomana vakalevu na vuravura me solia kina na nona bula, me ra yaco rawa kina ko ira era vakabauta me ra luve ni Kalou” (Vunau kei na Veiyalayalati 34:3).
Sa veivakurabuitaki beka, ni mai tini na iVola i Momani, “e dua tale na ivakadinadina kei Karisito,” ena ivakavuvuli ni kevaka me da “vakataucokotaki” ka “vakatabui vei Karisito” sa dodonu me da lomana na Kalou ena [noda] igu, vakasama kei na kaukauwa kecega”? (Moronai 10:32–33). Na Nona ituvatuva ka kena iusutu na loloma sa dodonu me ciqomi ena loloma.
III.
Na cava tale beka sa cakava ena vukuda na noda iVakabula ko Jisu Karisito? Mai na nodra ivakavuvuli na Nona parofita kei na Nona veiqaravi vakataki Koya, a vakavuvulitaka kina vei keda ko Jisu na ituvatuva ni veivakabulai. E okati ena ituvatuva oqo na veibuli, na inaki ni bula, na kena gadrevi na veibasai, kei na isolisoli ni galala ni digidigi. Sa vakavulica talega vei keda o Koya na ivunau kei na veiyalayalati e dodonu me da talairawarawa kina kei na cakacaka vakalotu e dodonu me da sotava me na kauti keda lesu vei rau na noda itubutubu vakalomalagi.
Eda wilika ena iVolatabu, na Nona ivakavuvuli: “Oi au na rarama kei vuravura: ko koya sa muri au ena sega ni lako ena butobuto, ena tu ga vei koya na rarama ni bula” (Joni 8:12). Ena ivakatakila ni gauna oqo eda wilika kina, “Raica, koi Au ko Jisu Karisito, … e dua na rarama ka na sega ni rawa ni vunitaki ena butobuto” (Vunau kei na Veiyalayalati 14:9 Kevaka eda na muria na Nona ivakavuvuli, ena vakararamataka ko Koya na noda sala ena bula oqo ka vakadeitaka na vanua eda na yaco kina ena kena ka tarava.
Ena Nona lomani keda, sa bolei keda kina ko Koya meda raici Koya matua ga, ka kakua e na veika ni vuravura oqo. Ena nona ivunau cecere ni madrai ni bula, e vakavuvulitaka kina ko Jisu me da kakua ni maliwai ira era sa guta vakalevu na veika ni vuravura oqo—na veika ena tokona na bula ena vuravura oqo ia era sega ni tuberi keda ki na bula tawamudu.5 Me vakasa sureti keda tiko e veigauna ko Jisu me da “muri koya.”6
IV.
Kena itinitini, e vakavuvulitaka na iVola i Momani ena Nona Veisorovaki a sotava ko Jisu Karisito “na mosi kei na veivakararawataki kei na veivakatovolei kecega; ia sa yaco na veika oqo me vakayacori kina na vosa sa tukuni ni na colata ko koya na nodra mosi kei na nodra tauvimate na nona tamata” (Alma 7:11).
Na cava me sotava kina na noda iVakabula na veibolebole ni bula oqo “ena kena veimataqali kecega”? E vakamacalataka o Alama, “Ia ena mate ko koya me tasereka kina na ivau ni mate sa vauci ira tu na nona tamata; io sa ciqoma ko koya na nodra malumalumu me vakasinaiti kina na lomana ena loloma cecere me vaka na veika vakayago, me rawa kina ni vakila me vaka na veika vakayago na sala me vukei ira kina na nona tamata me vaka na nodra veimalumalumu” (Alama 7:12
Sa kila tiko na noda iVakabula na noda vakatovolei, na noda veika dredre, na mosi ni yaloda, kei na noda vakararawataki, ni sa sotava kece ko Koya ena lomasoli me vaka ni ra tiki ni Nona Veisorovaki. Era vakadeitaka oqo na veivolanikalou tale eso. E tukuni ena Veiyalayalati Vou “Sa vosota na ka ca ko koya ni sa dauveretaki, sa qai rawata kina me vukei ira era sa dauveretaki” (Iperiu 2:18). E vakavuvulitaka o Aisea, “Kakua ni rere; niu sa tiko vata kei iko: … Au na vakaukauwataki iko; io au na vukei iko” (Aisea 41:10 O ira era sotava na ituvaki oqo e dodonu me ra nanuma tiko ni a sotava talega na iVakabula na mataqali mosi vakaoqo ia mai na Nona Veisorovaki, sa solia kina vei keda ko Koya na kaukauwa me da vorata rawa.
Sa umana vata na Parofita o Josefa Simici na veika kece oqo ena ikatolu ni noda Yavu ni Vakabauta: Ka tolu ni yavu ni vakabauta: “Keimami vakabauta ni na vakabulai na tamata kecega ena Veisorovaki nei Karisito, kevaka eda sa talairawarawa ki na lawa kei na cakacaka vakalotu ni kosipeli”
“Na cava beka sa cakava vei keda o Jisu Karisito?” a taroga na marama oya. Ena ruku ni nona ituvatuva na Tamada Vakalomalagi, a “bulia kina [o Koya] na lomalagi kei na vuravura” (Vunau kei na Veiyalayalati 14:9) me rawa kina vei keda na bula vakayago oqo ka gadrevi me da mai cakacakataka kina na noda icavacava vakalou. Me tiki ni nona ituvatuva na Tamada, na tucaketale nei Jisu Karisito sa vakadrukai kina ko mate ka vakadeitaka vei keda yadua na tawamate rawa. Na isoro ni veivakaduavatataki nei Jisu Karisito sa solia vei keda yadua na madigi me da veivutunitaka na noda ivalavala ca ka lesu yani ena savasava ki na noda itikotiko vakalomalagi. Na Nona ivunau kei na veiyalayalati e vakaraitaka vei keda na sala, ka solia vei keda na Nona matabete na dodonu me caka kina na veicakacaka vakalotu e gadrevi me da yacova rawa kina na icavacava oya. Ka mai sotava kina na noda iVakabula ena lomasoli na veimosi kei na malumalumu vakayago me kila kina na ivakarau me vakaukauwataki keda kina ena noda vakararawataki.
A vakayacora ko Jisu Karsito na veika kece oqo baleta ni lomani keda kece na luvena na Kalou. Na kena usutu taucoko na loloma, a vakatu kina mai na ivakatekivu. Sa tukuna vei keda na Kalou ena ivakatakila ni gauna oqo ni a “bulia … na tagane kei na yalewa, me ucui koya … ka solia vei ira na ivakaro me ra lomani koya ka qaravi koya” (Vunau kei na Veiyalayalati 20:18–19
Au vakadinadinataka na veika kece oqo ka masuta me da na dau nanuma tiko na veika sa vakayacora ena vukuda yadua na noda iVakabula ka da na dau lomana ka qaravi Koya, ena yaca i Jisu Karisito, emeni.