Na mekasini e Sotava na Gagadre e Vuravura Raraba

E tuvai vou me tolu na itukutuku tabaki e vuravura ka tekivu ena Janueri ni 2021, era vakaraitaka tiko na mekasini ni Lotu na itukutuku mai vei ira na iliuliu ni Lotu era “veiganiti ka donuya vinaka ,” me vaka e tukuna o Elder Quentin L. Cook ena Kuoramu ni iApositolo Le Tinikarua. Na mekasini vou me baleti ira na gonelalai, itabagone, kei na uabula “e tiko na nodra kaukauwa vakayalo ka vakaivunau,” e kaya o koya. Na ulutaga e tokona na lewenivuli ni Lako Mai, Mo Muri Au kei na veika bibi tale eso.

“Na mekasini ni Lotu e dua na ivurevure yaga sara ena vulici ni kosipeli i Jisu Karisito kei na vakilai ni lewena na Nona Lotu,” eratou kaya na Mataveiliutaki Taumada ena dua na ivola ka kacivaki kina na mekasini vou. “Sa neitou gagadre ni ra na vakaleweivola na lewenilotu ena veivanua kece ka kidavaka na veivakayarayarataki ni vakabauta veitokoni oqo ki na lomadra kei na nodra itikotiko.”

Na Liaona, me baleti ira na qase; Me iSakisaki ni iTabagone, me baleti ira na itabagone; kei na iTokani, me baleti ira na gone, ena gauna oqo sa rawa kina vei ira:

Na matavuvale ena loma ni 150 na matanitu me tiko vei ira na madigi me ra volayaca ki na mekasini vakatabakidua me baleti ira na gonelalai kei na itabagone.
Mekasini me dau vakarautaki vakawasoma ena so na vanua kei na vosa.
O ira na lewenilotu me ra ciqoma na itukutuku veivakaduavatataki vakaoqo mai na mekasini e vuravura raraba.
Na itukutuku ni mekasini me na dau tiko vagumatua ena ituvatuva vakalivaliva ka tabaki.

Era sa vakauqeti na veiliutaki e veivanua me ra vakarautaki ira na saumaki vou mai ena dua na yabaki dua ki na mekasini e veiganiti kei na nodra yabaki ni bula ka vakarautaka na iTokani se me iSakisaki ni iTabagone kivei ira na gonelalai kei na itabagone era dau lotu ka sega nodra itubutubu.¹