Veikacivi Vou
Elder Paul V. Johnson
Mataveiliutaki ni Vitusagavulu
E dua vei ira na lesoni yaga sara sa vulica o Elder Paul V. Johnson mai na vuqa na yabaki ni nona cakacaka voli ena vuli ena Lotu sa ikoya me baleti ira era maroroya na nodra veiyalayalati, e maroroya na Turaga na Nona iyalayala—se cava ga na bolebole ni bula.
“E dina ni da sotava na veilecayaki ena ituvaki eso ni bula, sa tu vei keda na iyalayala e dina,” e kaya o koya ena dua na gauna qo. “Eda sega ni rawa ni vakatara na veika veilecayaki me kuretaki keda mai na yalayala eso ni Turaga.”1
Nikua, era sotava na luve ni Kalou e dua na mate dewa raraba e vuravura, tawase rua na tamata, kei na kena vakaosoti na biu itukutuku raraba. Ia ni da bulataka na noda veiyalayalati, e kaya o Elder Johnson, na Turaga e solia vei keda na veituberi, kaukauwa, kei na vakacegu.
Ena ika 3 ni Epereli, 2021, a tokoni o Elder Johnson me lewe ni Mataveiliutaki ni Vitusagavulu, ka tekivu ena 1 ni Okosita, 2021. A veiqaravi o Elder Johnson vaka-16 ni Komisina ni iVakarau ni Vuli ni Lotu mai na 2008 ki na 2015, ka tomana tale na itutu oya ena 2019.
A sucu o Paul Vere Johnson ena 24 ni June, 1954, mai Gainesville, Florida, Amerika, vei rau o Vere kei Winefred Johnson. Ni oti nona tubu cake mai Logan, Utah, Amerika, a veiqaravi o koya ena Tabana ni Kaulotu na Norway Oslo. Ni oti nona kaulotu, a vakamautaki Leslie Jill Washburn ena Valetabu e Logan Utah ena 1976. E lewe 9 na luvedrau ka 40 na makubudrau.
A rawata o Elder Johnson e dua na koroi ni bejila ena zoology/botany mai na Brigham Young University ena 1978, e dua na master of education mai BYU ena 1982, kei na dua na doctorate ena instructional technology mai na Utah State University ena 1989.
A vakatavulica na semineri me 12 na yabaki mai Arizona kei Utah ni bera ni cakacaka ena vuqa na veimataqali vakatorocaketaki ni lewenivuli kei na itutu vakaveiliutaki me baleta na iVakarau ni Vuli ni Lotu e Salt Lake City.
A tokoni me lewe ni iMatai ni Kuoramu ni Vitusagavulu o Elder Johnson ena ika 2 ni Epereli, 2005. Sa veiqaravi oti vaka-Vitusagavulu ni iWasewase, daunivukevuke ena mataveiliutaki ni iteki, lewe ni matabose e cake, bisopi, ka peresitedi ni Cauravou ena tabanalevu.