Itulau i le lotoifale
A Uma le Tofotofoga o le a Faamanuiaina i tatou
Ina ua faato’ā vaai le au Makani o tu [le fale] i totonu o eka o laau paina i luga o le Motu matagofie o Kagalū, na lā’ua iloa e tatau ona la faatauina le fale malōlō. Sa vaai faalemafaufau Ivona ma Tavita Sanetelina Makani i malologa iinei ma le la fanau e toalima, faapea tolauapiga a talavou mo le latou siteki i Le Ekalesia a Iesu Keriso o le Au Paia o Aso e Gata Ai.
I tausaga talu mai lena taimi, sa taunuu uma a lā’ua miti. Sa tatala ma le agalelei e le au Makani lo la fale i uo ma vaega o talavou a le Ekalesia, o e na i ai ni manatuaga matagofie o lo latou nonofo ai iina—vaai ai i le alu ifo o le la a o siosiomia e kagalū, ualapī, ma posami, ma iloa atu koala o loo faapupuu i lālā o laau iukalipi.
Ona tupu lea o se faalavelave matu’iā. I le aso 31 o Tesema 2019, sa ufitia e afi le luavaetolu o le Motu o Kagalū, maimau ai ola, ma faatamaia fale, e aofia ai ma le fale o Makani.
Sa lofituina Tavita ma Ivona. I ni nai minute, sa mu i le palapala lo la malutaga—o se sulufa’iga mo aiga ma uo.
Ua avea nei o se faaputuga o lapisi femilosa’i solo. O le la tane vai ua liusuavai, ma le mea e sili ona faanoanoa ai, sa faatama’ia ai ma le piano tele a le la tināmatua, lea sa a’oa’o ai uma lava le ta piano a le la fanau.
A o feagai le aiga ma le taliaina o le to’esea o a latou meatotino, sa tatalo Tavita i le Tama Faalelagi: “O fea o le a aga’i i ai mai ii? O le a le faamoemoega i tua mai o lenei mea? O le a lava le mea e te finagalo ma te faia o le a ma faia.”
O se vavega lava, sa tu pea lo la fale sele manu! Sa teu ai le la palau, lea sa manaomia e Tavita e kilia ai le nofoaga. I so la toomaga tele, o le fanua sa sosoo atu—lea e nonofo ai matua o Tavita—sa faapea ona faasaoina foi, e ui lava sa siomia e le afi.
O se isi tama’i vavega sa tupu i le lua masina i luma atu, ina ua maua e Ivona se musumusuga malosi lava e totogi le inisiua mo le la fanua. Sa le mautonu ai Tavita, aua sa leai ma se tasi o le 15 kamupani inisiua sa ia faafesoota’ia sa manao e inisiuaina i lā’ua. Sa tatalo o ia, “Tama Faalelagi, afai e tatau ona inisiua lo ma fale, faamolemole fesoasoani mai ia te a’u ia maua se kamupani inisiua.” O le kamupani lava no sosoo ona valaau i ai sa malie e inisiuaina le fanua mo se vaega o lona tau.
Ina ua mavae ia afi, sa matuā sasaa mai le alofa mo tagatanuu o le Motu o Kagalū. Sa auina mai e tagata mea faigaluega, lavalava ma moega, ma sa fesoasoani tagata o le Uarota o Kafiviu a le aiga o Makani i le aiga e toe fausia ma faa’oaina la latou sapalai o meaai mo le tausaga e tasi.
Sa amata e le Motu o Kagalū se malaga o le toe faaleleia, lea sa aofia ai ma se galuega faagauloto o le faamamaina o le lapisi ma taumafaiga e laveai manu o le vaomatua. Ae mulimuli ane, sa vave ona fuga mai le laueleele.
Sa ufitia le fanua o Makani i se moana o fugalaau samasama o le daisy, faatasi ai ma poppy mumu ma isi fugalaau sa latou le i vaai muamua i ai iina. E foliga mai o se faailoga o se amataga fou, ma sa fuafua le au Makani faapea—e ui lava e le i mafai lava ona la gafatia—o le a lā’ua toe fausiaina.
Sa faaauau pea faamanuiaga. Sa iloa e Tavita se tagata o le sa mana’o e foa’i le fogafale lua atoa lava o lona fale—o le tino o le fale, faamalama, faitotoa, ma keipo—i soo se tasi na te aveesea ae toe fausia se fogafale fou mo ia. Faatasi ai ma se vaega fiafia o uso fesoasoani, sa amata galue ai Tavita ma, ina ua mavae se vaiaso, sa ia mauaina mea faufale uma mo lona lava fale.
Sa ia maua mai isi mea faufale faaopoopo mai faatautu’i mo se vaega o o latou tau e faatau ai ma sa tele le oneone ma le maau’amea i luga o le fanua e fai ai simā mo ana faavae.
Sa i ai se tusiata fale agalelei i le Motu o Kagalū sa foai fua atu lona taimi e tusi ai mamanu mo fale fou o le au Makani ma isi o e na faatama’ia o latou fale i le afi. Ona, faatasi ai ma le fesoasoani poto faapitoa a se faufale litaea, o Uso Ioane Uini, faatasi ai ma ana uo faufale e toatolu, sa amata loa e le aiga ona toe fausiaina lo latou fale.
Sa latou galulue ma le le faavaivai mo le tolu vaiaso o o latou aso malolo o le taumafanafana, faafaigaluegaina tagata o aiga lautele e fesoasoani i le taimi o le Eseta, ma o lea la ua oo le la fale i le tulaga ua mafai ona loka.
A o tomanatu Ivona na ia faapea mai, “E tutupu mea uma lava mo se mafuaaga. Tatou te iloa atu a o tatou feagai ma taimi faigata.”
“Faatuatua i le Atua e tusa lava pe e te le iloa pe aisea,” o le faaopoopo lea a Tavita. “Ua fesoasoani ia te a’u e malamalama i le faanoanoa i se i si auala, ma maua le lagona alofa mo isi . . . i le tutupu ai o mea leaga, ae a tatou faatuatua, o le a oo mai ai lava le lelei.”
E le toe umi ae toe tofo o latou aiga ma uo i le toafilemu o lo latou fale i le Motu o Kagalū.