Ua Manatua e Polenisia Falani Tuaa Peleina i le Aso ‘O le Au Paia Uma’

Potu o Tala Fou

I tausaga uma i le Aso O le Au Paia Uma (La Toussaint) i le aso 1 o Novema ma le Aso o e ua Maliliu i le aso 2 o Novema, e tuuto atu ai le taimi o Polenisia Falani ma faapitoa le faaeteete e faamatagofie ai tuugamau o o latou aiga pele ua maliliu.

O tagata O Le Ekalesia a Iesu Keriso o le Au Paia o Aso e Gata Ai e faaauaua pea lea aganuu o le manatuaina o aiga pele ua maliliu.

O le toefaafou, toevali, faamamā ma le teuteuina o tuugamau o ni vaega ia o lenei aganuu o le faamamaluina o e ua maliliu. O teu fugalaau e faamatagofieina atili ma avatu i ai le felanulanua’i ma le ola.

Ma le mea mulimuli, e faia le faaaloalo i le taimi o le “Turamara’a,” o le faamalamalamaina lea o tuugamau i le afiafi o Novema 1, e aofia ai le fefaasoaa’i o manatuaga ma le fiafia faatasi ai ma aiga i tafatafa o tuugamau.

I Polenisia, o le “Aso mo e ua Maliliu” ua sili atu ona tiga i lenei tausaga i le 636 tagata o e na maliliu i le taimi o le faama’i o le Koviti-19. Sa faatinoina e le atunuu se minute o le filemu e faaaloalogia ai i latou i le aso Lua, Novema 2 i le 10:30 i le taeao.

E talanoa tagata o le Ekalesia e uiga i le auala e aumaia ai e lenei fiafia faamanatu ia aiga ia latalata atu i o latou tuaa ua maliliu ae faapea foi ia Iesu Keriso, o le Faaola o le lalolagi.

Sa faapea mai ia Toriki Chung Tien, 16, mai Tubuai, “Sa ma valiina ma lo’u uso laitiiti le fale o le tuugamau o le ma tamāmatua ma fesoasoani i le ma tinā e teuteu lona tuugamau ma le mitamita ma le olioli. O taimi uma matou te talanoa ai e uiga ia te ia ma faamanuiaga sa ia faia, sa ou lagonaina lona faatasi mai ma maligi ai o’u loimata. Faafetai i le Talalelei ma le toetu, ou te iloa e i ai le aso o le a matou feiloai ai o se aiga ma o le a ou toe mauaina lo’u tamāmatua o le e ese lo’u misia tele.”

Fai mai Kamihiria Teriitemoehaa, 13, mai Punaauia i le motu o Tahiti, “O tausaga uma, matou te faamamaina le fanuatanu. E mafai ai ona ou le faagaloina o matou aiga ua maliliu a o ou faalogo i tagata o aiga o faasoa mai tala e uiga ia i latou. Na ou iloa o nei taimi e matua faamafanafana loto ma malie. I tua mai o le Aso O Le Au Paia Uma, ua ia te a’u le faamanuiaga o le faamamaluina o o’u tuaa ua maliliu e ala i le faia o o latou sauniga i le maota paia o le Atua. Ou te le malamalama i mea uma, ae ou te iloa e taua ia te a’u ma lo’u aiga. Ou te iloa foi ona o Iesu Keriso, e mafai ona faavavau aiga.”

O Mehiti Rima, 26, mai Avera i le motu o Raiatea, o loo lotomomomo lava i soo se taimi e mafaufau ai i lona tamā o le sa maliu i le 10 tausaga talu ai. “Ou te mauaina lo’u malosi mai ia Keriso ae faapea foi mai i lenei faaupuga lea e lagonaina i lo’u fatu ma fesoasoani ai ou te gafatia le toesea o lo’u tamā: ‘Ona o loo i ai se tasi tatou te alolofa i ai i le lagi, o loo i ai foi sina vaega o le lagi i totonu o o tatou aiga.’”

“E lata mai nei sa toesea ai lo’u tina, o se tamaitai e maoae le faatuatua o le sa le faavaivai lava i le aoaoina o a’u i le talalelei,” sa fai mai ai Teuruhei Lin Sin, o se tina e toalua sana fanau mai Papeete, Tahiti. “Faafetai ia te ia, sa ou mauaina la’u molimau ma sa faamauina a’u ma lo’u aiga i le malumalu. Ou te iloa o le a ou toe vaai ia te ia. O le mea lea ou te fiafia tele ai i lenei Talalelei. Ua valaauina i tatou uma e le Ekalesia e faamanatu le Aso o e ua Maliliu e ala i le liliu atu o o tatou loto i le Faaola e maua ai le faamoemoe ma le mafanafana. O i latou ua tuua i tatou ua o atu i le isi itu o le veli. A oo mai le taimi, o le a tatou toe vaai i e pele ia i tatou.”

Na faapea mai Avearii Teriihaunui mai Avera i le motu o Raiatea, “Matou te misia lo’u tamā lea na maliu i le lua masina talu ai. Sa ia tuua se talatuu o le faatuatua, auauna atu ma le onosai. Sa alofa ma le loto atoa i le Atua ma le Faaola. Sa auauna ma le alofa i lona aiga ina ia le mativa lava matou i se mea, faaleagaga ma faaletino. Sa le faavaivai e auauna atu i tagata o le uarota ma le siteki. Sa ia faasino mai ia i matou le ala a le Faaola ma le auala e mulimuli ai.”

“Ou te faafetai mo lo’u tamāmatua aua na ia a’oa’o ia te a’u le tāua o le galue malosi,” fai mai ai Viritahi Roi, o se talavou matua mai Paea. “E matuā ou misia lava o ia. Ou te faafetai i malumalu ua tuu mai e le Alii i lenei lalolagi ina ia mafai ai ona ou lagonaina le faatasi mai [o lo’u tamāmatua] ma i se tasi aso e mafai ona ou toe foi atu ia te ia.”

Na faapea mai Narii Pou, o se alii talavou mai Papeari, “Ou te faafetai mo Lana fuafuaga o le fiafia lea e aumaia ia te a’u le faamoemoe ma le mautinoa e i ai le aso o le a ou toe vaai ai i lo’u tamā o lē sa maliu a o o’u laitiiti. Sa fiafia tele i auaunaga ma le faasoa atu o le olioli o le Talalelei ia i latou e latalata ia te ia, na te le i fai atu lava leai i le auauna atu i se tagata vaivai, ma o lea sa valaau ai o ia “o le matagofie” i totonu o le matou siteki.”

“I le Aso O Le Au Paia Uma, ou te lagona le faanoanoa e mafaufau i lo’u uso ma lo’u tamā, ae faafetai ia Keriso ma lana Togiola, ua mafai ona aveesea lo’u faanoanoa,” ua faamatala mai ai Rani Maere, mai Faaa.

O Roger Chung Tien o se tamāmatua mai Tubuai i le atumotu o Austral. Fai mai o ia, “O le faamamaina o le tuugamau o lo’u papa e toe aumaia ai le tele o manatuaga ia te a’u. Ou te misia o ia ae ou te iloa o loo soifua o ia i totonu ia te a’u e ala i a’oa’oga malolosi sa ia a’oa’o ai a’u. Ou te faafetai ma faamanuiaina i le iloa o le a ou toe vaai ia te ia faatasi ma lo tatou Tama Faalelagi ma Lona alo o Iesu Keriso e ala i le toetutū.”

E maua e le Au Paia o Aso e Gata Ai le mafanafana i le mau i le Feagaiga Fou: “E fa’apei ‘ona oti uma ia Atamu, e fa’apea fo’i ‘ona toe fa’aolaina uma ‘iā Keriso” (1 Korinito 15:22).