Itulau i le lotoifale

Ua Saunoa Atu Elder Nattress i le Silia ma le Afe Talavou i Amerika Samoa

Potu o Tala Fou

E silia ma le afe tagata talavou sa matuā faatumulia le Nofoaga Autu o le Siteki a Pago Pago Central i le afiafi o le Aso Sa, 7 Novema, e faalogologo i le ta’ita’i asiasi atu o le Ekalesia, o Elder K. Brett Nattress.

O Elder Nattress o le Fesoasoani Muamua i le Au Peresitene i le Eria a le Pasefika O Le Ekalesia a Iesu Keriso o le Au Paia o Aso e Gata Ai.

Sa saunoa foi Elder Faapito Auapa’au, Fitugafulu Eria, i le faigalotu a le autalavou.

Na o mai tagata talavou mai aulotu i le motu atoa i siteki e lima i Amerika Samoa.

Na saunoa atu Elder Nattress faapea, “Ua tuuina mai e Peresitene Nelson fautuaga faaperofeta i le lalolagi i nei taimi faigata. E tatau ona tatou faatuatua ia Iesu Keriso. Ma, e tatau ona tatou manatua pea lo tatou faasinomaga o ni atalii ma ni afafine o le Atua, ma lo tatou faamoemoega paia na tofia mai.”

Sa ia faaauau ai: “Na tuuina mai e le autalavou i le faigalotu ni manatu musuia. O i latou o le lumanai o le Ekalesia. O se faamanuiaga maoa’e le fautua atu i ai ma a’oa’o mai ia i latou. E malosi lo latou faatuatua ia Iesu Keriso ma e susulu malosi lo latou lumanai.”

Na faapea mai se tasi o ta’ita’i sa auai, “Sa lā’ua faatumauina le fiafia ato’atoa o nei tagata talavou mo le silia ma le itula ma le afa, ma a’oa’o atu ia i latou mataupu faavae o le talalelei e ala i a’oa’oga a le Peresitene o le Ekalesia o Russell M. Nelson ma sui o le Korama a Aposetolo e Toasefululua.”

Na faapea mai se tasi alii talavou mai le Uarota o Malaeimi sa ia a’oa’oina faapea “o le auala i le Malo o le Atua e ala i le Malumalu Paia.”

Fai mai se tamaitai talavou mai le Siteki a Pago Pago Sisifo, “O le lototatalo ma le lagona o le agaga o le Alii, e mafai ona ootia ai a’u e iloa e i ai pea Iesu iina mo a’u.”

O se polokalama sa maoa’e le fegalegalea’i, a o savali solo Elder Nattress i le fale taalo e faafofoga i tali mai le autalavou a o ia fesili atu ia i latou fesili e uiga i le auala o loo latou tuu ai le Faaola i le totonugalemu o o latou olaga.