Talafaasolopito o Aiga
O Elisapeta Ana Butler ma le Aualofa i Victoria, Ausetalia
Na soifua mai Elisapeta Ana Butler i le aso 10 Me 1846 i Norfolk, Egelani, ae faato’ā 16 tausaga talu ona faatulaga Le Ekalesia a Iesu Keriso o le Au Paia o Aso e Gata Ai e le perofeta o Iosefa Samita I Feieti, Niu Ioka.
I le pōpōfou o le 1850, sa auai le aiga o Elisapeta i le tilitilialu o tagata fai mai e 90,000 i le sailiga o le auro i Victoria, Ausetalia. Sa latou faamautū e lata i Bendigo i le 1853, ae faato’ā fitu tausaga o Elisapeta.
Ae faanoanoa, ona e le’i manuia le tilitilialu mai o lona aiga i le sailiga o le auro. E oo ane i le taimi ua matua Elisapeta, ua taufai tuua e ona matua le aiga. Sa tele ina tausia o ia e le uso o lona tama, sa le mafai ona alu i le a’oga ma sa tele ina uumi taimi e faigaluega ai i lana faatoaga.
Sa faaipoipo atu Elisapeta i se faifaatoaga Saina peitai na tosina atu foi o ia i le sailiga auro ma tuua ai na o ia e tausia le la fanau e toavalu i le na o se tomai e tapena fale ma le su’isu’i. O ni taimi sa faigata.
E ui ina le iloa tusitusi ma faitautusi, ae sa iloa e Elisapeta le tāua o le a’otauina ma sa ia maua ni auala fatufatu e a’oa’o ai. Sa naunau o ia e avatu i lana fanau ni avanoa sili atu e faaeaea ai i latou lava nai lo le mea sa ia maua. Mo se faataitaiga, sa ia faatonu lana fanau tama laiti e faitau atu ia te ia le nusipepa i aso taitasi, ma e oo atu i le taimi na amata ai a latou aoga, ua lelei a latou faitautusi.
I le 53 o ona tausaga, sa pu’emau ai e Elisapeta se isi avanoa e aoao ai.
Sa la savavali atu ma lana tama teine o Jessie i le alatele i Bendigo, ae faailoa ane e se tamaloa sa fai sona ofutele mafiafia ma se pulou o ia o se faifeautalai mai Le Ekalesia a Iesu Keriso o le Au Paia o Aso e Gata Ai. Sa ia ofo ane ia la’ua se tusi ma fai atu, o le a aoao atu ai ia te i la’ua le fuafuaga a le Atua mo Ana fanau. E masani ona taliaina fiafia e Elisapeta ni tusi e maua fua, ae o le tusi lea o le a suia ai o la’ua olaga.
I lena po atoa, na faitau ai e Jessie le Tusi a Mamona i lona tina, ma sa faamautu e le Agaga Paia ia i la’ua e moni lea tusi.
Sa papatisoina Elisapeta ma le toatolu o lana fanau i le aso 2 Fepuari 1902. I nai tausaga mulimuli ane, sa papatiso ai fanau tama e toalua a lana fanau.
Na iu ina masii le aiga i Melepone, lea sa fesoota’i ai ma isi tagata o Le Ekalesia. Sa o se lagi mo i latou le mi ō faatasi ma tagata e tutusa mafaufauga. Sa faapitoa ona ootia Elisapeta i le faafeiloaiga mafanafana na latou maua mai tuafafine, o e sa tatala atu o latou fale mo sauniga o le Aso Sa ma saunia ai ma le limafoai ni taumafataga.
E ui ina sa lei faatulagaina i latou o se vaega o le faalapotopotoga aloaia a le Aualofa i lena taimi, ae sa galulue faatasi tuafafine e kuka, suisui, ma faamaopoopo taumafaiga faasu’etupe mo se falesa fou. Sa lagonaina e Elisapeta se mafutaga ma nei tamaitai na te le i iloaina muamua.
O le taimi lea, na pa mai ai le Taua Muamua a le Lalolagi. Ina ia fesoasoani e faafesootai tamaitai o le tasi ma le isi i lena taimi faigata, sa lolomiina e le Ekalesia lana Mekasini a le Aualofa, lea na avea ma punaoa tāua mo tuafafine i Melepone. Sa latou talanoaina ona tusiga, solo ma tala a o latou faapotopoto e su’i ia totini ma sauniuni ia afifi mo fitafita i Europa ma Sasae Tutotonu.
Sa lesitala fanau tama e toalua a le fanau a Elisapeta e tautua i le taua. Sa lesitala foi lana tama tama o Horasi, ma sa auina atu i Sasae Tutotonu o se vaega o le vaegaau o le Light Horse a Ausetalia.
Sa faaitiitia le auai i Lotu ona sa toatele atu le usoga na tofia i tiute faamiliteli. E le i pine, ae tuu i fafine—Elisapeta ma ana uo—e faamaopoopoa la latou tama’i paranesi. Sa naunau tamaitai ia latou sauniga faalevaiaso mo le faafouga faaleagaga ma le faagaeetiaina faaleagafesootai ma faaletagata lava ia.
E oo ane i le faaiuga o le taua, toetoe o aiga uma i la latou eria na maliu se uso, se tane, se atalii po o se atalii o se atalii. Mo Elisapeta o le atalii o lana tama tama, o Viliamu Ualesi Cameron Butler na maliu i le Taua a Fomeli. Sa atili faatupula’ia le malosi o le mafutaga a tamaitai i le paranesi a o latou felagolagoma’i o le tasi ma le isi i loto momomo. Ona toe amata lea ona latou toe fausia o latou olaga.
Sa tofia Peresitene Arnold Miller e taitai le Konafesi a Victoria—lea ua faaigoa nei o se itu. O se tasi o ana uluai faamoemoega o le lagolago atu lea i le faatulagaina aloaia o le Aualofa i Ausetalia, i lalo o le taitaiga a le perisitua.
O le uluai sauniga a le Aualofa i Ausetalia sa faia i Victoria I le aso 15 Iulai 1921. E oo atu i le 1923, o Elisapeta sa i ai i le 22 o tamaitai na lesitala i le Aualofa a le Paranesi a Melepone. O ni taimi fiafia nei sa mafai ai e tamaitai ona faamalolosia ma lagona le faamalolosiaina.
I se taimi mulimuli ane i le olaga, sa musu Elisapeta e talanoa i lana fanau e uiga i lona laitiiti—e faanoanoa tele lona tala ina faamatalaina, o lana tala lea. Ae, o le fatu o le faatuatua na ia faatagaina e toto i lona loto ua tupuolaola e le mafuatiaina. I lona lalolagi, o e na tupuga mai ia te ia na faatuina e Elisapeta se faataitaiga, na malolosi i uarota ma siteki, ma fauina ma le faatuatua le Ekalesia i soo se mea e nonofo ai.
E ala mai i matatioata o le soifua o lenei tamaitai lotomaualalo, e mafai ai ona tatou toe tilotilo i le amataga o le faalapotopotoga o le Aualofa i Ausetalia ma iloa ai e ala atu i lana talatuu lona faamoemoega moni: ia saunia tamaitai mo faamanuiaga o le ola e faavavau, ia faamalolosia tagata taitasi ma aiga ma ia lotogatasi i se taumafaiga e fesoasoani ia i latou e manaomia le fesoasoani.