Itulau i le lotoifale
Ua Faamamaluina e se Tusiata Māori Aiga i le Faaaliga
Ua faaalia faalauaitele e se tagatanuu Māori o le Au Paia o Aso e Gata Ai ma Faganui lana uluai faaaliga o faatufugaga faaagaifanua Māori na musuia i tulaga faatauaina faaleaiga.
Ua faaalia faalauaitele e se tagatanuu e 52-tausaga-le matua o Polika Anderson o Faganui lana uluai faaaliga o faatufugaga e aofia ai tukutuku (ata teomateri faaagaifanua) faa-Māori ua i ai faatasi ma tulaga faatauaina mai le “O Le Aiga: O Se Folafolaga i le Lalolagi,” o se faamatalaga aloaia mai Le Ekalesia a Iesu Keriso o le Au Paia o Aso e Gata Ai.
O le faaaliga a Anderson ua faaigoaina o le “Ngā tukutuku o te kāinga,” (O le aiga o tukutuku) na tatalaina i le Space Gallery i Faganui i le aso 1 Tesema, ma o le a oo atu i le aso 18 Tesema.
O ata a Anderson o se mea ua ia manatu e “faavae i le faatuatua.” Na ia ta’ua le peresitene ua mavae atu o le Ekalesia o Polika Iaga, o le sa aoao maia le mataupu faavae e faapea, e mafai ona maua i mea uma le upumoni, e aofia ai foi i faatufugaga ma aganuu. Fai mai a ia o tulaga faatauaina o le aiga ma le upumoni i le aganuu a Māori e tali pei foi o mea o loo maua i le talalelei, o lea la o le aofia ai foi o na mea e lua i ana tusigāata e tāua foi ia te ia.
“E tele mea e tutusa ai tagata uma ma tapuaiga, e tele atu mea tatou te tutusa ai nai lo eseesega, ma ou te faamoemoe e mafai i a’u fuati ona faafesoota’ia nisi o na āva,” na saunoa ai Anderson. Ua ia faamoemoe e mafai e ana atavali ona avea o se faamanatu ia ola i le talalelei a Iesu Keriso.
E ui e le o tuuto lona taimi atoa o se tusiata, ae na amata e Anderson ona taulai atili atu se taimi i ana tusigaata i le taimi o le faama’i oti, lea na oo ai ina ia fatuina ni atavali e fatufatu ai tala tukutuku e faatusa i mataupu faavae ma tulaga faatauaina mai le “O Le Aiga: O Se Folafolaga i le Lalolagi.”
Pe a vaai tagata i nei atavali, e faamoemoe Anderson e tata’i atu ai le tagata matamata e tomanatu i le mea o latou i ai i le olaga ma pe o a foi tulaga faalelei e mafai ona latou faia e tusa ai ma a latou lava sootaga faaleaiga ma le faatuatua.
I le iva o folasaga o tukutuku i le faaaliga, na patino lona faamamafaina o nei mataupu faavae mo aiga: faatuatua, tatalo, salamo, faamagalo atu, faaaloalo, agaalofa, galulue ma fiafia faatasi.
O itula o sailiiliga ma le fuafuaina na alu i le mamanuina, teuteuina ma le pikiina o faatusa sa ia faaaogaina i atavali taitasi e tosi mai ai lona tala. O lanu, foliga, laina, ma upu faa- Māori sa ia faaaogaina e ta’u mai ai mataupu taitasi, e tofu uma ma se mafuaaga faapitoa na ala ai ona ia filifilia.
I le atavali o le folasaga o le faatuatua, sa ia faaaofia ai le upu “rongo” i le pito i lalo, lea o loo faamatala ai le fa o sane e lima, ae le o aofia ai le vaaiga. I le i ai o le tosinaga faateleina o faasalalauga faaagafesootai, fai mai Anderson ua toatele naua ua faalagolago i le vaai ina ia talitonu ai, ae e le o le ala lena e galue ai le faatuatua. Sa ia faaaoga le upu “rongo” e pu’e ai ma faafaatusa le manatu o le le manaomia ona vaai, ae ia faaaoga le faatuatua. “O le upu rongo e mafai foi ona faauiga faapea o le filemu, aemaise le mae’a ai o se taimi luitau i o tatou olaga. O le talalelei a Iesu Keriso e aumaia lena filemu,” na ia saunoa ai.
O le folasaga ua faaulutala o le “Inoi,” ua tosi mai ai le mataupu faavae o le tatalo. Sa ia faaaogaina le lanumoana e faamatala mai ai le Tama Faalelagi aua “o se lanu toafimalie.” O upu na valiina e Anderson o lona uiga ia valaau atu i le Tama Faalelagi a o siepi, o loo faamatala ai se tasi o tatalo ma le tuuina mai e le Atua o faamanuiaga i o latou luga. Fai mai Anderson, o lenei atavali, e faatusa po o le a lava le mamao e saili ai e se tagata le malamalama, o le tele foi lea ona tuuina mai e le Atua ia i latou aua “o mea uma e faia e le Tama Faalelagi, e mo lo tatou manuia.”
Sa faavae e Anderson folasaga o le faamagalo atu “Muru” i se saunoaga a James E. Faust, se taitai sa i ai o le Ekalesia. I lea saunoaga, sa faamatala ai e Faust se tala matautia e uiga i se vaega o tagata Amish, o e sa faamagaloina ma auauna atu i le aiga o se tasi sa fasiotia ni tamaiti Amish e toatele. Fai mai Anderson o lena tala o le faamagalo atu na musuia ai o ia, e fatu ni siepi e foliga i ‘alu papae i le pito i luga o galufati, e talitutusa ma le tāua o le faamagalo atu ma le agai i luma.
“Afai e te le faamagalo atu, e mafai ona e afaina i galufati, ma e mafai ona e malemo ai, ‘ae ‘ā ‘ē faamagalo atu e te agai i luma i le vai e sili ona toafimalie, ma malū,” o lana tala lea.
E matua’i maopo lelei lanu, siepi ma laina o ana tusigaata, ma e toatele i le taimi muamua na manatu ai e faatekinolosi ana atatusi ma na lolomi. Ae o fasi fuati taitasi o le faaaliga na ia valiina i le vali ie. Fai mai a ia o le maopo o vali na maua mai i lana aganuu lea na ia muai lalagaina ai le folasaga tukutuku mai le laufasa. Afai e le i sa’o ona faia se tasi vaega, latou te ‘oti’eseina le laufasa ae toe amata atoa.