Itulau i le lotoifale
Tusitala Papua Niu Kini Ua A’oa’o E Uiga i Talitonuga Faavae o le Ekalesia
Ua latou talanoaina foi lo matou malumalu fou ma a matou taumafaiga i le Kerisimasi e “Faamalamalama le Lalolagi”.
Sa fono le au tusitala o televise, leitio ma nusipepa ma taitai o Le Ekalesia a Iesu Keriso o le Au Paia o Aso e Gata Ai i Port Moresby, Papua Niu Kini i le amataga o Tesem, 2021.
I le taimi o le fonotaga na faamatala aotele ai e taitai o le Ekalesia i le au faasalalau, e uiga i le Ekalesia i Papua Niu Kini, e aofia ai ona tagata auai (31,000) ma aulotu e (81).
O isi mataupu na talanoaina e aofia ai galuega alofa fesoasoani a le Ekalesia, a’oga ma taumafaiga mo le ola tutoatasi, faapea foi le faasilasilaga i le 2019 o se malumalu o le a fauina i Port Moresby i tausaga o i luma.
Sa fesili le au tusitala e faamanino mai le eseesega o falelotu masani o le Au Paia o Aso e Gata Ai mo sauniga tapuai i Aso Sa ma malumalu ua faaagaga mo sauniga aupito maualuluga o lo tatou faatuatuaga.
I totonu o malumalu, e faaloloto ai e le au tapuai lo latou malamalama i le fuafuaga a le Atua mo Ana fanau ma le talalelei a Iesu Keriso. Latou te auai foi i le faatinoga o sauniga e tuufaatasia ai aiga mo le faavavau.
Sa faasoa atu foi e sui o le Ekalesia ni faamatalaga i le au tusitala e uiga i le taumafaiga mo le Kerisimasi e “Faamalamalama le Lalolagi” lea na faalauiloa i televise, leitio, nusipepa ma luga o upega tafailagi.
O le tausaga na tea nei, o le autu o le, “Faamalamalama le Lalolagi i le Alofa”. O punaoa i upega tafailagi na aofia ai vitio ma kalena o auaunaga i aso taitasi ia na ofo atu ai ni fautuaga i ala e mafai ai e tagata matutua ma tamaiti ona faatino se galuega agalelei mo se tasi i aso taitasi seia oo i le Aso o le Kerisimasi.