Մորմոնի Գրքի իմ պատասխանը

Էնի Վոնգ, Հոնգ Կոնգ, Չինաստան

Ես շատ փորձեցի «դեպի լավը փոխել» Մամա Վոնգի վերաբերմունքը, բայց նրան միայն Աստծո պարզ, հզոր խոսքն էր պետք:

2002 թ.-ի հունիսին մկրտվելուց հետո ես իմ հավատքով կիսվեցի մորս հետ: Թեև Մամա Վոնգը հաճախ էր ինձ հետ եկեղեցի գալիս, նա չցանկացավ ավելին իմանալ:

Ի վերջո, 10 տարի անց, Մամա Վոնգը որոշեց մկրտվել: Ես շատ ոգևորված էի։ Ցավոք, մի քանի տարի անց նա դադարեց ամրապնդել իր վկայությունը և պատրվակներ գտնել եկեղեցի չհաճախելու համար:

Ես հորդորեցի նրան գալ եկեղեցի, բայց դա միայն վեճ առաջացրեց: Ի վերջո, ես դադարեցի քաջալերել կամ ճնշել նրան, որպեսզի չվնասեմ մեր հարաբերությունները:

2019 թվականի հոկտեմբերի գերագույն համաժողովի ժամանակ Նախագահ Ռասսել Մ. Նելսոնը հրավիրեց Եկեղեցու անդամներին «կազմել [մեր] սեփական ծրագիրը»՝ ամրացնելով Վերականգնման մասին մեր վկայությունը:¹ Երբ մտածում էի նրա հրավերի մասին, ես խորապես զգացի, որ պետք է ինչ-որ բան անեմ, որպեսզի իմ և Մամա Վոնգի հարաբերությունները լավանան:

Նոր տարվա իմ որոշման համար ես պարտավորվեցի կարդալ Մորմոնի Գիրքը Մամա Վոնգի հետ: Ամեն անգամ, երբ նա ասում էր, որ իր աչքերը ցավում են, ես ասում էի. «Դու կարող ես պարզապես լսել»: Երբ նա ասաց, որ պետք է ամանները լվանա, ես նրա հետևից գնացի խոհանոց և շարունակեցի բարձրաձայն կարդալ:

Պարզվում է, որ Մամա Վոնգը ուշադիր լսում և հիշում էր իմ կարդացածը։ Ժամանակի ընթացքում նա նախընտրեց ինքնուրույն կարդալ: Ավելի ուշ նա ինձ ասաց, որ սովորական մարդը չէր կարող գրել Մորմոնի Գիրքը: Նա կասկած չուներ, որ գիրքն Աստծո խոսքն է: Ինձ համար հրաշք էր տեսնել, թե ինչպես էր վերականգնվում կարդալու հանդեպ նրա հետաքրքրությունը և Մորմոնի Գրքի մասին վկայելու նրա ցանկությունը:

Մամա Վոնգի մկրտությունից հետո ես անհանգստանում էի, թե նա Եկեղեցուն միացել էր միայն ինձ համար: Բայց հիմա նա ունի իր սեփական վկայությունը: Տարիներ շարունակ ես փորձում էի «դեպի լավը փոխել» նրան, բայց նրան անհրաժեշտ էր միայն Աստծո պարզ, զորեղ խոսքը:

Ես շնորհակալ եմ կենդանի մարգարեի համար, ով մեզ միշտ ժամանակին է առաջնորդում: Եթե մենք գործենք ըստ նրա ուսուցանածի, մեծ օրհնություններ կհետևեն: Այս փորձառությունն ինձ ցույց տվեց, թե որքան շատ է Տերը ցանկանում օրհնել մեզ: Մորմոնի Գրքից ես ընդամենը մի քանի գլուխ կարդացի մորս համար: Այնուհետև Տերը գործեց: