Պարզապես կրկին փորձիր

Մոլլի Օգդեն Ուելչ, Եկեղեցու ամսագրեր

Ես զբաղված էի լավ գործեր անելով, բայց Տիրոջ հետ իմ հարաբերությունները տուժեցին, քանի որ անտեսեցի ավելի կարևոր բան:

Նկար

սուրբ գրությունների բաց գիրք

Երբ ես ավարտեցի իմ միսիան 2019 թվականի հունվարին, վստահ էի, որ հեշտությամբ կշարունակեմ ամեն օր ուսումնասիրել սուրբ գրությունները: Սկզբում դա այդպես էր։ Աշխատանքից հետո գալիս էի տուն և կանոնավոր կարդում էի իմ սուրբ գրությունները: Ես ուրախ էի, որ դեռ նվիրված էի սուրբ գրությունների ընթերցանությանը և սովորում էի Փրկիչի մասին:

Դա փոխվեց 2019 թվականի հունիսին, երբ ընկերս վերադարձավ իր միսիայից: Մենք անմիջապես սկսեցինք հանդիպել և վեց շաբաթ անց նշանվեցինք:

Հարսանիքը ծրագրելու, աշխատելու, քոլեջ հաճախելու և փեսացուիս հետ ժամանակ անցկացնելու զբաղված ժամանակացույցի մեջ սուրբ գրությունների իմ ուսումնասիրությունը շուտով կրճատվեց և դարձավ շաբաթական մի քանի անգամ: Քանի որ շեղված էի լավ գործերով, ես ակամայից անտեսեցի իմ հարաբերությունները Տիրոջ հետ:

Մենք ամուսնացանք 2019 թվականի նոյեմբերին։ Արձակուրդներից հետո ես փորձեցի շարունակել սուրբ գրությունների ուսումնասիրությունն այնտեղից, որտեղ դադարեցրել էի: Մի քանի ամիս ես և ամուսինս միասին հաջողությամբ ուսումնասիրեցինք սուրբ գրությունները: Ամեն առավոտ մի քանի րոպե մենք կարդում էինք սուրբ գրությունները և քննարկում Եկ, հետևիր ինձ ձեռնարկի դասը, նախքան աշխատանքի կամ քոլեջ գնալը:

Հետո վրա հասավ COVID-19 համավարակը։ Առանց քոլեջի դասերի և աշխատանքային հաստատուն ժամանակացույցի մենք կորցրինք սուրբ գրությունների ուսումնասիրության մեր առավոտյան սահմանված կարգը: Մենք անկանոն էինք ուսումնասիրում այն, և Տիրոջ հետ մեր հարաբերությունները տուժեցին: Նույնիսկ այն բանից հետո, երբ սահմանափակումները հանվեցին, և մենք վերադարձանք եկեղեցի մենք դեռ դժվարությամբ էինք ուսումնասիրում:

Եկեղեցու անդամները հաճախ ունենում են պահեր, երբ դժվարանում են կանոնավոր կարդալ իրենց սուրբ գրությունները: Մեր կյանքը զբաղված է և մենք ամեն օր բախվում ենք մարտահրավերների: Բայց երբեք ուշ չէ կրկին սկսելու համար։

Նախագահ Ռասսել Մ. Նելսոնն ասել է. «Տերը մեր հավերժական առաջընթացի այս ժամանակահատվածում չի ակնկալում կատարելություն»: Բայց, հավելել է նա, «մենք բոլորս կարող ենք ավելի լավ գործել և ավելի լավը լինել»:¹

Ես և ամուսինս վերջերս կրկին պարտավորվեցինք կարդալ մեր սուրբ գրությունները: Մենք դեռ կատարյալ չենք այդ գործում, բայց ամեն օր փորձում ենք ամրապնդել մեր վկայությունները: Ես երախտապարտ եմ այն բազմաթիվ հնարավորությունների համար, որ Տերը տալիս է մեզ՝ ապաշխարելու, ավելի լավ գործելու և ավելի լավը լինելու համար: