“Aō Aenōm̧m̧an Ij Lewōj n̄an Kom̧”,” Liaona, M̧aaj. 2023.
“Aō Aenōm̧m̧an Ij Lewōj n̄an Kom̧”
Ejja naan ko Jisōs ekar kōnono n̄an Lom̧alo in Galilee lo joteen eo ekar kajoor ļan̄ ko, Ej ba n̄an kōj ilo iien ļan̄ ko ilo mour ko ad: “Kwōn jab m̧akūtkūt, kwōņ lur.”
Pija jān Getty Image ko
N̄an baam̧le eo aō im n̄a, ilo winter eo em̧ōļo in 1944 eo ekar juon iien ekamijak im jab jeļā kake. Kōn an jema kar ettoļo̧k ilo ijo pata ekar kōm̧m̧an, jinō ekar kakkōt n̄an naajdik ajri ro nejin emen im kōmāāņāņ ke kamijak an pata eo ekar epaaketok m̧weo im̧ōm ilo Czechoslovakia.
Kajjojo raan kamijak eo ekar epaaktok wōt. Āliktata, jinō ekar pepe n̄an ko n̄an ippān ro jinen im jemān ilo iturear in Germany. Kōn juon un, liin ekar maron̄ bōk kōm aolep ilo juon iaan tūrein ko waan rijipo̧kwe ro kar jibadōkļo̧k turilik. Iturin kein kabbokļo̧k ko, māj ko reinepata, im lo̧jie ko ejjeļo̧k kobbaer kar kakeememej aolep kōn tūrein eo bwe kōm kar ilo̧k ilo juon jikin tariņae.
Juon bon̄ ālkin an tūreein eo waam̧ pōjrak n̄an ebbōk m̧weiuk, jinō ekar m̧ōkajļo̧k im kappok m̧ōn̄ā. Ke eaar ro̧o̧ļtok, eaar mijak, tūreein eo kōmij uwe ie ekar jako!
Kōn inepata, eaar oktakļo̧k n̄an Anij ilo jar innām kar jino kappukot jikin tūrein eo. Eaar ettōr jān iaļ n̄an iaļ im jān tūreein n̄an tūreein. Eaar jeļā ke n̄e tūreein eo waan ekar em̧m̧akūt m̧okta jen an nej loe, emaron̄ kar jab lo kōm bar juon alen.
Ļan̄ ko ilo Mour ko Ad
Ilo jerbal in kwaļo̧k eo an Rilo̧mo̧o̧r ilo mour in, rijilōk ro An raar jeļā bwe E emaron̄ kalur ļan̄ ko ilo mour ko ad. Ke ej jota, ālkin juon raan in kwaļo̧k itōrere in lo̧jet, Irooj ekar ba bwe ren “ilo̧k n̄an lom̧alo jab uweo” Lom̧aļo in Galilee (Mark 4:35).
Ālkin aer ilo̧k, Jisōs ekar lo juon jikin n̄an kakkije ioon wa eo im lukkuun kiki. Ejjab to jān iien eo “im e bun̄ n̄at, im ņo ko rej juur ioon wa eo, innām elōn̄” (lale Mark 4:37–38).
Jejjab jeļā ewi toon an kar rijilōk ro kar apan̄ n̄an kōjparok wōt wa eo bwe en jab diwōj, ak āliktata raar jab bar kattar. Raar mijak, im raar ba, “Ri Kaki, kwō jab ļōmņak kōn am jako ke?” (Mark 4:38)
Jej aolep ioon ļan̄ ko rejidimkij. Ilo mālijjon̄ ko im teej ko ad ilo mour in, jemaron̄ en̄jake en̄taan, ebbweer im inepata. Būruwōd ej rup kōn kōj make im ro jej iakwe er. Jej inepata im mijak im jet iien ejjeļo̧k kōjatdikdik. Ilo iien rot kein, jemaron̄ barāinwōt ba, “Ri Kaki, kwō jab ļōmņak kōn aō jako ke?”
Ilo iien jodikdik ko aō juon iaan al in jar ko rem̧m̧an tata ippa ekar “Master, the Tempest Is Raging.”1 Imaron̄ kar pijaik eō make ilo wa eo ke “ņo eļļap ko [raar] jetak utiej.” M̧ōttan eo eaorōk im aiboojoj tata an al in jar eo ej āinwōt: “Kōto ko im ņo ko renaaj pokake ankilam̧: Aenōm̧m̧an, lur wōt.” Innām ej itok ennaan eo eaorōk: “Ejjeļo̧k dān ko remaron̄ oran̄ļo̧k wa eo ijo ej babu M̧aajta eo an lom̧aļo im laļ im mejatoto ko.”
Eļan̄n̄e jej karuwaineneitok Jisōs Kraist, Irooj in Aenōm̧m̧an, n̄an wa eo waad, jej aikuj in jab leļn̄o̧n̄. Jenaaj jeļā bwe jemaron̄ lo aenōm̧m̧an lo iien ļan̄ ko me rej itok n̄an kōj im jepooļ kōj. Ālkin an rikaļoor ro An kar lam̧ōj n̄an jipan̄, Jisōs ekar “m Ej jerkak im kauwe kōto im ba ñan loṃaḷo, Kwōn jab ṃakūtkūt, kwōn lur. Im ekar jako an ekkōtoto, im eļap lur” (Mark 4:39
Ejja naan ko Jisōs ekar kōnono n̄an Lom̧alo in Galilee lo joteen eo ekar kajoor ļan̄ ko, Ej ba n̄an kōj ilo iien ļan̄ ko ilo mour ko ad: “Kwōn jab m̧akūtkūt, kwōņ lur.”
“Jab Āinwōt an Laļ Lewōj”
Ippān rikaļoor ro, jemaron̄ in kajjitōk, “Wōn armej in bwe kōto im lo̧jet rej pokake E?” (Mark 4:41).
Jisōs ej juon armej ejjab āinwōt ro jet. Āinwōt Nejin Anij, E ekar kūr n̄an kakūrm̧ool juon mijen eo ejjeļo̧k juon emaron̄ kar kakūrm̧ool.
Kōn Pinmuur eo An, im ilo juon wāween eo jeban lukkuun keidi, Rilo̧mo̧o̧r eaar bōk Ioon Make “metak ko im kaen̄tanaan ko im kapo ko otemjeļo̧k” (Alma 7:11) im “leļo̧k aolep eddodo in aolep jerawiwi.”
Men̄e E ekar ejjeļok an m̧uri n̄an ekajet, E ekar en̄taan kōn “aolepān… akweļap ko an ekajet” (Alma 34:16). Ilo naan ko an Būreejtōn Boyd K. Packer (1924–2015), Būreejtōn eo an Jon̄oul Ruo Rijilōk ro, “E kar jab kōm̧m̧an jabdewōt bwōd. Mekarta, jon̄an aolepān bōd ko, inepata im būrom̧ōj, metak im kajjookok, aolep ilo kōļmenļo̧kjeņ, en̄jake, im kakkure ko ilo ānbwin armej rejeļā kaki—E eaar en̄jaki aolepāer.”3 Im Eaar anjo̧ ioer aolep.
Alma eaar kanaan bwe Rilo̧mo̧o̧r eo enaaj ‟bōk ioon mej, bwe E en maron̄ kōtļo̧k tok to rej lukwōj armej ro An; im Enaaj bōk Ioon m̧ōjņo̧ ko aer, bwe buruōn ren maron̄ obrak kōn tiriam̧o, ekkar n̄an kanniōk, bwe En maron̄ jeļā ekkar n̄an kanniōk ekōjkan jipan̄ armej ro An ekkar n̄an m̧ōjņo̧ ko aer” (Alma 7:12).
Kōn juon menin ļotak ekwojarjar, im kōn iakwe ejjeļo̧k jem̧ļo̧kin, Jisōs Kraist eaar kōļļāik wōnāān n̄an pinmuuri kōj, n̄an kōkajoorļo̧k kōj, im n̄an lo̧mo̧o̧ren kōj. Pinmuur eo wōt jemaron̄ lo aenōm̧m̧an eo jej lukkuun kōņaan im aikuji ilo mour in. Āinwōt an Rilo̧mo̧o̧r kar kallim̧ur, “Aenōṃṃan Ij likūt ṇa ippemi, Aō aenōṃṃan Ij lewōj n̄an koṃ: jab āinwōt an laļ lewōj, N̄a Ij lewōj n̄an koṃ. En jab pok būruemi, im en jab lōļn̄o̧n̄” (Jon 14: 27).
Mour im katak ko an Jisōs Kraist rej letok n̄an kōj en̄jake An aenōm̧m̧an n̄e jenaaj oktakļo̧k n̄an E.
Christ’s Image, jān Heinrich Hofmann
Wāween ko n̄an Aenōm̧m̧an
Jisōs Kraist, eo ej tōl men ko raorōk, emaron̄ bar kōmeraik eddo ko ad. Ewōr An kajoor n̄an kōmour kajjojo armej im laļ. E eaar kwaļo̧k n̄an kōj wāween eo n̄an m̧ool in aenōm̧m̧an, bwe E ej “Irooj in Aenōm̧m̧an” (Aiseia 9:6). Aenōm̧m̧an eo Rilo̧mo̧o̧r ej letok emaron̄ ukōt elōn̄ armej n̄e ro nejin Anij renaaj kōtļo̧k. Mour im katak ko An rej letok n̄an kōj wāween ko n̄an en̄jake aenōm̧m̧an eo An n̄e jenaaj oktakļo̧k n̄an E.
“Ekkatak jān Eō,” Ekar ba, “im ron̄jaki naan ko Aō; etetal ilo ettā in Jetōb eo Aō, im enaaj wōr am aenōm̧m̧an ilo N̄a” (Katak im Bujen Ko 19:23).
Jej ekkatak kōn E ilo ad lōn̄aj jetōb ko ad ilo jar, ekkatak kōn mour im katak ko An, im “jutak … ilo jikin ko rekwōjarjar,” ekoba tampeļ ko (Katak im Bujen Ko 87:8; bar lale 45:32). Pād emakijkij ilo m̧weeo im̧ōn Irooj jon̄an eo kwoj maron̄e. Tampeļ ej juon jikin kone aenōm̧m̧an jān lan̄ ko otemjej ad ilo mour in.
Eo m̧ōtta ejitenbōro Būreejtōn Thomas S. Monson (1927–2018) ekar kwaļo̧k: “Ilo ad etal n̄an [tampeļ], ilo ad keemejmej bujen ko jekar kōm̧m̧ani ilowaan, jenaaj maron̄ in jelmae mālijjon̄ ko im ellā ioon kajjojo iaan menin kapo ko. Tampeļ eo ej letok un n̄an mour ko ad. Ej letok aenōm̧m̧an n̄an jetōb ko ad—ejjab aenōm̧m̧an eo letok in armej ak aenōm̧m̧an eo kar kallim̧ur kake jān eo Nejin Anij.”4
Jej ron̄jake naan ko An ilo ad ron̄jake katak ko An ilo jeje ko rekwojarjar im jān rikanaan ro An remour, ļoor waanjon̄ak eo An, im itok n̄an Kabun̄ in An, ijo jej jemdoon ie, ekkatak, im naajdik jen naan eo em̧m̧an kōn Anij.
Jej etetal ilo ineem̧m̧an kōn Jetōb eo An ilo ad iakwe āinwōt An kar iakwe, jeo̧rļo̧k bōd āinwōt An kar jeo̧rļo̧k bōd, ukweļo̧k, im kōm̧m̧an bwe m̧oko m̧ōd ren jikin ko ijo jemaron̄ en̄jake Jetōb eo An. Jej bar etetal ilo ineem̧m̧an kōn Jetōb eo An ilo ad jipan̄ ro jet, m̧ōņōņō in jerbal n̄an Anij, im kajjieon̄ in erom̧ “rikaļoor ro an Kraist reineem̧m̧an” (Moronai 7:3).
Bun̄ten tōmak im jerbal kein rej tōlļo̧k n̄an wānōk, kōjeraam̧m̧an kōj ilo iaļ in ad rikalooraņ, im bōktok n̄an kōj aenōm̧m̧an im kōttōpar.
“Ilo N̄a Kom̧win Aenōm̧m̧an”
Ilo juon bon̄in marok ilo station in jikin uwe turein eo elōn̄ iiō remootļo̧k, jinō ekar jelm̧ae juon kālet. Emaron̄ kar jijōt im būrom̧ōj kōn an jako ajri ro nejin, ak emaron̄ kar bōk tōmak im kōjatdikdik n̄an jerbal. Ij m̧ōņōņō bwe tōmak eo an ekar anjo̧ ioon mijak eo an im bwe kōjatdikdik eo an ekar anjo̧ ioon an ebweer.
Āliktata, ilo juon station ettoļo̧k ijo, liin ekar lo tūrein eo waam. Ijen, ilo jem̧ļo̧kin, kōm kar bar koba ippān doon. Joteen eo, im ilo elōn̄ lan̄ ko ilo raan im ilo bon̄ raar ellā, waanjon̄ak eo an jinō n̄an likūt tōmak n̄an jerbal ekar jipan̄ kōm ilo am kar kōjatdikdik im kar jerbal n̄an ilju eo ejeraam̧m̧an.
Rainin, elōn̄ iaan ro nejin Anij rej lo pukot mejļan apan̄ ko aer, bwe, ren bar jako. Kōjatdikdik im ettōņak ko aer kōn ilju im jekļaj raar jako kōn tariņae, nan̄inmej, im jako an ejmour, jerbal, jeļāļo̧kjeņ, im ro rejitenbōro. Raar ebweer, ajimakeke, būrom̧ōj.
Ro jeiū im jatū, ro m̧ōtta rejitenbōro, jej mour ilo iien ko renana. Laļ ko rōtarpok, ekajet epād āne eo, im aenōm̧m̧an em̧ōj bōk jān laļin Katak im Bujen Ko 1:35; 88:79). Ak aenōm̧m̧an ban bōke jān būruwōd, men̄e jej en̄taan, būrom̧ōj, im kōttar Irooj.
Kōn wōt Jisōs Kraist im Pinmuur eo An, jar ko ad naaj uwaak. Iien ej an Anij, ak ij kam̧ool bwe ikdeleel ko ad rejim̧we renaaj juon raan waļo̧k im bwe aolep ad likjab renaaj waļo̧ktok n̄an kōj, kar letok bwe jen kōjerbal menin letok eo ekwojarjar an ukweļo̧k im pād wōt ilo tiljek.5
Naaj kōmour kōj jim̧or—ilo kanniōk im jetōb.
Jenaaj jutak erreo im kwojarjar im̧aan jikin ekajet.
Jenaaj bar ippān doon ippān ro jej iakwe ilo aiboojoj in jerkakpeje.
Ilo tōrein, jej ineem̧m̧an im peran ilo ad pedped ioon kallim̧ur ko an Rilo̧m̧o̧o̧r: “bwe ilo N̄a Kom̧win Aenōm̧m̧an” (Jon 16:33).