“Jipan̄ im Kōjatdikdik jān Kweilo̧k eo Eļap,” Liaona, Maj. 2023.
Ainikien ko an Armej ro Rekwojarjar ilo Raan Ko Āliktata
Jipan̄ im Kōjatdikdik jān Kweilo̧k eo Eļap
Ijjan̄in kar kōtmene n̄an ron̄jake juon likio in kōnono an kweilo̧k eo eļap kōn lukkuun ta eo ikar en̄jake.
Pija in rijeje eo im baam̧le eo an jān Cody Bell
Ālkin ļotak eo an m̧anje eo neju, iaar en̄taan itok jān aer in kōmālij. Ekar juon iien em̧m̧an ilo mour eo aō kōnke ewōr juon neju ļaddik, ak iban kar lukkuun in m̧ōņōņō kōn eo neju kōnke ikar en̄taan kōn aer in kōmālij.
Ilo tōre in kajjieon̄ in, ekar ļap aō jar n̄an Jemedwōj Ilan̄. Iaar kajjitōk bwe En jipan̄ eō eļļā jen mālijjon̄ in epan̄. Ilo an epaaktok kweilo̧k eo eļap, iaar bar jar bwe in maron̄ lo aenōm̧m̧an jān kōnono ko jān ritōl ro an Kabun̄ in.
Ke iaar ron̄jake kōnono ko ilo kweilo̧k eo eļap ilo m̧wen̄an eo kein kajuon, ikar jino en̄jake aenōm̧m̧an. Innām, ilo m̧wen̄an eo kein karuo, Elder Jeffrey R. Holland jān Doulul eo an Jon̄oulruo Rijilōk ro ekar kōnono kōn aer in kōmālij. Eaar ba bwe aer in kōmālij emaron̄ kōm̧m̧an bwe jen en̄jake “āinwōt jāpe e rup”1 (Sam Ko 31:12). Ikar kōtmene ke in kar ron̄jake juon ennaan kōn ta eo ij en̄jake.
Menin ekar juon iien aorōk n̄an n̄a. Kōnono eo ekar jipan̄ eō meļeļe bwe Jemedwōj Ilan̄ ej iakwe im bwe E ej ļōmņak kōn eō. E ekar meļeļe ta eo ikar dibuki. E ekar kōņaan jipan̄ eō im letok n̄an eō kōjatdikdik. E ekar kōm̧m̧ane kōn naan ko an Elder Holland.