“Jekdo̧o̧n N̄e Korūtto, Iakwe Em̧ool Ej Jamin Jako,” Liaona, Maj. 2023.
Rūttoļo̧k ilo Tiljek
Jekdo̧o̧n N̄e Korūtto, Iakwe Em̧ool Ej Jamin Jako
Kar kūr n̄an būreejtōnji eo an Doulul eo an Kōrā ilo iiō ko aer rōrūtto, kōrā rein rej bōktok tijem̧ļo̧k im meļeļe n̄an jerbal eo aer.
Pija jān Richard M. Romney
“Emaron̄ bōlen rūttotata būreejtōnji eo an Doulul eo an Kōrā ro ilo Kabun̄ in,” Sharon Alexander ej ba. Ej kab tōpar 89. Im rikakpilōklōk ro an Marlene Peterson im Dorothy Arnold rej 90 im 91, aer iiō make.
“Kōn menin, jon̄an dettan iiō ko am ej 90,” Dorothy ej ba, ilo an ettōn̄.
Būreejtōnji in an Doulul eo an Kōrā ro rej jerbal ilo juon branch ilo independent-living facility epād ilo Ogden, Utah, USA. M̧win ej im̧ōn elōn̄ membōr rūtto ro an Kabun̄ in, im būreejtōnji eo maron̄ emakijkij lo aer ekkatak ilo kein etetal ko aer ilo aer etal jān kōjām n̄an kōjām, iak-iakwe armej ro im lale bwe aolep em̧m̧an aer pād.
Ilo juon iien, armej ro lo ward ko ijo jokwe ie raar kōm̧m̧ani loļo̧k in jerbal in karejar ko. Innām stake būreejtōn eo ekar en̄jake im̧we n̄an kōketak branch būreejtōnji eo n̄an kajjitōk ippān Irooj ewi wōt ro rej jokwe ijo emaron̄ jerbal im ilo kūr ta.
Eļap Jeraam̧m̧an n̄an Ba Jaab
“Ke branch būreejtōn eo ej letok kūr eo n̄an eō bwe in būreejtōn n̄an Doulul eo an Kōrā ro,” Sharon ej ba, “Iaar ļōmņak, iaar bōk elōn̄ kōjeraam̧m̧an ko n̄an ba jaab.” E, ilo oktakin, ekar bōk im̧we kōn wōn ro rej aikuj an rikakpilōklōk. “Marlene ekar itok n̄an kōļmenļo̧kjeņ eo aō,” ej ba. “Kom̧ro kar jerbal ippān doon ilo labōļ ko an stake, kepooj āt ko n̄an jerbal in tampeļ. Ikar jeļā ļeo pāleen ekar mej ejjab etto, im em̧ool men̄e liin ekar ļon̄tak kake, ikar jeļā liin ekar tiljek.”
Innām, ālkin kweilo̧k in kwojkwoj eo, Sharon eaar reito-reitak ilo ruum̧ eo, pukot im̧we. “Iaar lo Dorothy. Eaar ettōn̄dikdik n̄an eō, im iaar jeļā enaaj bar juon rikakpilōklōk. Irooj ekar tōlļo̧k eō n̄an ippāero jim̧or, im E ekar jab kōm̧m̧an bōd ilo erro jim̧or.”
Āinwōt juon Baam̧le Eļap
Sharon ej barāinwōt ba bwe emaron̄ lo jeraam̧man eo an lōn armej jān im̧win rej jerbal n̄an doon ilo im̧win. “Kōmij epakeļo̧k jekjek eo,” liin ej ba. “Kōmij meļeļe bwe kōmij jet iien likjab, jet iien kōmij meļo̧kļo̧k eļap, im jet iien ejjab kanooj em̧m̧an am mour. Im kōm jeļā ewi wāween ettōn̄ kōn inepata ko kōmij jelm̧ae ippān doon.”
“Armej ro me rej jokwe ijin āinwōt juon baam̧le eļap,” Marlene ej ba. “Kōmij m̧ōn̄ā mōn̄ā ko kijem ippān doon, kōn men in kōmij lo doon jilu alen juon raan. Innām̧ jet iien kōmij ippān doon ilo m̧akūtkūt barāinwōt. Kōn menin ij ļōmņak stake būreejtōn eo ekar im̧we ke ekar en̄jake bwe ekar wōr armej ro ijin me remaron̄ jerbal n̄an doon.”
“Kōm jeļā ta eo ej waļo̧k jān raan n̄an raan. Kōm jeļā eļan̄n̄e juon ej aikuj jipan̄ ak eļan̄n̄e juon ej nan̄inmej” Dorothy ej ba.
Ilo kakkobaba n̄an jerbal in karejar im jipan̄ ro jet n̄an jerbal in karejar, membōr ro an būreejtōnji ej ejaaki katak ko an Doulul eo an Kōrā ro. Rej kwaļo̧k ro rej jokwe n̄an kūr n̄an katakin, im rej kōm̧m̧an oktak ilo ijjitōn̄ ko im jikejuuļ ko ekkar n̄an aikuj ko kajjojo an rikaki ro
Keememej, Irooj ej Iakwe Yok
“Ak jerbal eo ad ej n̄an kakeememej ro jet rej jokwe ijin bwe Irooj ej iakwe er,” Marlene ej ba. “Im ilo ad kōm̧m̧ane, jej en̄jake iakwe eo An barāinwōt.”
“Ewōr ad aolep apan̄ ko,” Sharon ej ba. Ewōr kiiō ippa jorrāāņ ko ekar ejjeļok aō ļalem iiō ko remootļok. Ak n̄e ij būrom̧ōj kōn n̄a make, ij ļōmņak, ‘Aa, ejjeļo̧k men keidi n̄an ta eo Rilo̧mo̧o̧r eo ekar dibuki.’ Jej pād ijin n̄an waanmaanļo̧k im eddōkļo̧k. Im men̄e jerūtto, eļan̄n̄e kwoj kōtļo̧k bwe en̄jake ko am̧ ren katakin eok, kwomaron̄ ekkatak wōt n̄an indeeo.”
Kōnke ekar jako ro rejitōnbōro ippāer, ro uwaan būreejtōni eo raar barāinwōt ekkatak eļap kōn meanwōd. Raar jeļā kile jipan̄ ro raar aikuj jipan̄ in kaenōm̧m̧an. N̄an waanjon̄ak, ilowaan juon iiō Marlene eaar luji emen ro uwaan baam̧le eo an im juon m̧ōttan epaake.
“Kōnke kōm kar dibuk men ko reppen,” ej ba, “kōm maron̄ jipan̄ doon dibuk men ko reppen barāinwōt. Eļan̄n̄e kwoj apan̄ kōn juon men, meļo̧kļo̧k eok make ilo jerbal n̄an ro jet. En̄in ej aorōk eo an kūr in ekar jipan̄ eō kōm̧m̧ane.”
Ro uwaan būreejtōnji eo rej bōktok en̄jake in jeraam̧m̧an eo im meļeļe kōn kūr ko aer. Raar mour im kar jerbal ilo elōn̄ jikin ko—California, Ohio, Wyoming, im Utah. Raar jerbal ilo tampeļ, kūr ko ilo ward im stake, ilo Būraimere, Doulul eo an Jiron̄ ro, im jerbal in jipan̄ an humanitarian. Ak Dorothy ekar jab wōr an kūr ilo Doulul eo an Kōrā ro, m̧ae kiiō.
“Ta m̧ato eo an Doulul eo an Kōrā ro?” ej ba. “‘Iakwe-Em̧ool Ej Jamin Jako.’ Menin em̧ool n̄e kwoj dik, ak ebarāinwōt m̧ool n̄e korūtto. Āinwōt juon būreejtōnji, kōmij ekkatak kake aolep raan.”
“Ij ļōmņak em̧m̧an am jerbal ippān doon,” Sharon ej ba, kōn juon wink, “kōn juon būreejtōnji eo iiō dettan 90.”