Ainikien ko an Armej ro Rekwojarjar ilo Raan Ko Āliktata

Aō Lale jān Lōn̄

Jān Milla Ray Acevedo Carrasco, Marlborough, New Zealand

Inan̄in kar joļo̧k wōt men eo ikar aikuji n̄an tōpar kōttōpar eo aō.

Pija in Eria eo an Roy Peak jān rijeje eo

Kiiō epaak, ikar etal ilo juon etetal aitok n̄an ijo ebun̄bun̄ Roy’s Peak ilo toļ ko raiboojoj in South Island ilo New Zealand. Kōnke etetal aitok eo ekar aitokan in wōt jejjo awa ko, ikar bōk wōt ta eo ikar aikuji: jet kapijie im eļap dān.

Ke ikar ijjino, pāāk eo aō ekar eddo kadede. Jimetta awa jān ke ikar jino etetal aitok, ikar en̄jake eddo eo an pāāk eo aō em̧ool ļapļo̧k an eddo ioon aera im ālikū. Ilo jidik iien, iaar ļōmņak in kadiwōj jet iaan dān ko nim̧ō. Bōtaab ilo iie eo em̧ōkaj, ikar jeļā inaaj kar aikuji.

Juon awa im jimettan m̧okta jān aō tōpar jabōn toļ eo, iaļ eo ekar jino ju im libobo kōn jiņo. Ikar jino ļōmņak ijjab maron̄ tōpar lōn̄, bōtaab kōttōpar eo aō ekar ļujur aō n̄an wōnm̧aanļo̧k.

Āliktata ke ikar tōpar lōn̄, pāāk eo aō ekar āinwōt ekanooj meraļo̧k. Innām kiiō ilo iien ikar kan̄ aolep kapijie ko aō kar idake enan̄n aolep aibōj ko nim̧ō. Kakkije im m̧ōņōņō kōn aiboojoj eo laleļo̧k jān ijo ilōn̄, iaar ļōmņake kōn iaļ eo aō—n̄an jabōn lōn̄ in toļ eo im ilo mour eo aō.

Ium̧win awa ko, ikar etetal lōn̄ļo̧k, najdik im katutuik ānbwinū bwe en wōr aō kajoor n̄an etal wōt. Ta eo ekar āinwōt juon eddo ilo jinoin—dān in mour—ekar kōjeraam̧m̧an eō n̄an kōtōprak kōttōbar eo aō.

Jej aolep ioon iien ko rem̧m̧an im ko renana, bōtaab Jetōb Kwojarjar eo ej jipan̄ kōj kōm̧m̧ani jokāālet ko rem̧man. Ejako de in kar joļo̧k jimettan lita in dān ilo iaļ eo; bōtaab ikar en̄jake im̧we n̄an būki wōt.

Kōn māj ko retutu, ikar kam̧m̧oolol Jemedwōj Ilan̄ kōn kejekļo̧kjeņ kein. Pād ilo toļ ko rōkalbubu kōn jiņo raan jab eo ekar im̧we eō n̄an kar etale mour eo aō, jokāālet ko aō, kōttōpar ko aō, im ļōmņak ko ikar dāpiji wōt ilo mour eo aō.

M̧okta jān kar etetal aitok eo aō, ikar obrak kōn jab jeļā ikkiien mour eo aō im jerbal eo aō ilo juon laļ ejjab aō. Bōtaab kiiō ij en̄jake bwe aolep men renaaj em̧m̧an. Ijeļā bwe Irooj enaaj lolorjake eō.

Kōn jipan̄ eo an Jetōb, ijeļā imaron̄ kōm̧m̧ani jokālet ko rejim̧we me renaaj kotak eō ilo ļōmņak, ānbwin, im jetōb. Im n̄e ij edodo kōn mālijjon̄ ko an mour in, imaron̄ oktakļo̧k n̄an ad Rilo̧mo̧o̧r, eo ej unjen “dānin mour” (Jon 4:10). Ijeļā E enaaj naajdik im kōmeraikļo̧k aō eddodo (lale Matu 11:28–30).