“Kōjeraam̧m̧an ko an Priesthood,” Liaona, Maj. 2023.
Katak ko Reļam Waan an Gospel eo
Kōjeraam̧m̧an ko an Priesthood
Christ Ordaining the Twelve Apostles[Kraist ej Kapit Jon̄oulruo Rijilōk ro], jān Harry Anderson.
Juon kōjeraam̧m̧an an priesthood eo ej itok kōn im̧we jen juon eo ej kabwijer Melkisedek Priesthood. Kōjeraam̧m̧an ko an priesthood eo ekōm̧m̧an bwe en pidodo n̄an aolep ro nejin Anij n̄an bōk kajoor eo An, kōmour, aenōm̧m̧an, im tōl.
Priesthood eo
Priesthood eo ej kajoor im mālim an Anij. Em̧m̧aan ro rōreeo ro rej kabwijer Melkisedek Priesthood rej jerbal ilo etan Jisōs Kraist n̄e rej leļo̧k kōjeraam̧m̧an ko an priesthood. Ilo aer leļo̧k kōjeraam̧m̧an kein, rej ļoor waanjon̄ak eo an Rilo̧mo̧o̧r n̄an kōjeraam̧m̧an ro jet.
Pija jān David Winters
Ekōjkan Leļo̧k Kōjeraam̧m̧an ko
Kōjeraam̧m̧an ko an priesthood eo rej leļo̧k kōn likūt pā ko ioon. Juon rikabwijer Melkisedek Priesthood eo ej likūt pā ko pein ioon bōran armej eo ej bōk kōjeraam̧m̧an eo. Innām ej leļok kōjeraam̧m̧an eo āinwōt an Jetōb tōl. Ro rej leļo̧k kōjeraam̧m̧an ko im ro rej bōki rej kōjerbal tōmak ilo Anij im lōke ilo Ankilaan im iien eo An.
Leļo̧k Etan im Kōjeraam̧m̧an Ajri ro
Ālkin an juon ajri ļotak, rikabwijer priesthood eo ej leļo̧k etan im juon kōjeraam̧m̧an (lale Katak im Bujen Ko 20:70). Menin ekkā an waļo̧k ilo juon kweilo̧k in jitlo̧k im kwaļo̧k naan in kam̧ool. M̧okta rej lelak etan ajri eo. Innām rikabwijer priesthood eo ej leļo̧k n̄an ajri eo juon kōjeraam̧m̧an.
Kōjeraam̧m̧an Rinan̄inmej
Rikabwijer Melkisedek Priesthood ro remaron̄ leļo̧k kōjeraam̧m̧an ko n̄an armej ro rej nan̄inmej. Kōjeraam̧m̧an eo ewōr ruo m̧ōttan ko ie: ekapit kōn oil im liāpe ekkapit eo. Moktata, juon rikabwijer priesthood eo ej likūt juon pilil in olive oil eo me ekar m̧ōj kōkwojarjar e, ak kōjeraam̧m̧ane, ioon bōran armej eo im leļo̧k juon jar ekadu. Innām rikabwijer priesthood eo juon ej liāpe ekkapit eo im leļo̧k n̄an armej eo juon kōjeraam̧m̧an āinwōt an tōl jān Jetōb Kwojarjar.
Kōjeraam̧m̧an in Kaenōm̧m̧an im Kapilōk
Rikabwijer Melkisedek Priesthood ro remaron̄ leļo̧k kōjeraam̧m̧an ko an kaenōm̧m̧an im kapilōk n̄an ro jet uwaan baam̧le eo im ro jet me rej kajjitōk kaki. Juon baba eo ej kabwijer Melkisedek Priesthood eo emaron̄ leļo̧k kōjeraam̧m̧an eo an juon jemen n̄an ajri ro nejin. Men kein remaron̄ jipan̄ eļap tata n̄e ajri ro rej jelm̧ae apan̄ ko rein juon.
Kōjenolo̧k Membōr ro n̄an Jerbal ilo Kūr ko
N̄e membōr ro rej bōk kūr ko, rej bōk juon kōjeraam̧m̧an n̄e rej kōjenoļo̧k n̄an jerbal. Juon ritōl an priesthood eo ej kōjeraam̧m̧an er kōn mālim eo n̄an jerbal ilo kūr eo. Ritōl eo an priesthood eo ej bar leļo̧k n̄an er juon kōjeraam̧m̧an n̄an jipan̄ er ilo jerbal eo aer.
Pija jān Shauna Stephenson
Kōjeraam̧m̧an ko an Petriak
Kajjojo membōr ro an Kabun̄ in rōrereeo remaron̄ bōk juon kōjeraam̧man an petriak. Kōjeraam̧m̧an in ej leļo̧k kapilōk an juon make jān Irooj. Emaron̄ leļo̧k tōl im kaenōm̧m̧an ilo aolepen mour eo an armej eo. Ej barāinwōt kwaļo̧k bwij eo an armej eo ilo m̧weeo im̧ōn Israel. Petriak eo wōt em̧ōj kapiti emaron̄ leļo̧k kain kōjeraam̧m̧an eo.