“Tawōr Bell in Kakeememej eo Aō,” Liaona, M̧aaj. 2023.
Ainikien ko an Armej ro Rekwojarjar ilo Raan-ko Āliktata
Tawōr Bell in Kakeememej eo Aō
N̄e in kar uwaake im̧we eo, en kar ļapļo̧k am iien n̄an katakin Giuseppe gospel eo.
Ilo juon raan in keppopo, mijenede eo m̧ōtta im n̄a kar loļo̧k juon cathedral ilo Parma, Italy. Ke kar bwilōn̄ kōn aiboojoj eo an pija ko ijo, ikar kile juon monk ej riit epaak. Iaar bōk juon im̧we n̄an kōnono ippān kōn Bok in Mormon, ak iaar jino mijak.
Ekōjkan an juon monk in Catholic ļōmņak kōn juon mijinede in kwaļo̧k ilo an juon cathedral? Im̧we eo ekar bar itok, ak ikar bar kōjekdo̧o̧ne.
Jejjo̧ wiik tokālik, elder ro ruo ilo apartment eo am raar jiron̄ kōm ekar wōr juon iien aer loļo̧k juon monk kar etan Giuseppe ilo aer kappok rikkatak ilo iaļ eo. Ālkin aer katakin e juon katak, eaar bōk juon kape in Bok in Mormon.
Ke mijinede ro raar ioon Guiseppe juon wiik tokālik, eļap wōt ijo ekar riit ilo bok eo. Ekar lukkuun m̧ōņōņō kake.
M̧okta jān an mijenede ro bar ioon Giuseppe, eo m̧ōtta ekar em̧m̧akūt, kōn menin ikar koba ippāer. Ke kōmjel kar ilo̧k n̄an katakin Giuseppe ilo cathedral eo, ikar jab ilbōk n̄an lo bwe ekar ejja monk eo wōt kar im̧we eō n̄an kōnono n̄an e m̧oktakļo̧k.
Giuseppe ekar jiron̄ kōm ekar riiti bok in Alma, eo ekar keidi n̄an Rijilōk Paul. Kōm kar pepe n̄an katakin e katak eo kein karuo, eo ekar jem̧ļo̧k kōn juon kūr n̄an peptaij. Ilo jem̧ļo̧k in katak eo am, m̧okta wōt jān am maron̄ kajjitōk ippān Giuseppe n̄an ļoor waanjon̄ak eo an Jisōs Kraist kōn peptaij, cathedral bell ko raar jino jan̄, kabwilōn̄ kōm.
Giuseppe ekar meļo̧kļo̧k kōn awa eo im kar ba ej aikuj kobaļo̧k ippān monk ro jet n̄an jar ko an rālep. Innām ekar joļo̧k an bōd, ba ejjamin naaj pād tokālik kōnke ekar tōn ilo̧k ilo juon m̧akūtkūt ettoļo̧k. Ekkapit eo an āinwōt juon pris enaaj kōm̧m̧an ālkin.
Kōm kar bwilōn̄ kōn wāween an iien katakin kar jem̧ļo̧k. N̄e in kar uwaake im̧we eo aō m̧oktakļo̧k, enaaj kar ļapļo̧k am̧ iien n̄an katakin Giuseppe im enaaj kar wōr an iien n̄an kadedeļo̧k riiti Bok in Mormon. Ilo aō jeļā, mijenede ro raar jab bar katakin e.
Ālkin en̄jake jab in, ainikien waj eo ilo tawōr bell ko raar kakeememej eō ewi aorōk in im kadu in iien eo am. Ilo aolepān mijen eo aō, aolep iien ikar ron̄ an eddōkōkļo̧k tawōr bell eo, kar ļujur aō n̄an kōnono n̄an jabdewōt imaron̄ kar kōn gospel eo. Rainin, ij kajjieon̄ wōt n̄an ļoor im̧we ko jān Jetōb.