Rūm̧m̧an Ded ro
Jet Kapilōk kōn Jelm̧ae juon Ilju Jekļaj Ekamijak im Jab Jeļā kake
Ilo mour eo aō make im jikin jerbal, ikar jelm̧ae elōn̄ jab jeļā kaki ko im kar ekkatak kōn ekōjkan an Jemedwōj Ilan̄ maron̄ jipan̄ kōj dibuki.
Ke iaar dik, baam̧le eo aō raar em̧akūt jān Tonga n̄an United States. Jema ekar juon ribait ke kōm kar jokwe ilo Tonga, im ekar jino katakin eō bait ālkin am̧ tōkeekļo̧k States. Kōttōpar eo an eļap ekar bwe ij aikuj in juon raan heavyweight champion. Eaar katakin eō n̄an jab mijak. Kwojjab aikuj mijak ilowaan riin̄ in bait eo eļan̄n̄e kwoj kōņaan bwe kwon wiin. Jema ekar jab niknik ilo Kabun̄ in ilo tōre eo, ak eaar katakin eō n̄an jeļm̧ae men ko reppen n̄an bōk peran n̄an jelm̧ae mijak.
Ekkatak ire ekar kepooj eō n̄an aō tijem̧ļo̧k. Ikar etal n̄an Brigham Young University ilo juon football scholarship. Men̄e kōm̧m̧ani ta eo elōn̄ armej rej kautieje eo ej make wōt kamijak n̄an kōm̧m̧ane ilo jikin ikkure football eo—baur booļ eo—aolep iien emeļak aō kōm̧m̧ane. Ijjan̄in kar lukkuun mijak. Ilo m̧ool, ikar iakwe iadjon̄jon̄ eo an football.
Jema ekar kōtmene bwe en wōr juon aō jerbal ilo ikkure ko—ekar waļo̧k bwe enaaj kar ilo football, ejjjab bait. Bōtaab ij ļōmņak kaminene eo aō ekar jipan̄ eō jim̧or n̄an bōk tōmak im n̄an reim̧aanļo̧k kōn tōmak im kōjatdikdik ilo jab jeļā kake.
Jemān Vai ej m̧ōņōņō kōn touchdown eo an ļaddik eo nejin ilo jikin ikkure eo.
Pija jān Mark Philbrick / BYU © BYU Photo
Āinwōt rūmman ded ro, kwoj jelm̧ae elōn̄ men ko reppen im kamijak—unin kōnono ko an juon make āinwōt jokāālet ko kōn jeļāļo̧kjeņ, jerbal, m̧are, im baam̧le. Kwoj barāinwōt jelm̧ae elōn̄ļo̧k unin kōnono ko repād aolep jikin āinwōt jorrāān ko an menin jeraam̧m̧an, kapo ko an social, oktak ko reidin̄ an kien, im em̧ool pata. Bōtaab jān iminene eo an mour eo aō make, ijeļā bwe ilo ad kāālet n̄an likūt Irooj m̧okta ilo mour ko ad, E ej aolep iien pād n̄an tōl kōj ilo aolepāer
Kareel eo an ro Mōttad Rem̧m̧an im Armej ro Rem̧m̧an
Ikar jeraam̧m̧an kōn wōr ro m̧ōtta rem̧m̧an ke ikar tōparļo̧k kapijuknen jān mijen eo aō. Juon m̧ōtta eo ikar ioone ilo jikin kaminene eo an mijenede ekar kwaļo̧k kadkadiū n̄an juon kōrā eo me enaaj kar tokālik erom lio pāleō. Ijjan̄in kar kōjaorōk men ko me ro m̧ōttam emakijkij aer jeļā kake jeraam̧m̧an eo am̧ ak likjab eo am̧ ilo mour in. Ro m̧ōttam̧ im rikaki ro am̧ remaron̄ jipan̄ eok kōm̧m̧ani jokāālet ko me renaaj tōlļo̧k eok n̄e ejjab kepaakļo̧k ak kōttoļo̧k eok jān Anij.
Ke ikar pād ilo National Football League, iaar anōk Gifford Nielsen, eo ekar bar ikkure n̄an BYU m̧okta jen an etal n̄an NFL, em̧ool n̄an erom juon rikkure im tokālik juon Ritōl Utiej Jiljilimjuonn̄oul. Iaar ioon e juon raan ilo juon jikin golf, im eaar letok naan in kapilōk n̄an eō me ekar ukōt iaļ in jerbal eo aō.
Kōmro kar jijet ilo waan golf eo, kom̧ro wōt, im ālkin aō ba n̄an e kōn kōttōpar eo aō bwe in waļo̧k ilo tipi āinwōt kar e n̄e ededeļo̧k aō ikkure football, eaar letok n̄an eō naan in kōkapilōklōk bwe in jab kappuk kōttōpar ko me renaaj kōm̧m̧an menin aō ikkure ilo Jabōt. Jekjek in, in maron̄ bōk juon kūr ilo Jabōt im jerbal ilo Kabun̄ in.
Ekar ļam̧ waan, bōtaab ekar kapilōk eo me ikar jab ļōmņak kake. Im menin ekar ukōt iaļ in mour eo aō.
Bōbrae Ta eo Kwoj Tōmak kake
Aolepān jerbal eo aō ilo NFL ekar kamijak im jab jeļā kake. Ewōr wōt 2 bōkjāān in rikkure football in college ro rej tōprak ilo NFL, im em̧ool ke ikar pād ilo juon kumi, maron̄ kar joļo̧k eō jabdewōt iien. N̄an pād wōt ilo jon̄an aitok eo ikar pād ie ekar juon kōjeraam̧m̧an eļap, bōtaab mour ilo ejjeļo̧k jortoklik in karōk ekar pen. Ekar bōk eļap tōmak.
Ilo NFL, kwoj etal jen juon tiim n̄an bar juon, iiō n̄an iiō, etal itok ilo aolep jikin. Emaron̄ kōjak, ak enan̄in aolep armej rejjab lo kōjak in. Ej juon jekjek in mour epen. Im ej juon jekjek epen n̄an ripālele ro n̄an mour; en̄in ej unin an ļap jon̄an jepel ibwiljin rikkure ko.
Ta eo ekar jipan̄ ej kōnke ijeļā ia eo ij pād ie. Ewōr juon aō pedped epen ilo Kraist, im ij kajjejete aolep men ko me raar dāpij eō epaakeļo̧k E im Jemedwōj Ilan̄.
Kwomaron̄ jab jelm̧ae juon iaļen kōttōpar me ekar obrak kōn eļap inepata im kapo, ak ilo jekjek eo aō, erom̧ juon rikkure ekar kōm̧m̧an bwe kapen jekjek in aō mour jen ke iar m̧okta. N̄an waanjon̄ak, n̄e kōmij tōkeakļo̧k ilo jikin ko reļļap im jino bar ito-itak, rikkure ro m̧ōtta raar m̧ōkaj in kōņaan bwe in etal im bōk kuņaaō ilo m̧akūtkūt ko reinjuon me rejjab jokkon wōt juon ippānļo̧k jon̄ak ko an gospel in, im ijeļā ejim̧we bwe ikar jab maron̄ mour jim̧or kōn gospel an Zaion im Babylon. Ikar jab maron̄ uwaak “ij ļōmņak kake” n̄an medeke er. Ijoke, iaar aikuj in kapen tōmak eo aō im kōmeļeļeiki etke ijjab kobaļo̧k ippāer.
Vai im kōrā eo ippān, Keala, ilo raan in m̧are eo aer.
Pija in baam̧le eo itok jān rijeje eo
Ikar jeraam̧m̧an bwe ikar m̧are ke ikar pād ilo college. Ke ikar etal n̄an NFL, lio pāleō im nin̄nin̄ eo nejim jiljino allōn̄-rūto̧o̧n ekar pād ippām. Kōmro kar m̧are ilo tampeļ, im ikar jeļā ta meļeļe in bujen ko n̄an eō im ta eo rej kōtmene jān eō. Kōn menin ij aikuj jiron̄ļo̧k rikkure ro aō, “Jaab, ijjab kōm̧m̧ane.” Im ke raar kipel wōt, ikar ba, “kom̧ro kōrā eo ippa kar m̧are ilo m̧weeo im̧ōn Irooj ijo kōmro kar kōm̧m̧ani bujen ko rekwojarjar. Bujen kein eļap aer aorōk ippa jen jabdewōt men.”
Im men eo em̧m̧an n̄e rej kajjitōk kajjitōk ko im raar lukkuun jeļā kain armej rot n̄a, ejja rikkure ro raar jino kōjparok eō im kautiej jon̄ak im bujen ko aō. Ebōk peran n̄an jutak kōn ta eo kwoj tōmak kake im kaorōke.
Jelm̧ae eļap kapo ekar kamijak ilo jinoin, ak pedped ioon Jemedwōj Ilan̄ im keememej kwojarjar im meļeļe eo an bujen ko aō n̄an jelm̧ae eļap inepata ekar jipan̄ eō jutak pen ilo iaļen bujen eo aō. Kwomaron̄ kōm̧m̧ane ejja in wōt ilo jabdewōt jekjek kwoj lo eok make ilo aolepān mour iaļ eo am̧.
Ļoor Rikanaan eo
Ijeļā bwe āinwōt rūm̧man ded ro rainin komij jelm̧ae eļap men ko jab jeļā kaki im mijak kōn jekļaj. Im kwomaron̄ bwilōn̄ ta eo n̄an kōm̧m̧ane im elmen dipļo̧ke. Uwaak eo epidodo tata ej n̄an ļoor tōl eo an rikanaan eo, Būreejtōn Russell M. Nelson. N̄e juon rikanaan an Anij ej kōnono im letok men ko rekkar, epidodo n̄an ļoor kapilōk eo.
Iaar jeļā we Būreejtōn Nelson ekōņaan leļo̧k laajrak in men ko repidodo jemaron̄ kōm̧m̧ani n̄an jutak pen ilo tōmak in ad. Ilo iiō ko ļo̧k, ekar leļo̧k n̄an membōr ro an Kabun̄ in ļalem men ko n̄an kōm̧m̧an n̄an kōkajoorļo̧k tōmak eo ad, ļalem wāween ko n̄an kōļapļo̧k mour in jetōb eo ad, jilu men ko kwoj aikuj kōm̧m̧ane ilo am̧ jino juon iiō ekāāl, im elōn̄ļo̧k.
Ejjab letok juon laajrakin men ko rellōn̄. Men ko reļem waan. Im n̄e kwoj kōm̧m̧ani men kein im jerbali, mour eo am̧ enaaj oktak jen men ko kōm̧m̧ani repidodo. Pedped eo am̧ an tōmak enaaj jutak pen, em̧ool n̄e ewōr jekjek ko rekamijak ilo laļ in. Kōm̧m̧ane men ko im enaaj em̧m̧an am pad. Naaj kōjparok eok.
Ej kakeememej eō kōn bwebwenato eo ilo Kallim̧ur Mokta kōn Neamōn, ritariņae eo ekar lōba. Ekar ilo̧k n̄an ippān Ilaija, rikanaan eo, eo ekar jiron̄ e bwe en ilo̧k im tulo̧k ilo Reba Jordan jiljilimjuon alen. Ritariņae eo ekar ļōmņak e bwebwe, ak armej ro iturin rekar rōjan̄ e bwe en ilo̧k im kōm̧m̧ane. Im ekar wōr an tōmak n̄an ilo̧k im kōm̧m̧ane—men eo epidodo. Im ekar erreeo. (Lale 2 Kiin̄ Ro 5:1–15.)
Baam̧le eo an Elder Sikahema
Likūt Ilju im Jekļaj eo Am̧ ilo Pein Jemed Ilan̄
Kiiō, imaron̄ jab erom̧ juon rire eo etijem̧ļo̧k, ak iaar jeļā men ko n̄an jelm̧ae mijak. Kōn aolep kālet im apan̄ ko kwoj iooni kiiō āinwōt juon rūmman de, ij akweļap ippāmi n̄an kōm̧m̧ane ijo kwomaron̄e n̄an kappukot im kōjparok im̧we eo an Jetōb ilo kwe iien otemjej. Men eo ņe. Āinwōt an kar Būreejtōn Nelson katakin kiiō epaak: “Em̧m̧an eo an kajoor eo ej im̧we jerbal eo enaaj kōm̧akūt m̧aanļo̧k kōj joļo̧k mijak im pere ko rej kōm̧m̧an jān ajedeed in nan̄inmej ko, kōto im ņo ko reļļap, bokkoļo̧k in volcano ko, im m̧akūtkūt in tariņae ko. Kajoor in jetōb eo ej im̧we jerbal eo emaron̄ jipan̄ kōj jutak ņae jodik ko rejjab m̧ūjkōk, renana an rikao eo im bōbrae kijejeto ko an n̄an kakkure pedped in jetōb eo an kajjojo armej.”1
Ke ikar dik im jelm̧ae m̧ool eo n̄an em̧akūt n̄an bar juon laļ ekāāl āinwōt juon ritoitak, ijjab maron̄ antone juon mour ejjeļo̧k wōnāān jab jeļā kake. Ilo aō kar etal wōt n̄an jelm̧ae men ko jab jeļā kake ilo aolepen mour eo aō im kōttōpar eo aō, iaar jeļā bwe āinwōt rijilōk ro an Kraist, jemaron̄ ioon jabdewōt mijak ak kapan̄pan̄ ko pād ilo iaļ in ad.
Ilo am̧ jepool eok make ippān armej ro rem̧m̧an, karōke im jutak kōn tōmak eo am̧, im ļoor rikanaan eo, im ilju eban kamijak. Im kwomaron̄ bun̄m̧aanļo̧k kōn tōmak im joļo̧k mijak ak jab jeļā. N̄e kwoj likūt am̧ ilju jekļaj ilo pein Jemedwōj Ilan̄ eo ej iakwe, kwomaron̄ lōke bwe E enaaj aolep iien pād ijeņ n̄an kwe.