“Kajoor eo n̄an Kōjerkak,” Liaona, Maj. 2023.
Kabwilōn̄lōn̄ ko an Jisōs
Kajoor eo n̄an Kōjerkak
Jemaron̄ jipan̄ kotak ro me rej kōttar lo̧mo̧o̧r eo an Rilo̧mo̧o̧r.
Kakkure. Bar juon alen. Ikar bar wōtļo̧k jān jea eo aō kōn an bōra jillo̧k. Ikar juon rilale wōt, ak ekar ejjeļo̧k aō kajoor n̄an jutak. Tiim eo am ekar lukkuun kajjieon̄. Jet rekar mao. Jet rekar ajukukkuk jān jikin ikkure eo. Ālkin an high school jōkar tiim eo amim luuj im bar luuj, kōm kar jab luuj wōt—kōm kar ebbweer.
Ejja wōt ke inepata eo aō ekar āinwōt anjo̧ ioō, juon iaan leddik ro reddik tata ilo kumi eo ekar aitok jetn̄akin an etetal ļo̧k. Iaar lale kōn jibadbad eo iaar loe ilo turin mejen.
Iaar lale an etal im erlo̧ke pein n̄an kajjojo leddik, ak ejjab ilo wāween kile kōn luuj jen ikkure eo. Ijoke, ekar leļo̧k nōbar n̄an kajjojo, ilo ineam̧m̧an, im tiriam̧o. “Ijjan̄in lukkuun lo am ettōr m̧ōkaj n̄an tōpar ijōņ n̄an aolep pass ko. Ekar game eo am̧ em̧m̧an tata.” Im n̄an eo juon, “Wow, juon game em̧m̧an. Ilo m̧ool, em̧m̧an am̧ ikkure rainin!”
Kōn kajjojo high five, pā e juon pein ekar to an jibwe peier, ilo an pā eo juon pein jibwe aeraer ak den̄etn̄et ne eo emao im emeer in ujoojoj. Imaron̄ in kar en̄jake ke liin ekar ineek juon men ilo e, juon kajoor me ilo juon jekjek ekar bōkļo̧k jān e n̄an būruōn kajjojo ro uwaan kumi eo. Ettōn̄ dikdik ekar jino mejaļļo̧k metak im inepata. Jidik jidik, juon ilo̧k juon, kajjojo rikkure raar jutak kōn juon m̧wil im en̄jake eo ekāāl.
Wōn ej kea kōn mao ko im metak? Wōn ej kea kōn illu im inepata? Ejjeļo̧k juon. Ak elmen an juon maron̄ kotak jabdewōt jān juon jikin an en̄taan n̄an juon jikin kōttōpar im kajoor?
Kōtļo̧k bwe in kwaļo̧k jet men ko iaar jeļā kōn kajoor eo an Rilo̧mo̧o̧r n̄an ļōn̄aj im kile ad maron̄ jipan̄, āinwōt ro m̧ōtta ilo tiim in jōkar.
Ilo Kallim̧ur Ekāāl, jej riit kōn bwebwenato in ilaļ kōn leddik eo nejin Jairōs.
“Im lo, juon iaan ri lale iṃōn kweilọk ej itok n̄an Ippān, etan Jairōs, ke ej loe, ej bun̄ ṇa iturin neen,
“Im eḷap an jar im akweḷap ñan E im ba, “Nejū leddik ej nañinmej wōt jidik; Kwōn itōm likūt Peoṃ ṇa ioon, bwe en jako an nan̄inmej, im en mour.
“Im Jisōs ej ilo̧k ippānļo̧k” (Mark 5:22–24).
“Im Jisōs ej ilo̧k ippānļo̧k”
Em̧m̧an ippān ļain eo “Im Jisōs ej ilo̧k ippānļo̧k” (Mark 5:24). Kabwilōn̄lōn̄ eo kar jab bōk jikin. Ilo m̧ool, emaron̄ jidik rum̧wij m̧okta jen an kar baam̧le eo bōk ta eo raar kajjitōk kake. Bōtaab Kraist em̧ōj an kar kadede pād ilo iaļ eo ippāer.
N̄e jej aikuji ta eo jejjab maron̄ in kōm̧m̧ane n̄an kōj make, jemaron̄ lōke bwe Jisōs ej itok. Im jemaron̄ lōke bwe ilo ad kōttar ilo tōmak kōn kabwilōn̄lōn̄ ko An ilo mour ko ad kōņ ro jej iakwe er, E enaaj jipan̄ kōj. E enaaj etetal ipped ilo aolepen inepata im mijak im būrom̧ōj me remaron̄ kōttar kōj ilo iaļ ej tōlļo̧k kōj n̄an bōk anjo̧.
“Kwōn itōk likūt Peom̧ ņa ioon”
Kōmour ejjab ad n̄an leļo̧k, ak āinwōt Jairōs, jemaron̄ bōktok Jisōs Kraist, Maajta in Kōmour eo, n̄an ro jej iakwe er. Jairōs ekar jeļā bwe pein Rilo̧mo̧o̧r emaron̄ kotak jabdewōt jān juon jikin an en̄taan n̄an juon jikin kōttōpar im kajoor.
Ikar loe ippān rileļo̧k meram rikkure soccer eo am. Liin ekar kwaļo̧k meram eo an Kraist ilo juon jikin ikkure soccer im kōtļo̧k An kōm̧m̧ane kōmour eo An. N̄an kotak meram eo An, liin ekar jipan̄ aiintok Israel.
Kajjojo iaad enaaj aikuj lo̧mo̧o̧ren ro jet ijelo̧kin kōj make. Mekarta m̧ōjņo̧ eo me emaron̄ kar lo an ilo̧k jān kōm, kōm maron̄ lōke bwe Jemedwōj Ilan̄ ekar letok Rilo̧mo̧o̧r eo me emaron̄ jipan̄ kōjerkak kōj jān ebbweer. Im jemaron̄ bōk koņaad Ippān, ejja āinwōt an ri soccer eo m̧ōtta kar kōm̧m̧ane.
Ak ta eo n̄e men ko renana rej nana ļo̧k wōt ilo iien eo kwoj kōttar an itok kōjeraam̧m̧an ko An?
“Etke kwōj kam̧ōk wōt Ri Kaki ņe?”
Ke Kraist ekar ilo̧k n̄an imweo im̧ōn Jairōs, E ekar rum̧wijļo̧k. Iaļ ko raar obrak, im ke E ekar kajjieon̄ ilo̧k ilo iaļ eo An ļok, juon kōra eļap tōmak ippān, eo ekar barāinwōt kōttar E kōn pein An kemour, kar un̄ur nuknuk ko An.
“Bwe e ba, eļan̄n̄e I naaj un̄n̄ūr wōt jidik nuknuk ko An, I naaj mour.
“Im e m̧ōkaj an m̧ōrā unin bōtōktōkin, im ej en̄jake ilo ānbwinnen bwe ej mour jān nan̄inmej eo an” (Mark 5:28–29).
Ewi jon̄an an Jairōs būrom̧ōj? Ewi jon̄an illu kōn rum̧wij? Ke ej etal jen m̧weeo im̧ōn, leddik eo nejin em̧ōj an mej. Innām, ke Rilo̧mo̧o̧r ekar kappukot kōrā eo ekar mour im kar kōnono ippān, juon jān m̧weo im̧ōn Jariōs ekar jikrōktok kōn naan ko rejjab em̧m̧an: “E mej ledik eo nejim̧. Etke kwōj kam̧ōk wōt Ri Kaki ņe?” (Mark 5:35).
Ej juon kōjeraam̧m̧an n̄an kōrā eo eto an kar kōttar! Ak ej juon kabūrom̧ōjm̧ōj n̄an Jairōs im baam̧le eo an, ro ejjeļo̧k aer iien n̄an kōttar! Jet iien n̄e jej pād ilo kōttar, emaron̄ pen n̄an dāpij kōjatdikdik bwe E ej itok. Ak n̄an Jairōs im baam̧le eo an, kiiō ekar āinwōt elukkuun rum̧ij n̄an kōjatdikdik kōn kabwilōn̄lōn̄ eo raar aikuji. Leddik eo nejin emej. Etke Kwōj Kam̧ōk wōt Ri Kaki ņe?
Etke? Kōnke jon̄an eo ejabwe jet iien jej likūti ilo kabwilōn̄lōn̄ ko an Rilo̧mo̧o̧r ejjeļo̧k meļeļe in. E ejjab lokjak n̄an iien ko ad, ak An kajoor ejjab kōm̧m̧an jon̄an jān meļeļe eo ad kōn ta eo epidodo.
Eļan̄n̄e jenaaj reilo̧k kōn mejen tōmak ilo ad kōttar, jenaaj lukkuun jeļā bwe An lo̧mo̧o̧ren ej itok (lale Alma 58:11). Jeļā kein remaron̄ ukōt būruwōd im kapen tōmak eo ad ilo E. Jekdo̧o̧n eļan̄n̄e ej āinwōt iien eo em̧m̧an ekar eļļāļo̧k, E ej itok wōt; iien eo am̧ enaaj kōttar.
The Rising of Jairus’ Daughter [Jerkak eo an Leddik eo nejin Jairōs], jān Gabriel Max / Peter Horree / Alamy Stock Photo
“Kwōn jab lōļn̄o̧n̄, kwōn tōmak wōt”
Ilo iien eo em̧ōkaj tata ke Rilo̧mo̧o̧r eo ekar ron̄ ennaan eo enana, E ekar jiron̄ Jairōs, “Kwōn jab lōļn̄o̧n̄, kwōn tōmak wōt” (Mark 5:36). Naan ko an Rilo̧mo̧o̧r n̄an Jairōs ej kwaļo̧k An kōņaan bwe jen kōttar. Jerbal in karejar eo An eaar jab bōjrak, men̄e jej kōm̧m̧ane. Eaar m̧ōkajin rōjan̄ Jairōs bwe en tōmak.
“Im ke Ej deḷọn̄, E ba n̄an er, Etke koṃij iruj im jan̄? Ledik ṇe e jab mej, a ej kiki. …
“Im Ej kabwijere ledik eo kōn pein, im ba n̄an e, Talita kumi; ukōtōn naan in, Leddik, ij ba n̄an eok, kwōn jerkak” (Mark 5:39, 41).
Kworon̄ ke? “Ej kabwijer ledik eo kōn pein.” Ewōr kajoor ilo Pein. Būreejtōn Howard W. Hunter (1907–95) ekar bar juon iien, “Jekdo̧o̧n ta eo Jisōs ej likūt pein ioon ej mour.”1 Ta eo jemaron̄ kōm̧m̧ane bwe en em̧m̧anļo̧k ad bōk An pein kōmour? Im elmen ad maron̄ An pein kōmour n̄an kotak ro jet ilo iien ko reppen im iien ebweer?
“Im e m̧ōkaj an ledik eo jerkak im etal”
Im em̧ōkaj an mour leddik eo nejin Jairōs: “Im e m̧ōkaj an ledik eo jerkak im etal” (Mark 5:42). Mour in naaj bōktok apan̄ ko me jej aikuj diplo̧ki. N̄an kōj kajjojo, mālijjon̄ ko an kajjojo rein juon im oktak jān doon—jān ebbweer ālkin juon luuj ilo jikin ikkure eo n̄an luuji juon eo ejitōnbōro. En̄taan enaaj ilo m̧ool itok. Bōtaab E ejjamin naaj joļo̧k kōj, jekdo̧o̧n ewi kamijak in ak jem̧ļo̧kin jekjek ko remaron̄ in āinwōt. Jet iien, E ej kōtļo̧k ad dipuk apan̄ ko bwe En erļo̧ketok Pein im leļo̧k mour.
Kōn wōt Pinmuur eo An—jenkwan dila ko ilo lo̧piden pein—Ej kwaļo̧k n̄an kōj jej ro An rikarejar: “Lo, Iaar jeje etam̧ ioon lo̧piden pā ko peiū” (1 Nipai 21:16). Jerbal in karejar eo an Kraist ekar, ej, im iien otemjej naaj n̄an kōjerkak kōj jān mej an kanniōk im jetōb eo jejjab maron̄ ko jāne, im ej kapidodoik kōn en̄taan in pinmuur eo An.
N̄e būrom̧ōj im apan̄ ko rej waļo̧k, jemaron̄ lo pein me ej bōktok kōkaļļein kajjojo nōbar ejjab wōt ilo jouj im iakwe ak kajoor n̄an anjo̧. Kōjerbal tōmak ilo E, jepļaaktok eo ededeļo̧k jen Rilo̧mo̧o̧r eo an laļ enaaj anjo̧ ilo ta eo jej jelm̧ae.
Im jemaron̄ kōm̧m̧ane Ta eo ekar kōm̧m̧an n̄an ro jet ro rej aikuji E.
Ij kam̧ool bwe kajjojo iaad enaaj jerkak jān m̧ōjņo̧ ko ad make im āliktata lōb eo. Keememej, jekdo̧o̧ņ eļan̄n̄e aolep rej en̄jake jōbwābwe, E ej pād im ej erļo̧ke pein kajoor in lo̧mo̧o̧r ko Pein. Lōmņake m̧ōņōņō eo enaaj itok ilo An erļo̧k Pein n̄an eok im ba, “Ij ba n̄an eok, kwōn jerkak.” Im jenaaj jerkak.