“Ke Mour eo Aō Ekar Marok, Ikar Oktakļo̧k n̄an Kraist,” Liaona, Maj. 2023.
Rūm̧m̧an Ded ro
Ke Mour eo Aō Ekar Marok, Ikar Oktakļo̧k n̄an Kraist
Ilo an lōn̄ men ko renana rej waļo̧k ipeļakid, ikar jab jeļā ta meļeļe in n̄an wōr juon pedped ilo Kraist.
Pija jān Getty Images, pija jān model
Ilo kweilo̧k eo eļap ej kab jem̧ļo̧k, Būreejtōn Henry B. Eyring, Rikakpilōklōk eo Kein Karuo, ekar kōnono kōn iien ko renana ilo laļ in: “Rijilōk Paul ekar jeje n̄an Timote, ‘Men in, bwe ilo raan ko āliktata iien ko re nana renaaj waļo̧ktok’ (2 Timote 3:1).
“… Im enaaj jino penļo̧k, eban pidodo, n̄an kōjparok bujen ko jej aikuj kōm̧mani im kōjparoki n̄an mour kake ilo gospel in an Jisōs Kraist.”1
Ke iaar ron̄ naan kein, iaar mijak. Em̧ōj aō jino ioon apan̄ ko ilo m̧weeo im̧ō ilo Venezuela. Kōn menin kajjitōk ko āinwōt, “Ekōjkan aō maron̄ kije wōt ke laļin elukkuun marok?” im “Ekōjkan aō maron̄ reim̧aanļo̧k kōn juon ilju jekļaj emeram ilo kain tōre emarok?” raar pād ilo būruō ilo iien eo.
Ak Būreejtōn Eyring ekar kwaļo̧k uwaak eo. Ekar kout jān Hilamōn 5:12, eo ekar kōnono n̄an kalōk pedped eo ad “ioon ejm̧aan eo ad Rilo̧mo̧o̧r, eo ej Kraist.”
Iaar aolep tōmak bwe eoon in ekar m̧ool, bōtaab kalōk pedped eo aō ilo Rilo̧mo̧o̧r eo ekar āinwōt eļap an pidodo ba jān kōm̧m̧ane. Ijo wōt ke, ke ikar epaakeļo̧k Kraist, ikar lo bwe aolep men rej jerbal n̄an em̧m̧an eo am̧ n̄e am̧ tōmak ej ped ilo E (lale Katak im Bujen Ko 90:24).
En̄jake Jojoļāār
Jet allōn̄ ko remootļo̧k, iaar bōk juon ennan ekabūrom̧ōjm̧ōj jān baam̧le eo aō. Men otemjej ilo mour eo aō raar jab jetjet. Iaar en̄jake an mej ānbwinnū, pok, im lukkuun inepata jon̄an ikar nan̄inmej!
Ikar jab meļeļe etke jej jelm̧ae kain apan̄ rōt kein ke ikar kajjieon̄ in tiljek. Ikar bwilōn̄ elan̄n̄e ikar kōm̧m̧ane juon men ebōd. Jekļaj eo ekar ejjeļo̧k kōjatdikdik ie, im ikar en̄jake jojoļāār jān Jemedwōj Ilan̄ im Jisōs Kraist.
Ilo io̧ļapen apan̄ ko aō, iaar kōnono ippān eo m̧ōtta em̧m̧an. Eaar ba n̄an eō jet men iban meļo̧kļo̧ke: “ij ļōmņak jekjek in ej juon eddo em̧m̧an n̄an eok n̄an kōļmenļo̧kjeņ kōn kadkad eo am̧ make ippān Irooj. Jekdo̧o̧n ta eo ej waļo̧k, ej am̧ pepe n̄an oktakļo̧k n̄an E kōn jipan̄. Eļan̄n̄e kwoj kōm̧m̧ane, E enaaj lewaj n̄an eok kōn iakwe im aenōm̧m̧an eo kwoj aikuji kiiō.”
Naan kein raar ukōt kōļmenļokjeņ eo aō. Ikar illu im metak im pok kōn jekjek ko aō, ak ewōr juon aō kālet. Jekdo̧o̧n ta eo je dibuki, ta mijak ko ewōr ippād, ak ta men ko reppen jej jelm̧ai, Jisōs Kraist ej iien otemjej pād itūrid. Ewōr ad kālet n̄an oktak ļo̧k n̄an E kōn tōmak, ejjab aolep iien jān E, ilo tōre ko renana.
Bwe en̄in ej wāween ad kōkajoorļo̧k pedped in tōmak eo ad ilo E im jutak ņae apan̄ eo ilo laļ in. Kōn Kāālet E.
Āinwōt an Elder D. Todd Christofferson jān Doulul eo an Jon̄oulruo Rijilōk ro kar katakin: “ilubwiljin kijeek in kōkm̧anm̧anļo̧k im karreo in, ijjeļo̧kin ad illu ippān Anij, jen epaakeļo̧k Anij. Kūr Jemān ilo etan Nejin. Etetal Ippāer ilo Jetōb, jen raan n̄an raan. Kōtļo̧k bwe Ren kwaļo̧k Aer m̧ool n̄an eok. Itok ilo m̧ool n̄an jeļā Er im ilo m̧ool jeļā wōn kwe make.2
Kraist ekar kōttar eō n̄an oktakļo̧k n̄an E kōn jipan̄. Ejjab meļeļe in E enaaj kar kōm̧m̧an bwe aolep inepata ko aō ren jako ak ņa mejļan aolep men ilo mour eo aō im baam̧le eo ilo iien eo em̧ōkaj tata, bōtaab E ekar jipan̄ eō erom em̧m̧anļo̧k, lo lan̄lōn̄, im erom bar kāāl.
Ilo iien ko, ilo aō kappukōt Rilo̧mo̧o̧r eo kōn jar, ekkatak jeje ko rekwojarjar, im tōmak, E ekar jipan̄ eō jeorļo̧k an ro uwaan baam̧le eo aō bōd im karuwaineneitok lan̄lōn̄ eo n̄an mour eo aō bar juon alen, em̧ool men̄e jet apan̄ ko rejjan̄in de ņa mejļan.
Juon Kallim̧ur kōn Jokane
Raan kein rej ilo m̧ool raan ko āliktata renana. Jej ron̄ kōn tariņae im pata ko, nan̄inmej ko, m̧akūtkūt in laļ ko—im ijeļā enaaj wōr iien ko reppen repād im̧aan. Ijoke, ekkal ioon ejmaan eo me ej Jisōs Kraist im lōke E enaaj aolep iien letok n̄an kōj aenōm̧m̧an im m̧ōņōņō, jekdo̧o̧n ta eo jej ioone. Āinwōt an Būreejtōn Eyring kar bar katakin, “N̄an ro rej inepata kōn kōj make im kōn ro jej iakwe, ewōr kōjatdikdik ilo kallim̧ur eo Anij emōj an kōm̧m̧ane kōn juon jikin kōjparok ilo ļan̄ ko im̧aan.”3
Ej juon kallim̧ur ekajoor im aiboojoj. Em̧ōj aō loe an kōjeraam̧m̧an kein kūrm̧ool ilo mour eo aō. Ijeļā bwe en̄in ej gospel eo em̧ōj an jepļaaktok an Jisōs Kraist im bwe E ej unjen aolep kōjeraam̧m̧an. E ej meram eo, E ej ad Rilo̧mo̧o̧r, im jej sip ko An. Jān kālet E im kālet tōmak.
Rijeje eo ej jokwe ilo Zulia, Venezuela.