Paglakaw diha sa Dalan sa Pakigsaad uban sa Atong mga Pamilya

Elder Carlos G. Revillo Jr.

General Authority Seventy

(Gikuha gikan sa Nobyembre 20, 2023 nga “Duol Ngadto Kang Kristo: Ako Moadto, Ako Moserbisyo” nga Fireside sa Kapangulohan sa Area nga gipahigayon sa tugkaran sa Lahug Meetinghouse sa Cebu)

Minahal kong kaigsoonan karon ang timaan sa usa ka bag-ong sinugdanan kon kita subli nga mopasalig sa atong kaugalingon sa pagpabilin diha sa dalan sa pakigsaad ug sa pag-sangyaw sa ebanghelyo ni Jesukristo gamit ang gibag-o nga kadasig. Ang “Duol ngadto kang Kristo: Ako Moadto, Ako Moserbisyo” nga inisyatibo nga gilunsad karong adlawa mao ang magpasugod sa bag-o nga panahon sa pagdugang sa pagka-espirituhanon ug sa tibuok kinabuhi nga pagkadisipulo, dili lang tali sa atong batan-on nga katawhan apan sa tibuok nga mga pamilya usab.

Si Elder Renlund mihulagway kon unsa ang nahitabo sa Pilipinas isip ang punto sa pag-usab sa direksiyon sa Kasaysayan sa Simbahan dinhi sa atong minahal nga yuta. Ang punto sa pag-usab kon sa matematika pa mao ang punto diin ang pagkurba sa usa ka function mousab og direksiyon. Sa tinuod nga kalibotan, ang punto sa pag-usab sa direksiyon mahimo usab nga ihulagway isip ang sinugdanan sa bag-ong butang ug nga ang mga butang nagsugod sa pagkausab. Ang punto sa pag-usab sa direksiyon mahimong mao ang timaan sa pagsugod sa paglambo.

Si Presidente Nelson naghisgot mahitungod sa Espirituwal nga paglambo diha sa iyang pakigpulong sa Abril 2022 nga Kinatibuk-ang Komperensiya. Kita nakabaton og paglambo dinhi sa Pilipinas uban sa makasaysayanon nga gidaghanon sa kalalakin-an ug kababayen-an kinsa mitubag sa tawag sa pagserbisyo og misyon. Gikan sa nagsaka nga gidaghanon, ato usab nga nakita ang misyonaryo nga mas andam na sa pag-adto sa nataran.

Sa samang mensahe nga iyang gihatag sa miagi nga Abril, si Presidente Nelson nag-ingon nga usa sa mga aksiyon nga atong mahimo nga makatabang kanato nga makapabilin og positibo nga espirituwal nga paglambo mao ang “pagsubay sa dalan sa pakigsaad ug magpabilin didto.”

Alang niadtong kinsa lagmit aduna pa gihapoy mga pangutana mahitungod sa unsa gayod ang gipasabot sa dalan sa pakigsaad, atong kining himay-himayon ug analisahon ang matag pulong.

Ang “pakigsaad” o “tipan” sa Tinagalog mao ang usa ka sagrado nga kasabotan tali kanato ug sa Dios. Ang Dios nagtakda og piho nga mga kasabotan, ug Siya misaad sa pagpanalangin kanato kon atong tumanon kadto nga mga kondisyon.

Ang “dalan” mahimong nagpasabot sa pisikal nga agianan padulong ngadto sa piho nga destinasyon, apan niining kahimtanga, ang dalan sa pakigsaad nagpasabot ngadto sa lain-laing mga ordinansa nga nagtimaan sa dalan alang kanato aron makabalik ngadto sa presensiya sa atong Langitnong Amahan. Ang mga pakigsaad nagmarka sa dalan balik ngadto sa Dios. Kining sagrado nga mga buhat gihimo pinaagi sa awtoridad sa pagkapari ug gibutang sa lainlaing higayon sa tibuok sa atong kinabuhi isip importanteng mga panghitabo. Ang tanang makaluwas nga mga ordinansa sa pagkapari giubanan og mga pakigsaad.

Ang dalan sa pakigsaad naglakip sa:

Pagpabunyag.
Pagdawat sa gasa sa Espiritu Santo.
Mga ordinasyon sa Pagkapari; ug
Pag-adto sa templo aron sa pagdawat sa atong pagtuga ug pagpasilyo diha sa kaminyoon

Hinumdomi lang nga kon samtang mopadayon kamo sa panaw sa inyong kinabuhi karon, si Jesukristo magauban kaninyo. Siya nagmahal kaninyo ug siya mohatag kaninyo og mga tigtabang sa pagpadayon diha sa dalan pinaagi sa inyong mga ginikanan, sa inyong mga lider, ug sa inyong mga higala. Kita dili maglakaw niini nga dalan nga mag-inusara. Ang mga pakigsaad nagbugkos kanato ngadto sa atong Manluluwas nga si Jesukristo. Sama sa talagsaong gitudlo ni Elder Bangerter kanato kaganina, atong madawat ang makapalig-on ug makaabag nga gahom ni Kristo samtang atong gibugkos ang atong mga kaugalingon ngadto kaniya pinaagi niini nga mga pakigsaad.

Sama sa gisaad sa Manluluwas kanato diha sa Juan 15:10-11 — “Kon tumanon ninyo ang akong mga sugo, magpabilin kamo sa akong gugma; sama nga ako nagtuman sa mga sugo sa akong Amahan ug nagpabilin sa iyang gugma. Gisultihan ko kamo niini aron mabatonan ninyo ang akong kalipay ug mahingpit ang inyong kalipay.”

Ako modapit kaninyo nga sulayan ang iyang saad. Magpabilin nga matuod sa inyong mga pakigsaad. Sunda ang mga sugo. Apil sa Grupo sa Kabatan-onan sa Ginoo ug motabang sa uban nga moadto sa dalan sa pakigsaad pinaagi sa pagpaambit sa ebanghelyo ngadto kanila. Sa pagbuhat sa ingon, kamo magpabilin diha sa iyang gugma, ug inyong kalipay mahimong hingpit.

Sa paghandom sa nanglabayng panahon, akong nakita nga ang lain-laing hugna sa akong kinabuhi ug sa akong panaw diha sa dalan sa pakigsaad mahimong ikatandi sa atong bag-o nga logo:

Nagdako ko sa panimalay nga Santos sa Ulahing mga Adlaw diin ang ehemplo sa akong mga ginikanan nakadasig kanamo sa pagduol ngadto kang Kristo,
Ang pagka-aktibo diha sa Simbahan nakatabang kanako nga makabaton og usa ka pagpamatuod ug usa ka tinguha sa pagserbisyo sa uban,
Miadto ko sa templo ug miserbisyo og usa ka full-time nga misyon.
Naminyo ko sa templo ug miserbisyo sa Ginoo sa nagkadaiya nga mga calling,
Sa matag lakang, dili igsapayan kon unsa nga nasod kami nagpuyo, ang among pamilya sa Simbahan anaa sa pagtabang kanamo nga mabuntog ang bisan unsa nga mga hagit nga among giatubang

Ug ang panaw diha sa dalan sa pakigsaad nagpadayon. Kami gusto nga makasiguro nga ang mga tradisyon sa ebanghelyo nga anaa kanamo mapasa ngadto sa among mga anak, sa ilang mga anak, ug padayon pa.

Kon kitang tanan mobuhat sa atong bahin sa pagsuporta niining bag-o nga panan-awon, akong nakita nga mas daghan pa sa atong mga batan-on nga mga katawhan ang makabaton og susama nga mga kasinatian nga akong naangkon, makatagamtam sa samang mga panalangin nga akong nadawat, ug susama nga nagbuhat sa ilang labing maayo sa pagpalambo sa gingharian sa Dios niini nga bain sa ubasan.

Isip mga ginikanan, unsaon nato sa pag-andam ang atong mga anak alang sa tibuok kinabuhi diha sa dalan sa pakigsaad sa Dios? Tungod kay Siya nahigugma kanato, misalig kanato, ug nahibalo sa atong potensiyal, ang Langitnong Amahan mihatag kanato sa oportunidad sa pagtabang sa atong mga anak nga mosulod ug mouswag subay sa Iyang dalan sa pakigsaad, ang dalan paingon ngadto sa kinabuhing dayon (tan-awa sa Doktrina ug mga Pakigsaad 68:25–28).

Adunay daghang paagi sa pag-andam sa atong mga anak alang niining panaw diha sa dalan sa pakigsaad, ug ang Langitnong Amahan motabang kanato sa pagdiskobre sa labing maayong paagi sa pagtabang kanila. Samtang magtinguha kita og inspirasyon, timan-i nga dili tanang pagkat-on mahitabo atol sa gitakda nga mga leksiyon. Sa pagkatinuod, kabahin sa unsay nakapahimo sa pagkat-on diha sa panimalay nga gamhanan kaayo mao ang oportunidad sa pagkat-on pinaagi sa ehemplo ug pinaagi sa ginagmay, yano nga mga gutlo—ang matang nga natural nga mahitabo diha sa dagan sa inadlaw nga pagpakabuhi. Sama lang nga ang pagsunod sa dalan sa pakigsaad usa ka makanunayon, tibuok kinabuhi nga proseso, mao usab ang pagkat-on mahitungod sa dalan sa pakigsaad.

Ania ang pipila ka mga butang nga atong mahimo sa atong pamilya aron mosubay ug magpabilin diha sa dalan sa pakigsaad:

Sa higayon nga kita makabaton og kasinatian nga makapalig-on sa atong hugot nga pagtuo diha sa Langitnong Amahan ug ni Jesukristo, ipaambit kini sa atong anak.
Kon ang atong anak makahimo og sayop nga pagpili, ikalipay ang pagsulti sa gasa sa paghinulsol.
Sa higayon nga kita makamatikod nga ang atong anak nagbuhat sa butang nga gisaad niya nga buhaton, ihatag ang sinsero nga pagdayeg. Itudlo nga ang pagtuman sa mga pasalig makatabang kanato nga maandam sa pagtuman sa mga pakigsaad.
Himoa ang sakramento nga usa ka sagrado ug malipayon nga kalihokan diha sa pamilya.
Himoa ang mga ordinansa sa pagkapari nga mahimong kabahin sa atong pamilya.
Isip mga ginikanan, ipakita ang ehemplo pinaagi sa paghupot og bag-o nga mga rekomend sa templo ug kanunay nga moadto sa templo.
Itudlo sa atong mga anak kon unsa ang kinahanglan nilang buhaton ug sa unsang paagi sila magpakabuhi aron makadawat og usa ka rekomend sa templo ug takos nga moapil diha sa mga puli nga bunyag.
Pagpakita og litrato sa templo diha sa panimalay. Kanunay nga mahisgot mahitungod sa templo diha sa atong Dali, Sunod Kanako nga mga sesyon sa pagtuon ug atol sa family home evening.
Modawat og patriyarkal nga panalangin. Ipaambit ang atong Patriyarkal nga Panalangin ngadto kanila ug tabangi sila nga maandam sa pagdawat sa ilang kaugalingon.
Moserbisyo og misyon. Kon kamo nakaserbisyo og misyon, dayag nga maghisgot mahitungod sa imong mga kasinatian. O magdapit og mga higala o mga sakop sa pamilya kinsa nakaserbisyo og mga misyon aron maghisgot mahitungod sa ilang misyon. Makahisgot usab kita mahitungod sa mga paagi nga kita mipaambit sa ebanghelyo ngadto sa uban sa tibuok natong kinabuhi. Tabangi ang atong anak sa paghunahuna og mga paagi nga siya makapaambit sa ebanghelyo.
Paapila ang inyong pamilya samtang kamo mangalagad ngadto sa uban. Palamboa ang inyong mga calling.

Ang panimalay nga nakasentro sa ebanghelyo, nga gipasiugdahan sa matarong nga mga ginikanan, mao ang labing maayo nga dapit alang sa nagtubo nga henerasyon aron makasubay ug magpabilin diha sa dalan sa pakigsaad.

Ang maayo nga ehemplo niini mao sila si Erick ug Gloria Corazon Andrada gikan sa San Fernando, La Union. Ang ilang duha ka mga anak nga lalaki kabahin sa 4600 nga mga misyonaryo kansang tinguha sa pagserbisyo wala mapugngi sa pandemya.

Isip mga ginikanan, sila natural nga mibati og mga kahadlok alang sa ilang panglawas ug siguridad, apan ang ilang hugot nga pagtuo mas lig-on, ug ang ilang pagsalig sa Dios hingpit, busa sila mihatag sa ilang mga anak nga lalaki sa ilang hingpit nga suporta ug pagdasig.

Ang ilang mas magulang nga anak si Alvin Joshua mipauli niadtong Hulyo 2022 human nakaserbisyo sulod sa duha ka tuig didto sa Philippines Baguio Mission. Siya orihinal nga natawag sa pagserbisyo didto sa Manchester, England apan tungod sa mga restriksiyon sa biyahe gidestino siya og usab ngadto sa misyon sa iyang natawhan. Ang ilang ikaduha nga anak si Dallin Ivan kasamtangan nga nagserbisyo sa Philippines Quezon City Mission. Akong nahimamat si Elder Andrada sa dihang bag-o lang nakong gilibot ang ilang misyon. Maayo kaayo siya nga nagbansay sa usa ka bag-o nga misyonaryo.

Si Brother Andrada nag-ingon: “Isip mga ginikanan gusto lang namo nga ang among mga anak magmalipayon, ug nakaplagan nila kini samtang nagserbisyo og full-time nga mga misyon. Dili gayod namo ikabaylo og bisan unsang butang ang kalipay nga ilang nabati ug naangkon gumikan sa pagserbisyo sa Ginoo. Ang pagpadala kanila sa pagserbisyo og mga misyon bisan pa sa pandemya nahimong usa ka maalamon ug dinasig nga desisyon.”

Alang ni Brother ug Sister Andrada, ang labing maayong paagi sa pag-andam sa ilang mga anak sa pagserbisyo og mga misyon mao ang pagpahimong mga ehemplo sa mga tighupot sa pakigsaad kinsa nagserbisyo ug malipayon nga nangalagad. Sila modapit sa mga misyonaryo alang sa family home evening, mohatag kanila og mga referral, ug sila motabang ug mosuporta sa mga young adult sa ilang ward samtang mangandam sila sa pagserbisyo og misyon.

Sila nagtambag sa mga ginikanan nga dili unahon ang mga akademiko ug mga karera labaw pa sa seminary, pagtambong sa FSY, ug pagserbisyo og mga misyon. Sumala ni Sister Andrada, “ang eskwelahan mag-andam kanila alang sa kinabuhi, ang misyonaryo nga pagserbisyo mag-andam kanila alang sa kahangtoran. Ang among anak mipauli nga mas mahigugmaon ug mas maamumahon nga tawo. Hingpit siya nga nausab sa iyang misyon, ug siya nakakaplag sa matang sa kalipay nga mapangandoy lang sa bisan kinsa nga ginikanan alang sa ilang anak.”

Salamat sa tanang Erick ug Gloria Andradas sa Simbahan sa pag-andam ug pagtabang sa inyong mga anak sa pagduol ngadto kang Kristo, paghimo ug pagtuman sa mga pakigsaad ug pagserbisyo og full-time nga misyon. Ako modapit kanatong tanan sa pagsunod sa ilang ehemplo.

Usa kini ka espesyal nga panahon sa kasaysayan sa Simbahan sa Pilipinas. Ang Ginoo mibu-bo sa Iyang mga panalangin ug mihatag og daghang mga milagro ngari kanato. Ako mosaksi nga samtang kita moduol ngadto kang Kristo, mohimo, ug motuman sa atong mga pakigsaad ngadto Kaniya, ug mosebisyo Kaniya, atong mabuntog ang kalibotan ug makakaplag og mas dakong kalinaw ug tinuod nga kalipay sa atong kinabuhi. Sa ngalan ni Jesukristo, Amen.