“Angay ba Nakong Taposon ang Akong Misyonaryo nga Pagserbisyo?”

Sa usa ka punto sa iyang misyon, si Elder Ramirez hapit nang moundang human nakasinati og trahedya, apan ang iyang pasalig ngadto sa dalan sa pakigsaad nakapabilin kaniya nga lig-on.

Niadtong Hunyo 2019, usa ka 17-anyos nga estudyante sa high school sa Mercedes, Camarines Norte, ginganlan og Angelbert Ramirez gidapit sa duha ka higala, si Jessie Jean King ug Trishia Mae Juntilla, sa pag-enroll diha sa programa nga gitawag og “seminary” ug sa pagtambong og usa ka party sa kabatan-onan. Nakuryoso, si Angelbert midawat sa imbitasyon.

Samtang siya nakighalubilo sa uban nga mga estudyante sa seminary, ang batan-on nakasinati og dili mahulagway nga pagbati. “Naganahan gyod ko nga nakaangkon og kahibalo mahitungod ni Jesukristo,” mihinumdom si Angelbert, “ug gibati gyod nako nga gimahal sa mga tawo nga nagpalibot nako.” Tulo ka bulan ang milabay, niadtong Septyembre 7, si Angelbert Esplana Ramirez nabunyagan sa Ang Simbahan ni Jesukristo sa mga Santos sa Ulahing mga Adlaw.

Si Brother Ramirez misulod ngadto sa dalan sa pakigsaad, bisan kon kini nagpasabot nga siya lang ang Santos sa Ulahing mga Adlaw sa iyang pamilya. Gitawag siya sa pag-atiman sa mga senina sa bunyag, ug mitabang sa full-time nga mga misyonaryo isip tig-abi-abi. Si Brother Ramirez mipatalinghog sa tawag sa Ginoo sa pagserbisyo og misyon—apan dili kadto sayon.

“Sa dihang akong gisultihan ang akong pamilya sa akong tinguha, nasagmuyo sila,” mitug-an siya. Nag-ampo og maayo si Angelbert ug miduol sa iyang mga ginikanan sa kataposang higayon; milagro kaayo, sila miuyon. Niadtong Enero 2022, si Elder Angelbert Ramirez misugod sa pagserbisyo didto sa Philippines Antipolo Mission.

Napulog duha pa lang ka semana sa iyang misyon, si Elder Ramirez midawat og usa ka makapaguol nga mensahe: ang iyang amahan namatay. Si Elder Ramirez gitugtan sa pag-uli sulod sa pipila ka adlaw, apan, nasagmuyo ug nawad-an og kadasig, namalandong siya kon mopadayon ba sa pagserbisyo o taposon na lang ang iyang misyonaryo nga pagserbisyo. “Ngano man, Langitnong Amahan? Ngano man?” ang junior nga misyonaryo nagpadayon sa pagpangutana sa iyang kaugalingon, “Samtang ako nagserbisyo man Kaniya?”

Samtang nanglimbasog siya sa iyang mga hunahuna nahinumdoman ni Elder Ramirez kon unsa ang gisulti ni Elder Jeffrey R. Holland sa Korum sa Napulog Duha: “Ayaw pag-undang. Magpadayon ka. Magpadayon ka sa pagpangingkamot. Adunay tabang ug kalipay sa unahan... Mamaayo ra kini sa kataposan… Pipila ka mga panalangin moabot ra sa dili madugay, ang uban moabot ulahi… apan alang niadtong mihangop sa ebanghelyo ni Jesukristo, kini moabot.”

“Kadto nga mga pulong nakahatag kanako og paglaom ug kahupay,” misulti si Elder Ramirez. “Nawala ko ug nahugno, ug Siya mihupay kanako.” Si Elder Ramirez mibalik ngadto sa natad sa misyon. “Ang pagkahibalo sa Plano sa Kaluwasan nakatabang kanako nga maulian,” dugang pa niya, “ug ako nasayod nga akong makita pag-usab ang akong amahan.”

Samtang si Elder Ramirez nagpadayon sa pagserbisyo sa Ginoo, naglaom siya nga ang uban mosunod usab diha sa dalan sa pakigsaad: “Ako nasayod nga ang Langitnong Anahan adunay labing maayo nga plano alang sa matag usa kanato.”