Boton te Euangkerio

Tibwauaakin Ana Euangkerio Iesu Kristo

Ngkana ti iangoa taekan te kakabwaia are ti karekei ibukina bwa ngaira kaain Ana Ekaretia Iesu Kristo ibukiia Aika Itiaki ni Boong aika Kaitira, ti tangiria n tibwaua te euangkerio ma ake ti tangiriia. Ti kona n tibwaua ara kakoaua n te koaua rinanon taeka ao ara katooto. Ti kona n tataro ibukin te kairi mai ieta n ataia bwa antai ae ti na tibwatibwa ma ngaiia ao tera ae ti na taekinna.

Tangiriia Tabeman

Kakawakin mwakoron tibwauaan te euangkerio bon tangiraia aomata. Ngkana ti kaota ara tangira nakoia tabeman rinanon ana mwakuri Kristo, ti tibwaua ana euangkerio Iesu Kristo–n tabetai n akean te marooro. Ao ngkana a ataia aomata bwa ti tabe raoi ibukiia, a kona ni kauki raoi nanoia ni kakauongo nakon ara iango ibukin te euangkerio. (Taraa Gary E. Stevenson, “Tangira, Tibwatibwa, Kakao,” Riaona, Meei 2022, 84–87.)

Tibwatibwa n Arona ao Kawaina

Ti kona n tibwaua are ti tangiria ibukin te euangkerio. Ngkana ti karaoa aio bwa kanoan maiura, e na bon aki kangaanga ke ni kamwengabuaka. Te katooto, ti kona n marooro ma ara utu ao raraora ibukin ae ti na karaoia n te Tabati. Ke ti kona n tuangiia ibukin namakin te kukurei ngkana ti beku ibukiia riki tabeman. (Taraa Dieter F. Uchtdorf, “Mwakuri ni Mitinare: Tibwauaan Bwaai ake I Nanora,” Riaona,, Meei 2019, 15–18.)

Kaoiia Aomata bwa A na Raoniira

Ti kona ni kaoiia tabeman n reiakina riki taekan te euangkerio. Te katooto, ti kona ni kaoiia bwa ana roko nakon te bootaki n Taromauri ke waaki ni kakukurei, wareka ana Boki Moomon, mataku n witeo man te Ekaretia, ke kawariia ma mitinare. Taneiai aikai a kona ni buokira n namakina te Tamnei ao n tangiria n reiakinaki riki.

Titiraki ibukin Aia Taneiai

Imwiin rokoia nakon te taromauri rao ma kaain te utu ke n reirei ma mitinare, ti kona ni titirakiniia ibukin aia taneiai. A kona ni boou nakoia tabeua reirein te euangkerio, ngaia are ti kona ni kaekai titiraki mairouia. Ti kona ni kaota ara tangira ao boutoka ibukin aia kekeiaki n roko ni ukora Kristo.

Karikirakea Aia Koaua

Ti kabongana ao ni karinea aia koaua tabeman, ao ti kataia n ikotii aia koaua are a tia ni reke irouiia. Te katooto, te rao are e kunea te rau ni kiibu man te Baibara tao e kona naba ni kunea te rau n reirei ake ti tibwauai man ana Boki Moomon.

Buokaia Membwa aika Boou n te Ekaretia

Ngkana a kaina te Ekaretia aomata, ti kona ni buokiia ni kakorakorai aia koaua. Ti kona n riki bwa raraoia, kaekai aia titiraki, ao ni buotokaiia ngkana a karekea te wewete. Ti kona ni kaungaia bwa ana iriira Iesu Kristo ao n reiakina taekan Ana euangkerio.

Beku ni Mitinare ae Bwanin Taina

N raonaki ma tibwauaan te euangkerio ni maiura ni katoabong, a konaa kain te Ekaretia ni beku bwa mitinare ae bwanin aia tai. Ngkana a tauraoi, ateinimwaane a kona ni beku man 18 aia ririki. Kairake n ataeinnaine ao aika a ikawai, a kona naba ni beku. Ko kona ni kunei riki rongorongo n ChurchofJesusChrist.org/callings/missionary.

Man Koroboki aika Tabu

E tua Iesu Kristo nakoia Ana reirei bwa ana tibwaua te euangkerio ma aomata ni kabane (taraa Mareko 16:15).

Koraki ake a weteaki a riai ni karaoia raoi ma “nanoia, marurungiia, aia iango ao korakoraia” (taraa Reirei ao Berita aika Tabu 4).

Ti na bon kunea te kimwareirei ae bati ngkana ti uotia aomata nakon te euangkerio (taraa Reirei ao Berita aika Tabu 18:15–16).

Bwaai n ibuobuoki n te Aonrain

“N na kanga n tibwaua ana Boki Moomon ma raraou?” “N na kanga n reita raraou ma mitinare?” Aikai ao titiraki riki tabeua a bon kaekaaki n ChurchofJesusChrist.org/share.

Te Gospel Library (n ChurchofJesusChrist.org ke kabonganan te app n te tareboon) iai naba bwaai ni ibuobuoki, ni ikotaki ma boton ara koaua. Rinea “Tibwauaan te Euangkerio!” n reiakinna riki bwa tera ao e kanga aron tibwaakina.

N reiakina riki taekan kakorakoraia membwa aika a boou, taraa te Gospel Library iaan “Aeniboki ao Wewete” ao imwiina “Uoote ke Wewete ni Mwaanga”

Kakaea Riki ae Mwaiti

Ngkana iai am titiraki ibukin tibwauaan te euangkerio, ko kona n taetae nakoia taari ao titita aika taan ibuobuoki, taan kairiiri n am uoote ke mwaanga, ke mitinare.