“Oin Kawaira nako Emmauti,” Riaona, Turai 2023.
Nakomai, Iriirai
Oin Kawaira nako Emmauti
Nimaua waaki ni kakukurei aika a bebete are a kona ni buokiira n ataia ae kaanira nakon te Tia Kamaiu.
On the Road to Emmaus [N te Kawai nako Emmauti], iroun Wendy Keller, courtesy of Havenlight
E mate n te kaentia tamau ngke 4 au ririki. I ikawairake ao n mimii bwa bukin tera e mate. I titiraki nakon te Atua ao ni butiia bukin tera e aki karaunano aron te maiu. Tebwiina te ririki imwiina, ngke 14 au ririki, I kaitibo ma mitinare. Ngke a reireiniira, e namakinna tinau bwa a reireia te koaua ao ti riai n ongora. Ngke tia kaaina te Ekaretia, ana euangkerio Iesu Kristo ao ataakin te babaire ni kamaiu e roko inanon maiu n te tai are I rangi ni kainnanoia iai.
Imwiina, ngke I a kabaeaki ma au karo n te tembora, e wirikiriki tinau nakoiu, “I namakinna bwa e kaoti tamam ikai.” Ngke I iangoi taekan kakabwaia n te kabaeaki, I ataia bwa te Uea e ataia ara utu ao bwa E bon memena irarikira n taainako, riki ngkana ti aki ataia.
Ko a tia n iangoia ngkana e ataiko te tia Kamaiu? E atai korakaim ao tabeaiangam? Tera ae E na taekinna nakoim ngkana ko kona n nakonako ao n marooro ma Ngaia?
E Nakonako ma Ngaiia
Tenibong imwin maten Iesu Kristo, uoman ana reirei a nakonako iaon te kawai nako Emauti, are e kaniia itiua te maire (12 km) mai Ierutarem. A onrake n oin aia iango ao raraomaia, ngke e a kaoti naba irarikia te irua.
Ao E titiraki te iruaa, “Taeka ra akana kam taekin iroumi, ngkai kam nakonako, ao kam nanokawaki?”
A taekina te bwai are e tibwa riki “aika aron Iesu are te I-Natareta.” A kakoaua bwa Iesu e a tia n roko n kamaiuia Iteraera, ma E a tia ni kabuakakaaki ao n tauraki n te aro ae aki riai. A taku naba bwa naake a kina raoi Kristo a taku bwa E a tia n uti man te mate.
“Ao ngaia e taku nakoia, “ngkami aika kam nanobaba, ao kam waeremwe n iri nanon bwaai ni kabane ake e atongi te burabeti.” E rinanon are e kabwarabwaraaki n koroboki ao e kanga Kristo ni kakoroa nanon te taetae ni burabeti. Aio are kaona nanoia reirei ma te kimwareirei.
Ngke a roko i Emmauti, a tuatua reirei nakon te irua bwa e na “tiku [irouia].” N te katairiki e kakabwaiaa te kariki te irua ao e tatabeutaia. Ao n te tai naba arei, ao reirei a kinaa bwa te irua bon tiaki te irua ma bon te tia Kamaiu Ngaia! (Taraa Ruka 24:13–32.)
E Tiku ma Ngaira
Ti kona n miimi bwa bukin tera reirei ake uoman a aki kinaa Iesu ngke a nakonako irarikiia. Ao riki ti kanga n taainako n aki ataia bwa E nakonako irarikira? N taainako ti kabanei ara iango iaon kangaanga, ao n taian kimwareirei, n maiura ni katoabong are ti aki noora te Tia Kamaiu bwa e mena i rarikira.
Ti kona n aki nooria bwa e E kanga n tiku ibuakora, korakai ma ngaira, mwakuri ma ngaira, ao n tang ma ngaira. Inanon naba ara tai n nanokawaki, ngkana ti ataia, ti kona n namakinna bwa e mena iroura ao n ongo Ana taeka: “Tei moa, ao kam na ataai bwa te Atua Ngai” (Taian Areru 46:10, e kairaki ma katuruturuana; taraa naba Reirei ao Berita aika Tabu 101:16).
Oin Kawaira
A bane n iai tokira are ti na karoko iai n te maiu aei. N taai tabetai n kawaira, ti kona n kaaitarai aoraki ke ti kona n korakai ma mamaarara. Tao iai ara kangaanga n te mwane ke te kangaanga ae reke man te tokanikai, kaubwai, ao te kamoamoa.
Ngkai ti borau n kawaira nako Emmauti, ti riai n aki mwananga n ti ngaira. Ti kona ni kaoa te Tia Kamaiu bwa e na tiku iroura. Aikai nimaua waaki ni kakukurei aika a na buokira ni kaanira ma Ngaia.
Kamataata n te korotamnei iroun Lovetta Reyes-Cairo
1. Tataro ni Katoa Bong
E na riai n roko moa te tataro ni maiura ni katoabong. E kona ni buokira ni karekea ana iraorao ao ana kairiiri Tamara are i Karawa. Ti kona ni bubuti ibukin te korakora n ririmwiin Natina ao ibukin ana kakorakora te Tamnei, riki n taai are ti kona ni kairaki n ara iango nakon te bure.
Iotebwa Timiti te Ataei, ngke e bubuti nakon te Atua n te tataro ibukin te kaeka, e kunea te kakaitara ae kataia ni katokia (taraa Iotebwa Timiti—Rongrongo 1:16). N aron Iotebwa, ti riai ni kakorakoraira n tataro ao n onimakina Tamara are i Karawa bwa e aki kona ni kua n ongora iroura. E na buokiira ni kaotaira n Ana tai ao Ana kaeka.
2. Wareki Koroboki aika a Tabu
E katea te katooto te Tia Kamaiu ibukira man kamatebwai booki aika tabu. E taekini aikai n taainako ngkana E reirei. Kakaraoan kamatebwaian koroboki aika a tabu e buokira ni kaitiaka ao ni kauki ara iango, te nano ae tatauraoi ni kawakina ana taeka te Atua, ao baai aika a tauraoi ni beku.
Ngkai ti kamatebwai koroboki aika a tabu, e na kaoni nanora te Tamnei ae Tabu ma te nano ni kani karaoa ae raoiroi. E na kakorakora ara taratara n noora are e aki kona n nooria te mata. E na buokiira bwa ti na ongo tangiia aika a kainnano. E na kakabwaiaia ake a ririmwiin ana katooto te tia Kamaiu n anga te rau nakoia ake a kainanoa te rau (taraa Motiaea 18:8–9). Imwiina ngkana ti kaitarai kanoan te bong, ti na bon aki maroa n nakonako. E na nakonako ma ngaia teutana imwiin teuana.
3. Iriiria Burabeti aika a Maiu
Ti riai ni iriira ana reirei ara burabeti ae tangiraki, Beretitenti Russell M. Nelson, ao burabeti ake tabeman, tia mamata, ao tia kaotioti. Ngkanne ti na kuna bwa kawaira nako Emmauti e na mano ao n itiaki. Ana kairiira ni kamanoira ao ni buokira n ataia bwa raora te tia Kamaiu.
4. Kaoia Bwa E na Tiku
Ngkai ti reiakina taekan Iesu Kristo ao n ongotaeka nakon Ana tua, ti kaoa te tia Kamaiu bwa e na mena iroura. Ti reiakinna ni kinaa Ana kairooro ni maiura.
Uoman reirei n te kawai nako Emmauti a nakonako ma te tia Kamaiu, a marooro ma Ngaia, ao n namakina nanoia bwa e kaonaki n te rau (taraa Ruka 24:32). Aia bubuti nakoina, “Ko na tiku i roura” (Ruka 24:29), e na riki bwa ana bubuti naba.
Ngke a kinaa te tia Kamaiu ana reirei, E karina ni bua mai mataia. A waekoa n oki ana reirei nako Ierutarem ao ni kakoaua nakoia Abotoro bwa e a uti man e mate te tia Kamaiu. Inanon aia tai ni kakoaua, ao te Uea e a manga “tei Iesu ibuakoia” (Ruka 24:36). Ti kona naba n namakinna ngkana E mena ibuakora.
5. Kabouii Berita aika a Tabu n Taainako
Otenanti ao berita ae tabu n ana euangkerio Iesu Kristo a kona ni bita arora. E taku Beretitenti Dallin H. Oaks, Te Moan Kauntira n te Moan Beretitentii, “Ara nebonebo ao ara mwakuri ibukin reirei aika akea tokina a kaniira nakon te Atua ao ni kakorakorai ao ni kanakoraoi ara konabwai n tangira.”1 Te katoto, te bwabetito e kariaia te Uea bwa e na kaitiakira. Ao ngkana ti kakaonimaki ao n ongeaba, berita ae tabu n te tembora ao otenanti a katauraoira ni maeka n te tai teuana i matan te Tama ao Natina.
E buokira te toa ni kauringiira ao n karekea kabouan ara berita ae tabu, n raira n nano, ao n kekeiaki riki. Ngkana ti kana te toa, ti kaota nanora ae tauraoi n katoka aran Iesu Kristo iaora ao ni kakorakoraira n ururingnga ao ni kawakina Ana tua. E berita ngkanne nakoira bwa Tamneina e na memena i roura. (Taraa Reirei ao Berita aika Tabu 20:77 79.) Ti riai n taainako n ururingngi otenanti ao berita aika a tabu are ti a tia ni karaoi.
E Na Kaanira te Tia Kamaiu
N oin kawaira nako Emmauti, e kaoira ma te tangira te tia Kamaiu bwa ti na nakoina ao ni kimwareirei Irouna. Ngkai ti tataro ni katoa bong, kaonaki n koroboki aika a tabu, irirakiia burabeti aika a maiu, Kaoana bwa e na tiku ma ngaira, ao kabouan ao karinean ara berita aika a tabu, E na bon kaaniira. Ti na ataia ngkanne, ngkai ana reirei n te kawai nako Emmauti a ataia, bwa e a uti man te mate Iesu Kristo ao bwa E bon maeka ao n tangiriira.
I kakoaua bwa Iesu Kristo bon ara Tia Kamaiu ao ara Tia Kabooira. E rangi ni kan raoniira ao ni kairiira nakon kamanoara i aon kawaira.