“Au Mwakuri ni Mitinare ae Reitinako,” Riaona, Turai 2023.
Bwanaaia Aika Itiaki ni Boong aika Kaitira
Au Mwakuri ni Mitinare ae Reitinako
Ana kabanea n reta tamau e kaineti nakon maiu n taai aika a na roko, e anganai taeka are e rangi ni kakawaki ibukiu.
I rangi ni kukurei ngke te mitinare ngai n au mition n te tabo ae rangi n tamaroa maungana ae Cajamarca, Peru, ngke e a karina naba n reke te boo iroun tamau. Tabeua te tai imwiina, e mate.
Ngke I kaitibo ma au beretitenti n au mition, I tang ni korakai ngke I uringa ana reirei tamau nakoiu kakawakin te mwakuri ni mitinare ao rikim bwa te mwaane ae kookoaua. E a tia ni kokoroboki nakoiu ni katoa wiiki, n tibwaua ana kakoua, reireinai nonoori man te euangkerio ae kakorakorai, ao ni kaungaai bwa N na karaoa au kabanea ni konaa.
Imwiin ara marooro, e anganai te reta te beretitenti n te mition—te kabanea n reta mairoun tamau. Ana kabanea n reta tamau e kaineti nakon maiu n taai aika a na roko, e anganai taeka are e rangi ni kakawaki ibukiu:
“Iai riki tabem [mition] inanon tabeua namwakaina ma ngkai—te kabanea ni kangaanga ni mition, are kona karaoia ni katabua maium nakon reirei ake ko a tia n reireia, nakon karaoan bwaai ake, ni karokoa te tai aei, ae ngkai ko bon tii tataekini. E kona n riki bwa te kabanea ni uaana n mition. Kanga ai aron te iti n te burawa. …
Ti tangiriko ao n tataro ni katoabong ibukim. “Mwakuri korakora ao karaoi bwaai aika a eti.”
Ngke I tabe ni warekea ana taeka, I tang—ibukin te korakai, ngkai I a ataia ae aikai bon ana kabanea n taeka nakoiu n te maiu aei, ao ma te kimwareirei, n ataakin mwaakaia ma aia kaantaninga ibukiu. I ataia bwa au mition are imwiina—ni kabanea bongin maiu—e rangi ni kakawaki. E na riki bwa te tai raoi ni kataaki, ao e na kainnanoi bwaai ni kabane ake I a ti an reiakinna ao n rinanona n au tai ni mitinare.
I ataia bwa Tamara are i Karawa iai ana baire aika a nano ibukira ni kabane. E kona ni katamaroai riki ara tai iaon te aba ao n anganiira matara noraaba ao n atai Ana koaua. I a tia n noora aio n au tai ni kakorakorai ni maiu Ibukina, ao n rinanon Ana kakabwaia. Ao I a tia n nooria ikai ngkai kainabau ae tikiraoi ao I tia ni kaai ni mwakuriia ma ngaia ni katea ara utu ae kaonaki ma te kaantaninga, natira, ao te euangkerio.
E a tia n uota nakoira te korakora te tia Kamaiu n ara tai ni katorobubua, nakon koroboki aika a tabu, nakon te tembora, ao nakoia tabeman n te mwakuri ni ibuobuoki. I a tia n noora bain te Uea n roko inanon taai aika a kamimii n maiu ngke I a tia n tibwauaa te euangkerio ma utu ao raraou.
Ana mwakuri ao mimitongina e na “karekea te aki mamate ao te maiu ae akea tokina ibukin te aomata” (Mote 1:39). E bon reitinako ni koaua te mition anne.