Bwanaaia Aika Itiaki ni Boong aika Kaitira

Ti na Aki Maaku

Iroun Luis Robledo, Tamaulipas, Mexico

I ataia bwa ti na bon kukurei ngkai ti tibwaua te euangkerio ma aomata aika a mwaiti n aron are ti konaa n tibwaia ma ngaiia.

Kariaia n te tamnei iroun te tia korokaraki

A mwaiti ibuakoia raraou ao raou n rerei ake tiaki kaain Ana Ekaretia Iesu Kristo Ibukiia Aika Itiaki Ni Boong Aika Kaitira a tutuangai taekan te Ekaretia. Imwiin te tai ae uarereke, I a kua ni kaekaekai titiraki aika a okioki, ngaia are I a karaoa aron totokoan anne.

E babane nanou n karaoan witeo n te intanete ni kamatakuia aomata. I karaoi anene tamnei, witeo aika a kakaongora, ao tamnei ni kamanga. N te bong teuana ngke I a iangoia bwa tera ae N na manga karaoia ibukin au witeo are imwiina, E reke au iango bwa N na karaoa te witeo are e na kaekai titiraki ibukin te Ekaretia.

I anaa au bwai n rawetamnei. Imwiina, n aki koreia bwa tera ae N na taekinna ma I uringii kiibu aika kakaawaki ae I tangiria n taekinna, I a karaoa te witeo. Akea au iango bwa tera ae na riki. I ti karekea te wirikiriki bwa N na karaoa te witeo. “Ao I kairaki iroun te Tamnei, n aki atai moa baika I riai ni karaoi” (1 Nibwaai 4:6).

N akea au raraoma bwa ana kangaa aia kaeka raraou, raou n reirei, au utu—kaain te Ekaretia ke ake tiaki—I a katoka.

Tabeua te wiiki imwiin katokaan te witeo, I a karekei koroboki iaon au akaaunti n te bwain reitaki n te intanete. A koroboki naba aomata aika I aki naba kinaia ao ni karabwaai ibukin au witeo. Ibukin au witeo, temanna e moana karekean te kan marooro ma mitinare. Imwiina, te aomata anne e baireia bwa e na bwabetitoaki.

Man te tai are i karaoa te witeo, aomata ake I kinaia ake tiaki kaain te Ekaretia a taraa n tatangirai naba—ke e a bubura riki aia tangira nakoiu. Tabeman mai ibuakoia e a toki aia kabuakaka nakon te Ekaretia. Tabeman a katoka aia titiraki ae okioki ibukin te Ekaretia ibukina bwa a karekea te kaeka.

Ti naaki maaku ni karaoa are e tuangira te Uea bwa ti na karaoia. E taku, “Kam na nako n aba ni kabane, n tataekina te euangkerio nakoia kaain aonaaba ni kabane” (Mareko 16:15).

I berita bwa ti na bon aki nanokawaki ngkai ti ongotaeka Nakoina.