Bitaki Ake Ti Karaoi—ao ake Tiaki—Tangiria ni Kaaitarai,” Riaona, Turai 2023.
Kairake n Ikawai
Bitaki Ake Ti Karaoi—ao ake Tiaki—Tangiria ni Kaaitarai
Tera am kouru ibukin te tai ae maan? Ngkana ko ata am taakete, ko na tauraoi, ao ni kukurei riki, ni karaoi bitaki inanon maium.
Ko a tia ni karaoa te bitaki are akea nanom ni karaoia? Ke te bitaki ae ko aki kaantaningaia bwa ko na karaoia?
Tao 15 te ririki n nako e tuangai au taokita bwa N na riai ni bita aron maiu: “Kakamwakuri riki, ke ko n aaki maan ni maiu,” e tuangai. I ongo ana taeka ao taua raoi ma nanou. I a moana biriu.
Ni bita te aeka ni maiu aei bwa e na nakoraoi, I tangiria ni kawakina te nonori ae raroa n au iango ibukina bwa ngkana e uarereke au taratara, N na bon aki kona n reitinako n te maiu.
N taraan ae raroa riki bon kakaraoan au kouru bwa N na biri n te raroa ae teuana te marataon ni katoa ririki. E buokai te kouru aei n teirake ao ni biri ni katoa bong ibukina bwa I ataia n te tai teuana n te ririki ae e na roko, N na biri 26.2 maire (42.2 kiromiita) I tiku ni karaoa au kataneiei bwa N na roko n au kouru ake a uarereke ni katoa wiiki ibukina I ataia bwa a na katauraoai ibukin te bong ni kaboo.
N taai tabetai iai bwaai ake a kataia n totokoai, n aron tauan kanoan te bong. Tao e rangi ni kabuebue ke n rangi ni kamwaitoro tinaniku, ke tao e kakarau. Ngaia are I a riai ni biri n te mitin n biri, e ngae ngke I rangi n kan biri n te kawai. E kataia naba ni katokai ikoakiu. Tao I aki rangi ni karaoa raoi au moan katauraoi imwain biriu, ngaia are e a rotaki iaian rangau. Ke tao e aki reke ikoakiu i bon irou. Ma e ngae ngke e riki anne, E aki kona ni bwara nanou bukina I ataia bwa na bon biri n te biri ae abwabwaki n te ririki ae na roko. Ngaia are I babairea raoi au kataneiei. I marurung ao ni manga moana naba biriu.
Biribiriu e reireinai bwaai aika a mwaiti ibukin te euangkerio. A bane ni iai ara kouru ibukin te tai ae maan n te euangkerio ae ti na kakoroa nanoia ni karokoa te toki ao ni karekea te karietataaki. Ma ti karaoi kouru aika a uarereke n aron kanakin te toa n te taromauri ni katoa wiiki are e buokiira ni roko nako iai. Ti karekea te ikoaki n tamnei ngkana ti karaoi kaairua. Ma tiaki bwara n nano. Ti rairannano, ao ni manga roko naba ikekei. Te kawai ae tina ti kona ni karokoira n ara kouru ake a anaa te tai karekeaia bon man karaoan bitaki teutana ngkai ti waaki ao n teimatoa ni kawaira.
Rinerine nakon te Bitaki
N raka iaon tebwina te ririki, I a tia ni mwakuri bwa te bonomwi ni beretitenti ibukin Walmart i Brazil. E tau maiuia au utu, ao I kukurei n au mwakuri, ao te maiu e rangi n raoiroi. Ma e rangi bati aron te mwakuri. E kainanoai bwa na rangi ni mwamwananga, ike e rangi ni angabuaka nakon au utu ao te beku n au Ekaretia. Imwiin 11 ke 12 te ririki, e a rikirake mwaitina.
I marooroakinna ma kainabau ao n baireia bwa N na kitana te mwakuri aei. Tia manga maroroakinna ma natira, ao ti bonnanoia ni kangai, “Ai bon tain te bitaki ibukira .”
Ngke I a kitana au mwakuri, ao I a bon riki naba n te tai ae karina man te bonomwii n beretitenti nakon te aomata ae akea ana mwakuri. E kaan uoua te ririki kakaean ao manga butimwaean te mwakuri teuana. Ngke I a mwakuri ma te kambwana ae uarereke ibukin auti n te Unites States, I namakinna bwa I mwengaraoi iai. Te mwakuri aei e karekea riki au tai ni kabaneaiaon bwaai aika a rangi ni kakawaki riki.
Ma a tuangai aomata bwa I bon baba. Bukin tera ko kitana am mwakuri ae nakoraoi ibukin te kambwana ibukin auti ae bon akea ae tia n ongongo taekana mai imwaina? Ao ni mwaing rinanon te aonaaba nako United States?
A bon eti bwa aio bon te bitaki ae bubura ae ti rineia bwa ti na karaoia. Ma a kaairua ngke a taku bwa te rinerine ae aki tamaroa.
E bon tangira buburan te onimaki ibukira ni bitakin te mwakuri ao ni mwaing nakon te aba ae boou, ma e tararuaira te Uea. Ao e a tau riki au tai ni kakoroa nanon tibwangau bwa te buu te mwaane, te karo, ao kaain te uoote.
I kakoaua te bitaki bwa e tau ibukin kakoroan nanon ara konabwai. Ti na bon aki kona ni riki n aron are e tangiriira iai Tamara are i Karawa ngkana ti titiku ni maiura. Ao ti riki n ai Arona ngkai ti karaoi bitaki ma nanora raoi n te onimaki.
Kairooroaki bwa Kona Bitaki
Te bwai ae bubura are e riki n au utu ngke e mate tariu ae te kabanea n ataei riki n te kurati n te kaa. Ti aki rinea anne ke n tangiria bwa e na riki anne nakoina ke nakoira, ao e bon kammaraki naba ngkai, e ngae ngke ai 10 te ririki n nako. Rinean te bitaki e aki bebete.
Ma bitaki aika ti aki rinei a kona naba n riki bwa te tai ni kakorakora ara onimaki iroun Tamara are i Karawa ao Iesu Kristo. E bebete te tiku n kakaonimaki ngkana a nakoraoi ibukira bwaai. Ma ti kona ni kawakina te onimaki ao ni waaki nako ngkana aki tau bitaki ibukira?
Te buuraure, te aki kariki, akean te mwakuri, aoraki, ao kammaraki ake a riki ni maiura n aron aikai bon tiaki bwaai aika ti kaantaningaia ao ni baireia ibukira. A kona ni karekea nakoira te namakin bwa te maiu e riki i tinanikun are ti kona n karaoia. Ma e aki rangi ni koaua anne—ibuakin arom aika ko aki baireia, bon iai naba bwaai aika ko kona ni bairei aroia. Ko kona ni katei kouru aika a uarereke, tao te kouru ae ko na rinanona n te teuana riki te bong. Ko kona n karaoia iai! Ko kona ni karaoi bwaai ni kabane ma te karaurau! (taraa Aramwa 38:4).
Te katooto ae rangi n tamaroa n aei bon Iotebwa mai Aikubita. E onrake maiuna n bitaki aika a kairooroaki—E bua inaomatana uoua te tai! (Ngke e kaboonakoaki irouia tarina nakon te tauronaki, ao ngke e amanga kabureaki iroun Botibwa.) Ma e aki rootaki aron Iotebwa ibukina bwa arona akanne bon tiaki ana iango ao aki baireaki ibukina. E rinanona ao n rikirake rinanon waaki akana e rinanona akanne. Ao n tokina, e kamaiua ana utu ao te botannaomata ae bwanin. E baarongaaki ao ni katauraoaki arona ni kabane n ana kawai te Uea (taraa Karikani Baai 37–46).
E rangi ni kangaanga te taotaona n nano ngkana ana kairoro te bitaki e urui am babaire, ma uringa bwa te kouru n te tai ae maan bon karekean te karietataaki. E ataia Tamara are i Karawa bwa ti riai n roko ikekei: “Kam aki kona ni maiu i matan te Atua ngkai, ibuobuoki mangaia are, reitinako n te taotaonakin nano ni karokoa kam a kororaoi” (Reirei ao Berita aika Tabu 67:13).
Te Bitaki e Buokira ni Riki n Ai Aron te Tia Kamaiu
E rangi n tangiriko Tamam are i Karawa ao n tangiria bwa ko na tokanikai. E tangiria bwa kam na kukurei. Ao e katauraoa te babaire ibukina bwa ko na karekei bwaai akanne.
Ngkana I noora te maiu aei ao tera nanona n—kataneiaaki—bitaki inanon maiu a riki n iai raoi nanoia. A buokai bitaki ni kakoroa nanon au kouru ae bubura, are bon te riki n ai aron au Tia Kamaiu Iesu Kristo. I ataia bwa Tamara are i Karawa e tibwaa te kouru aei nakoiu ao nakoia Natina ni kabane. N ai aron au taokita are e ataia bwa I kainanoia ni bita te bwai teuana ibukin marurungiu, Te Atua e noora raoi bitaki ake ti kainanoi bwa ti na karaoi bwa ti aonga n riki n ai Arona. E buokira ao ni katauraoi bwaai ni ibuobuoki n aron booki aika a tabu, bobotaki n ara tabo, ao te burabeti ae maiu e na buokira ni karekei bitaki aika a tamaroa.
N boong aika a kangaanga—boong akanne ngkana e a kangaanga kitanan am kainiwene ao ni karinii am kau, ngke ko ataia bwa ko kainanoa te rairannano, ke ngkana ko korakai ma bitaki aika a aki kaantaningaaki—ti kauringiira ana tangira ae akea tiana te Atua ao Nanona ae korakora ibukira bwa ti aonga n kukurei riki nakon ae ti mena iai ngkai.
Te kauring anne e anganiira te korakora ni karaoi bitaki are e wirikiriki nakoia te Tamnei bwa ti na karaoi. Ao e buokira n onimakini bitaki aika a aki kaantaningaaki are ti kairoroaki ni karaoi bwa kanoan ana babaire ibukin kukureira ae korakora.