“Nooran Ana Kakai te Tia Kamaiu ni Maiura,” Riaona, Turai 2023.
Ana Kakai Iesu
Nooran ana Kakai te Tia Kamaiu ni Maiura
Aua reirei man ana mwakuri te tia Kamaiu ni kamaiua te mataki.
Rongorongona man He Anointed the Eyes, iroun Walter Rane
Iai taai i nanon maiura are iai iroura te kaantaninga ao n tataro ibukin kakai. E konaa ibukin temanna ae tangiraki ke bon ibukira. Ara kaantaninga bwa ti ha karekea te kaeka man ara bubuti, kakororaon uruaki, karauan naano aika a rootaki, ao ana kakai te Uea e anga katokaan kangaanga ake ti kainnanoi. Ngkana a riki ake ti aki kaantaningai ke n te tai are ti tataro ibukina, ti bae n titiraki bwa bukin tera.
E reirei Moronaai, “Ao N na kaungai nanomi, tariu aika kam tangiraki, bwa kam na uringnga bwa bon titebo ngaia ngkoananoa, ngkai, ao n aki toki, ao bwa bwaintituaraoi aikai aika I a tia n taekin, aika bwaai n te tamnei, a na bon aki kona ni mauna, n aron teimatoan te aonaba ni iai, ma e bon nakon aron aia kakewekewe natia aomata” (Moronaai 10:19).
Bwaintangira ao kakai akanne ake a koreaki n booki aika tabu a teimatoa n tauraoi ibukira ngkai? Ti na kanga n tau ni karekei kakabwaia akanne? E ataia bwa tera ae riki ni maiura te Tia Kamaiu ao ni kukurei ni kamaiura man ara kangaanga?
I tangiria ni kabongana ana kakai te tia Kamaiu ni kaoka te taratara nakon te mataki bwa te kaeka nakon titiraki aikai. (Ibukin te katooto, taraa Mataio 9:27–31; 12:22–23; Mareko 8:22–26; 10:46–52; Ioane 9:1–11.)
Tera ae Ti Kona n Reiakinna ibukin Ana Mition te Tia Kamaiu man Ana Kakai?
N ataakin mwiin te kakai nakoira ni maiura, ti na moanna man ataan nanona bwa tera te kakai. Kakai “a riki bwa kakoaua nakoia Iutaia bwa Iesu bon te Kristo. … A mwaiti mai iai aika kanikina naba, reirei … koaua mai karawa. … Kakai bon ao kaeka nakon onimaki ao ana kaunganano ae rangi n tamaroa. A aki kona ni mwakuri n akean te tataro, namakinan kainnanoana ao te onimaki.”1
Unimwane Ronald A. Rasband man te Kooram n Abotoro n te Tengaun ma Uoman, e taekinna ae moan te tamaroa aio:
“Taian kakai bon mwakuri aika tabu, kanikinaean ao kaotan mwaakan te Atua ae akea tiana, ao te kakoaua bwa Ngaia ‘bon titebo ngkoananoa, ngkai, ao n aki toki’ [Moronaai 10:19]. …
“… Kakai bon reitan ana babaire ae akea tokina te Atua; kakai bon te kawai n ibuobuoki mai karawa nako aon te aba.”2
Ngaia are, te kawai ae katokanikai ni kamatebwaia ana kakai te tia Kamaiu ao n reiakinii bon uringana bwa kakai ni kabane a kaota te bwai ae bubura nakon te bwai ae riki irouna ao n taraa raoi te koaua ibukin te Atua ao Ana mwakuri.
Ti na marooroakin tabeua koaua ae ti konaa n reiakinna man ana kakai te Tia Kamaiu n kaokan ana taratara te mataki. A kona n tibwaaki inanon aua reirei n aron aikai.
1. Kaokan te Taratara bon ana Kanikina te Meetia
Burabeti n taai ake ngkoa a kaota koauan rokon te Meetia n tataekin taian kakai ake E na karaoi, ni ikotaki ma kaokan te taratara nakon te mataki.
Nakon te Uea Beniamina, te anera ae tabu e taekinna bwa te tia Kamaiu e na “ao e na waaki nako ibuakoia aomata ni karaoi kakai aika moan te korakora, kautakiia mate, kanakonakoaia mwakuri, anganakiia aika a mataki te noraaba” (Motiaea 3:5; taraa naba Itaia 35:4–5).3
Ngaia are, kakai bon kaokan te taratara nakon te mataki e kamatoai taeka ni burabeti ibukin rokon te tia Kamaiu ao Ana mwakuri nakoia natin te Atua.
2. Iesu bon Otan te Aonaaba
E kamataata te koaua aio ngke e kaitibo Iesu ma te mwaane are e mataki man bungiana (taraa Ioane 9:1–11). Ngke a titiraki ana reirei ngkana te mwaane are e bungiaki ni mataki e riki man te bure, e taku Iesu bwa e aki, “ba a aonga ni kaotaki ana mwakuri te Atua i rouna” (kiibu 3). Imwiina, imwain kaokan ana taratara te mwaane arei, e taku te tia Kamaiu “Ngkai I mena i aon te aba, ao ootan te aba Ngai” (kibu 5).
E kabwarabwara Unimwaane Bruce R. McConkie (1915–1985) man te Kooram n Abotoro n te Tengaun ma Uoman: “Imwain kaurean matan te mataki, n te rabwata, E kauringia ana taan ongora Iesu n ana taeka are mai imwaina, ‘Otan te aba Ngai,’ n aron ae e reirei: ‘Ngkana kam uringnga bwa I kaurea te mata ae mataki, n te maiu aei, uringnga naba bwa I roko bwa n na uota te atatai ao te ota n tamnei nakoia aomata.’”4
Ti riai n uringnga aron karaoan te bure are e kaotaki n koroboki aika a tabu bwa te matakii n te maiu aei ao te kabwaraaki man te bure bwa katokan te matakii aei. Ngaia Iesu are “otan te aonaaba” e kabongana te bwai ae riki aei ni kabotaua te mwakuri ae rietaata bwa E roko n te aonaaba ni kakoroi bukin bwaai.
3. Te Onimaki e Uoti Kakai
Ngke e nakonako Iesu rinanon kawain Kaberanaaum, uoman mwaane aika mataki a Iria, ao a takarua, “Natin Tawita, Ko na nanoangaira.” Ao E taetae nakoia, ao e tuangiia, “Kam taku i nanomi bwa I kona te baenne ni karaoia?” Ao a taku nakoina, “Eng, te Uea.”
Te kakoaua n aia onimaki bwa te Uea e kona ni buokiia e bon oti man nanoia ni Iriiria ao n aia kona ao kaotan nanoia ae otara n aia kakoaua ngke a titirakinaki. E ringa mataia te tia Kamaiu, ao e taku, “E na karaoaki nakoimi n aron ami onimaki.” E waekoa n riki te bwai arei: “ao a kaureaki mataia” (Mataio 9:27–31).
E taraia Unimwaane McConkie: “N taai nako ni kaurean matan te mataki, Iesu n aron ae oti ikai, e kamwakura ana taeka are e taekinna ma karaoan mwakuri tabeua aika a kona n nooraki. N aron aei ao tabeua aika a riki e ringii mataia aika a aki nooraba.”
Bukin tera e karaoa anne te Tia Kamaiu? “Akea mwakuri man aika kangaanga rikiia aikai … aika a kakawaki nakon karaoan te mwaaka ni kamaiu,” e kabwarabwara McConkie. Ma ti ataia bwa te onimaki e karikii kakai, ao ngaia are “ana waaki te Matita bon kakorakoran te onimaki ibukia mataki ao ake a babanga taetae.”5
4. N Tabetai a Roko Kakai Teutana i mwiin Teutana
I Betetaita, a roko aomata n uota te mwaane ae mataki nakon Iesu. Imwiin kairan te mwaane mai tinanikun te kaawa, E “bawarei matana” Iesu, ao ni kaki baina iaona.” E kaokaki ana taratara te mwaane teutana n te tai aei, ao Iesu e a manga “kaki baina i aon matana,” ni karokoa raoi bwanin kaokan ana taratara. (Taraa Mareko 8:22–26.)
E kamataata Unimwaane McConkie koaua ake ti kona n reiakinna man te bwai ae riki aei:
“E kaotaki bwa nakoraoin aroaro n reitakin te rabwata ma Iesu iai mwiina n karikirakean te kaantaninga, kakoaua, ao te onimaki nakoia ake akea aia nooraba.
“… A riai aomata n ukora ana mwakuri ni kamaiu te Uea ma korakoraia ao aia onimaki, e ngkai ngke e ti tau ibukin iteran te kamaiuaki. … A na kona ngkanne ni karekea te kakoaua ao te onimaki ni kamaiuaki ao ni kamarurungaki raoi. A kona ni kamarurungaki naba aomata man kabwakaia n taamnei, teutana mwiin teuana ngkai a kanakoraoi maiuia ma babaire ao ibukin te karikibwai.”6
Man karaoan te kakai aio n uoua kawaina, e buoka te mataki te mwaane te Uea ni katauraoia ni karekea bwaninin te kakabwaia. Ti kona n nora te baeten naba aio n oin ara kakae ibukin kakai—te bwai ae ti riai ni karaoia, ke n aki karaoia, imwain tauraoira ibukin kakaewenako riki ake iaona?
Onimaki E Aki Kainnanoa Kamaiuana
E ngae ngke ti kona n noora kakawakin te onimaki ni kakoroi bukin kakai, e rangi ni kakawaki norana bwa n tabetai e ngae ngke Aika Itiakia rangi ni kakaonimaki a aki kona ni kakoroa nanon ake a iangoia ao ni karekei kaekaaia.
E reireinira Unimwaane David A. Bednar man te Kooram n Abotoro n te Tengaun ma Uoman:
“Te raoiroi ao te onimaki bon ngaiia bwaai aika kakaawaki ni kamwaingan maunga—ngkana kamwaingan maunga a kakoroa raoi nanon ana kaantaninga te Atua ao a bootau ma Ana kaantaninga. Te raoiroi ao te onimaki bon bwaai ni mwakuri ni kamaiuaia aoraki, bonotaninga, ao mwauku—ngkana mwakuri ni kamaiu akanne a kakoroa raoi nanon ana kaantaninga te Atua ao a bootau ma Ana kaantaninga. Ngaia are, ngkana a matoa ara onimaki, a mwaiti maunga aika a na bon aki kona ni mwaing. Ao tiaki aoraki ni kabane ma ake a matoatoa aika a na kamaiuaki. Ngkana kakaitara ni kabane a kauarerekeaki mwaitiia, ngkana aoraki a kamwaingaki, ngkanne ana moan ni kaantaninga te Tama n ana babaire e na bon aki koro bukina.
“A mwaiti reirei aika ti na reiakin n te maiu aei a kona ni karekeaki ti man bwaai aika ti rinanona ao n tabetai n rootaki iai. Ao te Atua e kaantaningaita ao n onimakiniira bwa ti na kaaitarai kangaanga n te maiu aei ma Ana buoka bwa ti aonga ni kona n reiakinaki bwaai aika ti kainnanoi n reiakinna ao n kona n riki bwa aika ti na riki iai n te maiu ae akea tokina.”7
I tangiria n reita au kakoaua ma aia kakoaua burabeti ngkoa ao ni boong aikai. A reitinako rikin kakai ibuakora. Te tia Kamaiu ae Iesu Kristo bon te korakora, te ota, ao te rau. I kakoaua bwa rinanon ara onimaki Irouna, ti kona ni kamaiuaki man aorakira, ao ngkana tao ti aki karekea te kamaiuaki, ti na kunea te rau rinanon te Uea n Raoi, Otan te Aonaaba, ao te tia Kamaiuia Taan Kamaiu.