“Weteara n Tibwauakin ana Euangkerio te tia Kamaiu,” Riaona, Turai 2023.
Weteara n Tibwauakin Ana Euangkerio te Tia Kamaiu
Ngkai ana toro te Atua, ti weteaki bwa ti na tibwaa ana kaantaninga te Tia Kamaiu are e anga rinanon Maiuna, reirei, Mwakuri ni Kamaiu, ao kaokan te euangkerio.
Ngke ti mitinare ni kairake i Engiran, ngai ma toau ti reireina te mwaane are e a tia n rinanon te kangaanga ae korakora, te waaki are e kuri n bua maiuna iai n tain te Kauoua ni Buaka n te Aonaba. E a tia ni rinanon te mangaongao n te buaka n te aba ao imwiina ni maiu man buakanan aia kaibuke ae karuanikai imwain okiran mweengana i Engiran. Ngke e a roko i Engiran, e rootaki n te kukurei ao te kakaitau ibukin manga okiran mweengana ma te mano n te aro are e katorobubua, kabooa ubuna ma te tano, ao n anga ana karabwarabwa.
Ngke ti reireinna Kaokakan Bwaai ao ni kabwarabwara ana Moan Mii ni burabeti Iotebwa Timiti, e tang. Ma ran ni mata i matana, e kabwarabwara te kakoaua are e taonna are e a tia ni karekea. E kabwarabwara bwa te rongorongo ni Kaokan Bwaai e anganna te namakin ae ti te arona ma are e namakinna ngke e moan okira tanon abana i Engiran ma te mano. E namakinna bwa iai te kaantaninga mai ikarawa i bukina.
“Te euangkerio ae kaokaki e karekea te ota raoi are a kainnanoia natin te Atua n tain kakarongoa ma marooro n aki karau” e taku Unimwaane Quentin L. Cook (moan rain mai ieta, kaniiman man te atai), are e beku n te British Mition ma Unimwaane Jeffrey R. Holland (moan rain mai ieta, kaitiman man te maing).
Atai: tamnei mairoun te tia korea te rongorongo
Weteakira bwa ana Toro te Atua
Ngkai kaain Ana Ekaretia Iesu Kristo ibukiia Aika Itiaki ni Boong aika Kaitira, ngaira bon ana toro te Atua. Ngkai Ana toro ngaira, ara mition bon te tibwatibwa ma tabeman—n ai aroia ake ti reireiniia i England—te kaantaninga are e anga te Tia Kamaiu rinanon Maiuna, reirei, Mwakuri ni Kamaiu, ao kaokan te euangkerio (taraa 3 Nibwaai 27:13–14). E aki bebete te tabe aio n te aonaaba ae kaonaki ma te nanououa, bwara n nano, ao te rotongtong, ma te euangkerio ae kaokaki e karekea te ota raoi are a kainnanoia natin te Atua n tain kakarongoa ma marooro n aki karau.
E a tia n taekinna Beretitenti Russell M. Nelson bwa te aonaaba e kainanoa ana euangkerio Iesu Kristo ngkai nakon are ngkoa: “Ana euangkerio bon ti te kaeka ngkai a mwaiti n te aonaaba aika a taonaki n te maaku. Aio e kamatoa riki ae ti riai ni ienikuri ni iriira ana kaetieti te Uea are E anga nakoia Ana reirei bwa a na ‘nako nakon aaba … ni kabane n te aonaba, n tataekina te euangkerio nakoia ni kabaneia kaain aonaba’ [Mareko 16:15, kaairaki kamatataana; taraa naba Mataio 28:19]. Bon tibwangara ae tabu bwa ti na tataekina korakoran ao ana rau Iesu Kristo nakoia aomata ake a kan ongora ao ni kan karimoaa te Atua inanon maiuia.” President Nelson e reitia, “Ngaira n tatabemaniira iai tabera n ikoikotakin Iteraera.”1
Teuana te kawai ae ti kakoroa iai tabera bon man butimwaean wewete nakon te beku bwa mitinare aika a bwanin aia tai. Ti ataia, ngkai e a tibwa kamataata Beretitenti Nelson, bwa karaoan te mwakuri ni mitinare ae bwanin e kaineti riki nakoia ataeinimwaane ake a tia ni katauraoaki ibukin te ikoikoti ni boong aika kaitira. Ibukiia, te mwakuri ni mitinare bon “taben te nakoanibonga.” E ngae ngke te mwakuri ni mitinare e aki kabaebae ibukiia ataeinaine, e a tia Beretitenti Nelson ni bubutia bwa ana butiia te Uea bwa E tangiria bwa ana beku naba. “Tera ae ko buokia nakon te mwakuri aei e rangi ni tamaroa!” e a tia n tuangiia. Ao, eng, te Uea e kainanoia taanga aika a ikawai bwa ana beku ni bon nakon korakoraia ma aroia ni kona. “Aia kekeiaki,” n ana taeka Beretitenti Nelson, “e rangi ni kangaanga karaoana.”2
Te kawai teuana ae ti kakoroa iai bukin tibwangara ni ikoikotakin Iteraera bon uringakin ara berita aika a tabu n Ti a tia ni berita bwa ti na “tei bwa taan kakoaua ibukin te Atua n taainako ao ni bwaai nako, ao n taabo nako”(Motiaea 18:9). Ti aki kainnanoa te wewete nakon te mwakuri ni mitinare ae bwanin ana tai n riki bwa te tia kakoaua. Ngkai ti maiuakina te euangkerio, tangiriia ao n beku ibukia tabeman, kakorakorai ngkami ni kaitara te kariiri ao bwainikirinaki, ao kaoti kakoaua n te taeka ao mwakuri, ti na kaania tabeman nakon Iesu Kristo.
Tibwauaakin te euangkerio e kona n kangaanga, nakoia naba naake a tia ni karaoa aia mwakuri ni mitinare. Ma ngkana a matoa ara kakoaua ibukin te tia Kamaiu ao kaokakan bwaai, bon akea riki nanora ma ti te kan kaota te kakoaua ni baike ti atai.
Kakaawakin te Kakoaua
Ti na kanga ni kakorakora ara kakoaua bwa ti aonga ni kona ni riki bwa mitinare aika ti kakaonimaki? Ti na ti iriira ana reirei ara burabeti ae maiu. Ana rikirake ara kakoaua ngkana ti:
-
Karikirakea maiura n taamnei.3
-
Bairea ara tai ae onoti ma te Uea.4
-
Kakorakora aan tamneira.5
-
Ti kariaia te Atua bwa boton ara iango inanon maiura.6
-
Ongo Irouna.7
Ngkai ti kamatebwaia ana taeka Beretitenti Nelson ao ni mwakurii ana reirei, ti na kakorakorai ara kakoaua iroun te Tia Kamaiu ao Ana euangkerio, mwiokoan te Burabeti Iotebwa Timiti n kaokan te euangkerio, koauan ana Boki Moomon, ao weteaia burabeti ao abotoro ni boong aikai. Kakoaua aika a matoa a na katauraoira—ao ni karikirakei nanora—ni karaoa nanon te wewete n burabeti mairoun Beretitenti Nelson ibukin ikoikotan Iteraera ni iteran te rabuna ake uoua.
N tibwaakin raoi te euangkerio, ti aki kaantaningaaki bwa te tia taetae ae bane arona. Ti aki kainnanoia bwa ti na atai ni kabane man ae uarereke ao mwakoron ni kabane reirein te euangkerio. Ti aki kainnanoia ni kamatenukunai kanoan koroboki aika a tabu. Ti aki naba kainnanoia bwa e na bubura ara reirei. Bwaai akanne a buokira ni tibwaa ara rongorongo, ma mwaakan te rairaki ni koaua e roko man te nanorinano, kakoaua ae nene, ao te kakoaua ae matoa mairoun te Tamnei ae Raoiroi.
“Akea te aomata,” e taekinna Iotebwa Timiti, “ae kona n kabwarabwara te Euangkerio n akean te Tamnei ae Raoiroi.”8
“Te Ai Inanon Riiu”
N te 1830, imwiin ongoraeakinan aia reirei mitinare ibukin kaokan te euangkerio, e tangiria Brigham Young ni kan ataia bwa tera koauan aia reirei. N reiakina anne, e kamatebwaia ana Boki Moomon ni ikotaki ma aroia naake a kakoaua iai ao te burabeti Iotebwa Timiti.
Te bwai teuana iaon taekaia moan mitinare akanne e ringa nanon ao tamnein Brigham. “Aia kakoaua kanga ai aron te ai inanon riiu,” e taku.9
Temanna mai buakoia mitinare akanne, Eleazer Miller, e riki bwa kaain te Ekaretia ai tibwa aua te namwakaina.10 Ngaia bon, n te taeka irouiia mitinare n taai aikai, e bon “raa,” ao bon tiaki naba ngaia te tia marooro imataia aomata. Ma bwaai akanne aki riki bwa te kangaanga.
Eleazer Miller
Ririki imwiina, e taekinna Beretitenti Brigham Young: “Ngke I noora te aomata are akea ana atatai n taetae ni katekenano, ke ana tarena ibukin te taetae i matan te botanaomata, are e ti kona n taku, ‘I ataia bwa ni mwaakan te Tamnei ae Raoiroi, e koaua Ana Boki Moomon, [ao] Iotebwa Timiti bon temanna ana Burabeti te Uea[,]’ [t]e Tamnei ae Raoiroi mai iroun te aomata arei e [tia] ni kaitiaka otau, ao te ota, te mimitong, ao te aki mamate a [mena] i moau.”
E taku Beretitenti Young bwa e katobibiaki ao ni kaonaki man te ota ao te mimitong arei ao bwa e ataia i bon irouna bwa ana kakoaua Eleazer e bon koaua.
“Wanawanan ma korakoran te aonaaba, ma mimitongina ni kabane, ao korakoraia ma kaubwaia n aroia Uea ,” E taku Beretitenti Young, “a maunanako ao ni bua kakaawakiia ni kabotauaki ma, te koaua ae bebete ae mairoun ana toro te Atua.”11
Ai Korakorara Kukureira
E taekinna te Burabeti Iotebwa Timiti, “Imwiin bwaai ake a tia n taekinaki, te kabanea ni korakora ao ni kakawaki ni beku bon taetakinan te euangkerio.”12
Karinean ara berita aika a tabu ngkai ngaira kaain abanuean te Atua e ikotaki ma tibwaan ana euangkerio Iesu Kristo. Tibwaan te euangkerio bon teuana kaotan nanora ae rietata n tangiraia kaain rarikira n ai arora (taraa Mataio 22:37–39). Tibwauaan te euangkerio bon ana tua te Tia Kamaiu ae korakora.
Ngaira ake ti a tia ni buokia aomata nakon Kristo ti a tia ni katoonga kimwareirein te abanuea are e beritanaki nakoia ake a mwakuri ni kamaiuia natin te Atua (taraa Reirei ao Berita aika Tabu 18:15–16). I bon teimatoa n uringa au tai ngke I beku bwa te mitinare ni kairake i Engiran—toau ake I a tia ni beku ma mangaia, aomata ake I kaitibo ma ngaia, natin te Atua aika mwane ao aine aika a kakawaki ake ti buokia n uotia nakon Ana nanai. E aki tiku n arona maiu imwiina.
Man au taneiai anne, I taekina te berita man te Moan Beretitenti nakoia ake a “uota ana koaua nakon te aonaaba,”13 tao n te mweenga ke taabo tabeua: “E na anga te kaniwanga ao te kakabwaia te Uea nakoim ngkai ko nanorinano ao n tataromwaaka n beku i Bukina. E na korakora te kukurei imwaim ae ko tuai man nonoria mai imwaina ngkai ko mwakuri ibuakoia Natina.”14