“Ni Kabane Aomata a Kainnanoa te Euangkerio,” Riaona, Turai 2023.
Ni Kabane Aomata A Kainnanoa te Euangkerio
I tia ni baireia bwa N na karao au mwakuri ni Mitinare, ma imwiin banen au reirei ao I a manga taku bwa I aki riai ni Mitinare—ni karokoa e reke au mwakuri ma ataeinaine aika a bwabwainikirinaki. Imwiina I nooria bwa aomata ni kabane a kainnanoa te euangkerio.
Te mwane ae Bua, iroun Harold Copping © Providence Collection / licensed from GoodSalt.com
Ngke I mena n te Buraimwarii, I aki kona n uringnga bwa mwaitira ana tai au tia reirei n tuangiira bwa antai mai buakora ae a na karaoa aia mwakuri ni mitinare. N au iango n rorou arei I tataku bwa N na karaoia.
E kaota kakawakin ikoikotakin Iteraera tinau man buokaia mitinare n reireia ao n tibwauaa te euangkerio. N te tai teuana I raonna ni kakaea ana auti temanna te aine are e tuai man rooroko n te taromauri tabeua te tai. E kuri n bua kawaira ibukina bwa ti aki raoi ataia bwa e maeka raoi iaa neiei. N aki bwara nanora, e kakorakora tinau ni kakaea ana auti te aine arei. N ai aron te aine ni kaikonakan te mane ae bua (taraa Ruka 15:8–10), e kunea te aine arei ao e kukurei.
Ana kawai tinau n anga ana kabane n tamaroa ibukin ana mwakuri te Uea, tiaki n ti tibwauaakin te euangkerio ma wewete naba tabeua n te Ekaretia, e buokai n nooria bwa aomata nako a riai ni beku ibukin te Uea, riki ni kawaiaika a uarereke.
Imwiin ririki tabeua, e bane au tai man te reirei n taekan te aro, karekea au metera n te Botaki n Ataeinnaine, bane au tai man te reirei riki are iaona, ao ni moana au mwakuri. Teutana imwiin teuana, namakinan te kan karaoa te mwakuri ni mitinare e tabe ni kekerikaaki n aki moanibwaiaki. E ngae ngke I bon rangi ni kakaonimaki ao ni kakorakoraai n weteau n te Ekaretia, I taku i bon irou, “E bon RAOIROI bwa n na aki beku ni mitinare ibukina bwa bon tiaki katabeau. Te aine ngai, ao I kona n beku ibukin te Uea n kawai riki tabeua.”
Tera ae Bita Au Iango
Ngke 22 au ririki, E reke au mwakuri n te tabo are I beku iai ibukia ataeinnaine ake a rinanon te bwainikirinaki ao te katinanikuaki. I rootaki nanou n nanoangakiia. I noora aron uruakin nanoia man te bwainikirinaki ao n uruakni aia tangira bon ibukiia. Tabeman mai buakoia a kataia ni bakaburei maiuia. Tabeman mai buakoia aki manga kan onimakiniia tabeman. A mwaiti mai ibuakoia ae akea aia kaantaninga ibukin te maiu ao n aki namakina ana tangira te Tia Kamaiu.
I aki toki n titirakinai, “A konaa bwainikirinaki aikai ni kaman totokoaki? Tera ngke arona bwa aomata ake a karaoa te iowawa nakoia a kaman karekea te euangkerio? Tera ngke aia karo a riki bwa kaain te Ekaretia imwain bungiakia ataeinaine aikai?” I a tibwa ataia bwa ataeinaine aikai a kona n aki rinanon kangaanga aikai ngke arona bwa aia karo ao aomata ake a karaoa te iowaawa nakoia a karekea ao ni maiuakina te euangkerio.
Iangoan titiraki aikai ao mwakuriu n te tienta aei e buokai n nooria bwa a kainanoa te euangkerio aomata ni kabane. N ai aron ana taanga ni buaka Ereman n ana Boki Moomon a buaka ni kamanoi aia onimaki ao aia utu, te Uea e kainanoiia mitinare bwa ana tibwa Ana euangkerio ni kamanoa Abanueana.
Te bwai ae I rinanona ma ateinnaine n te tienta aio e anaa nanou n nakonako n te kawai are e tangiria te Uea bwa na nako iai. I baireia bwa I riai ni kaaina ana taanga te Uea n te mwakuri ni mitinare. E nora te nano, ao I weteaki bwa N na beku n te Cauayan Mition i Biribin.
Beku ni Mitinare
I nooria n au mition, bitakiia aomata n aia tai n reiakina te euangkerio. I reireiniia aomata ake a aki ataia bwa a na kanga n kabwarai buure, ake a moko ao a momoi n kamanging, ake a kamoamoa, ake aki ataia bwa a na kanga n tataro. Ibukin te euangkerio, a kitanii aroia ni kawai bwa a onga n tau nakon are e beritanna te Atua: te maiu ae akea tokina.
Ibukin ana Mwakuri ni Kamaiu te Tia Kamaiu, I reiakinna bwa ni kabane aomata a kona n manga moanna ke n okira te kawai ae e eti man irariki ngkana a rairi nanoia. E na buokia ana euangkerio Iesu Kristo ni bitiira ao n rikirake nakon te kororaoi ao n tau nakon ana kakabwaia Tamara are i Karawa ae korakora are e a tia ni katauraoia ibukira. Bitaki aikai a kona man nanokawaki nakon kukurei, man te mangaongao nakon te rau, man te un nakon te kakabwarabure, man mamara nakon te korakora, man te kairiribai nakon te tangira.
I rang ni kakabwaiaaki n riki bwa kaain Ana Ekaretia Iesu Kristo ibukia Aika Itiaki ni Boong aika Kaitira. E buokai ana euangkerio Iesu Kristo ni kaotaai n au konabwai ngkai natiia au karo ake i karawa, e ngae ngkana I mena n aroaro aika a buakaka. Tamara are i Karawa e angangai te rau rinanon te Tamnei ae Raoiroi. Booki aika tabu bon au kambwati ngkana e taonai te aki oota ao ni kainnanoan karaoan babaire.
Ti kekeiaki nakon te toki ma te kakaonimaki ngai ma au utu. I rangi ni kakaitau ni mareaki ma te mwaane ae iai irouna te nakoanibonga ae e matoa ana koaua n an euangkerio Iesu Kristo ae kaokaki. Au berita ae tabu ma te Uea tiaki ti ibukiu ma ibukiia naba au utu ao ibukin Abanueana.
Te tia korokaraki e maeka i Biribin.