Boutokaaia Membwa Ake a Rinanon te Raure
E na buokiira Tamara are i Karawa n ata aron katauraoan te tabo ni butimwaai ae mano n ara uoote ao mwaanga ibukiia ake a raure ke a rinanon te raure.
Uoman mwaane n te uoote a riki n akea buuia n te tai ae kuri titebo, imwiin tabeua te ririki ni mare ma buuia aine. Ngke e moan tiku n akea buun are temanna, e karoko te uoote nakoina ni katoatai, ni katauraoi amwarake, ao ni kunei kawai ni kakoaua bwa e na aki namakina te maroa. Ibukin te kauoman n mwaane, e aki karaoaki te mwakauri n ibuobuoki aei, ao e katukaki n namakina te kaokoroaki ao te aki kaboraoaki.
Tera te kaokoro imarenaia mwaane aika uoman aikai? Te moan e mate buuna ao te kauoman e raure. Ngke e tibwaa te bwai ae rinanona te mwaane ae raure aei ma ngai, e rangi ni bebete ana bubuti: ti kona ni buokia kaain te Ekaretia bwa a na ota riki n aron karaoan te mwakuri n ibuobuoki nakoia ake a raure ao ni kinaa bwa bon ti te arona aia tabo, ae kakaawaki n ara uoote ao n ara mwaanga?
A mwaiti uoote ake a karaoi mwakuri n ibuobuoki aika a rangi n tamaroa nakoia ake a rinanon te raure, ma ana bubuti te mwaane aei e kairiira ni kabane n titiraki ngkana iai riki te bwai ae ti kona ni kanakoraoia riki. Te namakin n butimwaeaki ao ni boutokaaki e irekereke ma te kakao ae reitinako mairouia taan kairiiri n te Ekaretia—n tangiria ni kabane ake n ana nanai te Atua ao ni buokiia n namakina te butimwaeaki ao te mano inanon ara titeiki i Tion.1
“N taai ake ti tabeka iai temanna ti karekea te tabo ae mano nakoia.”2 A riai ara uoote ao mwaanga n riki bwa taabo ni kamanomano aikanne ngkai ti ukoria ni kawakin tuua ake uoua aika korakora n aron tangira te Atua ao tangiriia raom n ai arora (taraa Mataio 22:37–39). Reirei aikai a kona ni buokiira n ataia bwa ti na kanga ni boutokaia riki ake n ara uoote ao mwaanga ake a tia n rinanon ke a rinanon te raure.
Uringnga Bwa Te Raure e Irekereke ma Namakin Aika a Mwaiti
Ibukina bwa ti atai aan reirei n te mare ae akea tokina ao mwaakan te berita ni kabaebae n ana babaire ni kamaiu te Atua, te raure e kona n urui nano. Ma tiaki ni kabane aomata a kona n ti tearona aia namakin ibukin raureia. Beretitenti Dallin H. Oaks, Moan Kauntira n te Moan Beretitentii, e reirei bwa te raure n te iein “bon te bwai ae kangaanga taekana ibukina bwa e kariki namakin aika a korakora mairouia aomata ake e a tia n rootaki iai n aro aika a kakaokoro. Tabeman a nooria ke naake a tangiriia bwa aika a rootaki n te raure. Tabeman a taraia bwa a tekeraoi iai. Tabeman a taraa te raure bwa kaotan te kabwaka. Tabeman a iangoia bwa te kawai ni kamaiuki man te kangaaga ae kakamaaku man te mare.”3
Nakon are ko a iangoia naba bwa e kanga temanna n rinanon te raure n noora te bwai ae a mena iai, kakauongo bwa ningai ao e kanga tauraoin te aomata anne. Iangoia n titiraki n ae bebete, “N na kanga n anga au boutoka n te tai aei?” ke “N te anga raa ae ti kona n anga ara boutoka rinanon ao imwiin te raure?”
Titiraki aika a na Iangoaki:
-
E na kanga temanna n rinanon aekaki n namakin n taai aika a kakaokoro ni katoa bong, wiiki, ke namwakaina? N na kanga n iangoraoi riki ao n boutoka inanon nako namakin akanne?
-
N na kanga ni kakatauraoai ni karekei kaotioti bwa n na tauraoi n ibuobuoki n taai aika a kakaokoro akanne?
-
Tera katautau aika I karaoia ae tao I riai n kanakoi ao ni ukora ae tamaroa riki ni karaoan nanon kaotioti aika a na ibuobuoki?
Kabanea am Iango iaon te Tatangira Nakon te Motikitaeka
N kangaaanga aika a irekereke ma te raure, ti aki, riai, n atai ni kabane rongorongo are a karekea raureia taanga—ao ti bon riai n aki. “Ngkana e riki te raure, e riai iroun temanna ma temanna te kabwarabure, boutokai, ao n ibuobuoki nakon te kabuakaka”;4 e koaua aio ibukiia taanga ni kauoman ao naake irarikiia. Ti riai n taratara raoi ni kabotoi ara tangira irouia tabeman, n aki bairei taekaia, n aki kangai bwa antai ma ibuakoia taanga ae e matoa riki ara reitaki ma ngaia.
Nakon kabotoan te motikitaeka, ti kona ni katurua riki ara iango iaon te tangira, ao te boonnano, n aron are e reireia Titita J. Anette Dennis, Moan Kauntira n te Beretitentii ni Kabuta n te Bootaki n Aine:
“Kanga tawera motikan taekaia tabeman man taraakiia ao aroia, ke akean aia kakamwaakuri, ngke ti oota raoi, ti a konaa ngkanne ni kaeka ma te nanoanga ao te kan ibuobuoki nakon ae ti a kamwaita riki rawawataia ma ara motiki taeka? …
Ti tuangaki bwa ti na tangiriia aomata, ma ti na aki motiki taekaia. Ti a katuka te amo ae rawawata anne; tiaki tabera bwa ti na motiki taekaia tabeman. N oneanimwiina, ti kona n anaa amon te Tia Kamaiu n tangira ao n nanoanga. …
“… A riai aomata ni kabane n namakina ae a bon kaaina ao a kainnanoaki n rabwan Kristo.”5
Titiraki aika a na Iangoaki:
-
Tera ae I kona ni karaoia bwa na kabanea riki au iango n tangiraia aomata n aron ae karaoia Iesu Kristo?
-
Iai riki kawai ae I motika taekan temanna, ni ikotaki ma kunean ao bukinan temanna n te kaairua, ae na kona ni kataorikaakai man karekean au boutoka ae kainnanoaki?
-
Tera ae I kona ni karaoia bwa n na namakina riki ana tangira te Atua ibukiia tabeman?
Kakaei Aanga ni Kairiia
Rinanon te raure, aomta n tatabemaniia a kabuaa te reitaki n tangira are e nako rinanon raoraoia ke aia utu taanga ngkoa ake a tia n raure. Ao tera ae riki ngkana te itangitangiri ake a tia n riki n tain te mare, ao raoraoia aki manga kona n kaoia buu mwaane ao aine ngkoa ake a raure ngkai nakon waaki ni kakukurei n te tai ae ti teuana?
E tibwauaia te titita temanna bwa ngaia ma buuna aki toki ni kakaea te takakaro ni katoa wiiki n te tairiki ma raraoia n ana uoote. Imwiin te raure, e rangi ni nanokaawaki ngke te kakao nakon te takakaro n te tairiki e a toki rokona ibukina bwa bon ti ibukiia taanga ake ana roko iai. Temanna riki te titita e tibwaia bwa a mwaiti membwa n te uoote ae a bon baireia naba bwa bukina bwa ai akea buuna, e na kona n aki reke ana tai n kaea te waaki ni kakukurei ma raoraoia n ai arona ngkoa mai imwaina; ngaia are, aki kaoia bwa e aonga n aki namakina te nanokaawaki ao n aki kona n roko. E ngae n anne, aio bon katukana n namakina riki te kaokoroaki ao te maroaa. E tibwauaia te titita aei bwa e na raoiroi riki ngke e reitinako kaoana (e ngae ngke e naaki reke rokona)—n ataia bwa tabeman a tangiria n roko ikekei.
A bane ni kakaokoro aaro nako, ma “ti bane ni kainnanoa namakinan te bai n iraorao ae abuee ao n ongo te nano n onimaki ae matoa.”6
Titiraki aika a na Iangoaki:
-
Tera katamaroa nakon waaki ni kakukurei ae I kona ni karaoia ni buokia membwa ake akea toaia bwa a na namakina te katiteuanaaki n aron kamwengaraoaia ni kaean te waaki n aroia taanga?
-
E na kangaa ara uoote ni katauraoa anga riki tabeua ibukin karinakiia n waaki ni kakukurei are e bootau ma kainnanoia membwa ake a tia n raure?
-
Tera waaki ni kakukurei ae kona ni buokiia raoraou ni karekea, riki ngkana matoan nanon neienne ke teuanne a na kaokaki nakon aroia imwiin kangaangan te reitaki?
“Te Moan Tataraia, Imwiina Mwakuriia”7
Waaki n rinanon te raure bon kanakoraoan te bitaki n te mwane, kanoan te babaire, namakin, katei ake a kakaraoaki ni katoa bong ao ni katoa ririki, aron bairean te maeka, ao a mwaiti riki. E koaua aio ibukiia ikawai ao nakoia naba natiia, ake a tabeakina riki ae mwaiti ni mweengaia.
Kauntira n uoote ao ni mwaanga a kona ni iangoia bwa e kanga aron bouotokaan temanna kaain te utu, ni ikotaki ma ataei. N aroia aomata n tatabemaniia, iai naba tabera aika a mwaiti n tarai kainnano ao imwiina n tataroakini mwakuriaia n ana kaotioti temanna ni buoka kakoroan bukiia.
E kakabwaiaaki temanna te aine ngke kaain rarikina e nooria bwa buun ngkoa neiei e kakaraoi kaitiaki i nanon aia tabo ni mwengaia, ni ikotaki ma karaoan te ran are e bon tii irouna, ao n anga nanona bwa e na karaoia ibukin te aine arei ke ni kaota aron karaoana nakoina. Te karo ae akea buuna e kakabwaiaaki ngke kaain rarikina a katauraoi iango ibukin tobwaan natina n ana tabo are e boou.
Aikai tabeua kawai aika ko kona ni buokiia iai utu:
-
Taan kairiiri n uoote, kairake, ao n te Moanrinan a katei katooto ibukiia kaaro ke tiina aika a tau n maiuia ataei.
-
Bwaai n tangira ni kakiritimati a kanakoaki bwa anganano, ao ai te mwane ni buoka te kabanemwane n te mition.
-
Amarake riki tabeua man aia maungatabu kairake ke waaki ni kakukurei a kanakoaki nakon mweenga nakon te utu.
-
Kaain te uoote a kaei aia takakaro ni kakukurei ataei.
-
Aia kauntira tia reirei a marooroakin aaro n tabeakiniia ataei man mweenga aika a raure kaaro iai, riki ma reirei ibukin utu ke ngkana ataei a roko n tii te uoote ni katoa wiiki are imwiina ngkana a bootaki ma aia karo.
-
Taanga aika a kara a tabeakina te utu ae akea iai te buu bwa a na tararuaia.
Ti kona naba ni iangoia bwa aomata n tatabemaniia ke utu a kainnanoa te tai ni bairea aroia n aia waaki ae boou. Kakaota am akoi nakoia bwa aonga ni karekea te kamaiuaki ao te rikirake n ana tai te Atua, tiaki ara tai.
Titiraki aika a na Iangoaki:
-
N na kanga n kakorakoraaki n te reitaki ae teimatoa bwa aonga naake a rinanon te raure n namakina te mwengaraoi ni karekea te buoka ngkana a kainnanoia, e ngae ngkana tiaki n te tai naba aei?
-
Tera “te moan” ae tao e na rangi ni matoatoa ibukin te utu, n te moan tai ngke aikoa bootaki ataei ma aia karo n tain te motirawa? N na kanga n anga riki te reitaki n iraorao inanon taai akanne?
-
Tera bwaai ni ibuobuoki ae a na kainnanoi utu ae I kona n ibuobuoki ma ngaia, ke n na kanga ni katauraoa te reitaki ma tabeman ma te konabwai n ibuobuoki?
Ngkai ti tataro mwaaka ni ukora otara ae tamaroa riki ao ni beku ibukiia ake a raure, ma aia utu, ti kona n namakina ao n tibwaa mwakoron ana tangira te Atua ibukiia natina ni kabane.