“Aolep Rej Aikuji Gospel eo,” Liaona, Juļae 2023.
Aolep Rej Aikuji Gospel eo
Ikar karōk n̄an jerbale juon mijen, bōtaab ālkin kaļōj ikar lōmņak ikar jab aikuj in jerbal—m̧ae iien ikar bōk juon jerbal jerbal ippān leddik ro kar kakkure er. Innām̧ ikar lo bwe aolep rej aikuji gospel eo.
Jāān Dekā eo ekar Jako, jān Harold Copping © Providence Collection / licensed from GoodSalt.com
Ke ikar pād ilo Būraimere, ijjab maron̄ keememej ewi lōn̄ in an rūkaki ro aō kar kajjitōk wōn eo ibwilijim enaaj kar etal in jerbal juon mijen aolep raan. Ilo ļōmņak eo edik ikar aolep iien ba inaaj.
Jinō ekar kwaļo̧k n̄an n̄a ewi aorōk aintok Israel kōn jipan̄ mijenede ro rej jerbal aolep raan katakin im kwalo̧k gospel eo. Juon iien ikar kobaļo̧k ippān n̄an kappukōt m̧weo im̧ōn juon sister ilo ward eo me ekar jab kobatok n̄an jar ium̧win jet iien. Kōm nan̄in jōbwābwe kōnke kōm kar jab lukkuun jeļā ia eo ekar jokwe ie. Ijello̧kin am kar kūtōtō, jinō ekar kijenmej kappukōt m̧weo im̧ōn sister eo. Āinwōt kōrā eo ilo būrabōļ eo an jāān dekā eo ekar jako (lale Luk 15:8–10), ekar lo sister eo im kar lan̄lōn̄.
Wāween an jinō kar leļo̧k ijo em̧m̧an tata ippān n̄an jerbal eo an Irooj, ejjab wōt ilo kwaļo̧k gospel eo ak barāinwōt ilo kūr ko jet an Kabun̄, kar jipan̄ eō kile bwe aolep rej aikuj jerbal n̄an Irooj, jekdo̧o̧n ilo wāween ko reddik.
Ke iiō ko raar eļļāļo̧k, ikar kadiwōjļo̧k jān jemenere, kar bōk matōļ eo an Doulul eo an Jiron̄ ro eo aō, kar kadiwōjļo̧k jān kaļōj, im kar jino jerbal. Jidik kōn jidik, en̄jake eo kōn erom juon mijenede ej jerbal aolep raan ekar jino dikļo̧k an juon men aorōk. Em̧ool men̄e ikar niknik wōt im kōļapļo̧k kūr ko aō ilo Kabun̄ in, ikar jiron̄ eō make, “Ej em̧m̧an wōt n̄an jab jerbale juon mijen edipio kōnke ejjab aō eddo. Ij juon sister, im imaron̄ jerbal n̄an Irooj ilo elōn̄ wāween ko.”
Ta eo Ekar Ukōt Aō Ļōmņak
Ke ikar 22 aō iiō, ekar wōr juon aō iien em̧m̧an n̄an jerbal ilo juon jikin ijo ikar jerbal n̄an leddik ro me rekar ioon kakkure im kōjerwawa. Ikar en̄jake būom̧ōj kake er. Ikar lo ekōjkan an kakkure rupe būruwier im kar kakkure iakwe eo aer n̄an er make. Jet iaer raar kajjieon̄ m̧an er make. Jet iaer raar jab kōņaan lōke jabdewōt. Elōn̄ iaer ekar ejjeļo̧k aer kōjatdikdik ilo mour im kar jab en̄jake iakwe eo an Rilo̧mo̧o̧r.
Emakijkij kōn aō kajjitōk ippa make, “Kakkure kein remaron̄ ke kar bōbrai? Ta eo eļan̄n̄e rikakkure ro aer rekar bōk gospel eo? Ta eo eļan̄n̄e ro jinier im jemeer raar erom̧ ro uwaan Kabun̄ in m̧okta jān an leddik rein kar ļotak? Ikar kile bwe leddik rein remaron̄ in kar jab ioon mālijjon̄ kein eļan̄n̄e ro jineer im jemeer im rikakkure ro raar bōk im mour kōn gospel eo.
Kejekļo̧kjeņ kōn kajjitōk kein im jerbal ilo jikin eo ekar jipan̄ eō lo bwe aolep armej rej aikuji gospel eo. Ejja wōt jarin tariņae eo an Helamōn ilo Bok in Mormon kar taiņae n̄an bōbrae tōmak eo im baam̧le ko aer, Irooj ej aikuj mijenede ro rej jerbal aolep raan n̄an kwaļo̧k gospel eo An im kōjparok aelōn̄ in kiin̄ eo An.
En̄jake kein ekar wōr ippa ippān kōn leddik ro ilo jikin eo raar im̧we eō n̄an etetal ilo iaļ eo ijo Irooj ekar kōņaan bwe in etal ie ļo̧k. Ikar kāālet ikar aikuj in kobaļo̧k ilo jarin tariņae in mijenede eo an Irooj. E ekar lo ikdeelel in, im kar kūr eō n̄an jerbal ilo Philippines Cauayan Mijen.
Jerbale juo Mijen
Ilo mijen eo aō, ikar lo an armej oktak ke raar ekkatak gospel eo. Ikar katakin armej ro me raar jab jeļā ekōjkan jeorļo̧k bōd, ro raar kōbaatat im karōk dānin kadōk, ro rekar utiej bōro, ro raar jab jeļā kilen jar. Kōnke kōn gospel eo, raar ilo̧k jān kōm̧m̧an ko aer etto n̄an erom erreo n̄an ta eo Irooj ekar kallim̧ur kake, mour indeeo.
Kōnke kōn Pinmuur eo an Rilo̧mo̧o̧r, ikar ekkatak bwe jabdewōt emaron̄ jino ioon ak bar ro̧o̧l n̄an iaļ eo eaidik im aidin̄ eļan̄n̄e rej ukweļo̧k. Gospel eo an Jisōs Kraist enaaj jipan̄ kōj oktak im eddōkļo̧k n̄an weppān im erom erreo n̄an kōjeraam̧m̧an ko reļļap me Jemedwōj Ilan̄ ekar kōpooji n̄an kōj. Oktak kein remaron̄ jān būrom̧ōj n̄an m̧ōņōņō, jān pok jaļjaļ n̄an aenōm̧m̧an, jān illu n̄an jeorļo̧k bōd jān m̧ōjņo̧ n̄an kajoor, jān matōrtōr n̄an iakwe.
Ij en̄jake lukkuun kar kōjeraam̧m̧an n̄an erom juon uwaan Kabun̄ eo an Jisōs Kraist im Armej ro Rekwojarjar ilo Raan Ko Āliktata. Gospel eo an Jisōs Kraist ej jipan̄ eō meļeļe kōn aorōk eo aō āinwōt juon leddik nejin jined im jemed ilan̄, jekdo̧o̧n ilo jekjek ko renana. Jemedwōj ilo Lan̄ ej aolep iien kaenōm̧m̧an eō kōn Jetōb Kwojarjar. Jeje ko rekwojarjar rej aō kam̧bōj n̄e ij tarpok im aikuj n̄an kōm̧m̧ani jokāālet ko.
Baam̧le eo aō im n̄a kōmij kajjieon̄ tiljek niknik n̄an jem̧ļo̧kin. Ij kam̧m̧oolol bwe imaron̄ m̧areik juon em̧m̧aan eo ej kabwijer priesthood eo im ewōr juon an naan in kam̧ool kōn gospel eo kar kōjeļaaktok an Jisōs Kraist. Bujen eo aō ippān Irooj ejjab baj n̄an n̄a make ak n̄an baam̧le eo aō im n̄an Aelōn̄ in Kiin̄ eo An.
Rijeje eo ej jokwe ilo Philippines.