“Lo Mennin Bwilōn̄ ko an Rilo̧mo̧o̧r ilo Mour ko Ad,” Liaona, Juļae 2023.
Mennin Bwilōn̄ ko an Jisōs
Lo Mennin Bwilōn̄ ko an Rilo̧mo̧o̧r ilo Mour ko Ad
Emen katak ko jān an Rilo̧mo̧o̧r kemour ripilo eo.
Tipdik in Meļeļe eo jān An kar Kapit Māj ko, jān Walter Rane
Ewōr iien ko ilo mour ko ad n̄e jej kōjatdikdik im jar kōn mennin bwilōn̄ ko. Emaron̄ in n̄an juon eo ejitōnbōro ak n̄an jeraam̧m̧an eo ad make. Kōjatdikdik eo ad ej n̄an an jabeneejej eo ad en uwaak, jekjek eo ejorrāān en em̧m̧ane, jetōb eo ellu en med būruōn, im Irooj in mennin bwilōn̄ ko ej letok mejļan eo jej kōņaan. N̄e tōprak eo ejjab ta eo jekar kōtmene ak kabwilōn̄lōn̄ ko jaar jar kaki rej waļok, ekkā ad ļōmņak ebaj et.
Moronai ej katakin, “Ikōņaan kōketak kom̧, ro jeiū im jatū rejitōnbōro, bwe kom̧in keememej bwe E ej juon wōt inne, rainin, im indeeo, im bwe aolep mennin letok ko iaar kōnono, ko rej jān Jetōb, rej jamin naaj jako, em̧ool toun wōt an laļ naaj jutak, ekkar wōt n̄an jab tōmak eo an ro nejin armej.” (Moronai 10:19).
Menin letok kein im mennin bwilōn̄ ko kar ļo̧o̧ki ilo jeje ko rekwojarjar rej waļo̧k wōt ke rainin? Ekōjkan ad maron̄ karbōb n̄an kōjeraam̧m̧an ko? Rilo̧mo̧o̧r ej ke jeļā ta eo ej waļo̧k ilo mour ko ad im kōņaan lo̧mo̧o̧ren kōj jān apan̄ ko ad?
Ikōņaan kōjerbal mennin bwilōn̄ eo an Rilo̧mo̧o̧r kōn kōloļo̧kjeņ eo n̄an ripilo eo āinwōt pedped eo n̄an uwaake kajjitōk kein. (N̄an waanjon̄ak, lale Matu 9:27–31; 12:22–23; Mark 8:22–26; 10:46–52; Jon 9:1–11.)
Ta eo Jemaron̄ Ekkatak kōn Mijen eo an Rilo̧mo̧o̧r jān Menin Bwilōn̄ ko An?
N̄an meļeļe juon kilaan menin bwilōn̄ iood im ilo mour ko ad, jān jino kōn kōmeļeļeik ta in mennin bwilōn̄. Mennin bwilōn̄ ko “raar jibadbad n̄an juon menin kam̧ool n̄an Riju ro bwe Jisōs ekar Kraist eo. … Elōn̄ iaer raar barāinwōt kakōļļe, katak … m̧ool ko rekwojarajr. … Mennin bwilōn̄ ko raar im rej juon uwaak n̄an tōmak im kōketak ko an rem̧man tata. Raar jab jarjar ilo an ejjeļo̧k jar, en̄jake kar aikuj, im tōmak”.1
Elder Ronald A. Rasband jān Doulul eo an Jon̄oulruo Rijilōk ro eļem waan im aiboojoj an kar ba:
“Mennin bwilōn̄ ko rej jerbal ko rekwojarjar, waļokļo̧k ko im kakkōļļe ko an kajoor eo ejjeļo̧k jem̧ļo̧k an Anij im juon kean̄ bwe E ej “juon wōt inne, rainin, im indeeo”[Moronai 10:19]. …
“… Mennin bwilōn̄ ko rej dam̧oļo̧k ko an karōk indeeo eo an Anij; mennin bwilōn̄ ko rej m̧ōttan ko remenin aikuj n̄an dāpij mour jān lan̄ n̄an laļ.”2
Kōn menin, juon wāween ejeraam̧man n̄an ekkatak kōn mennin bwilōn̄ ko an Rilo̧mo̧o̧r im ekkatak jān er ej n̄an keememej bwe kajjojo mennin bwilōn̄ ko rej kwaļo̧k juon men eļapļo̧k jān iien eo make im n̄an kappukōt m̧ool ko rejenolo̧k kōn Anij im jerbal eo An.
Jen ekōnono kōn jet iaan m̧ool ko jemaron̄ ekkatak jan menin bwilōn̄ ko an Rilo̧m̧o̧o̧r eo kōn kōjepļaaktok loļo̧kjeņ eo an ripilo eo. Remaron̄ in ajej n̄an emen katak ko āinwōt kein.
1. Kōjepļaakļo̧k Loļo̧kjeņ eo Ekar juon Kakōļļe kōn Messaia eo
Rikanaan ro etto me raar kam̧ool kōn itok eo an Messaia eo kar kōnono kake kōn menin bwilōn̄ ko Enaaj kar kōm̧m̧ani, ekoba leļo̧k loļo̧kjeņ eo n̄an ripilo eo.
N̄an Kiin̄ Benjamin, juon enjeļ ekwojarjar ekar ba bwe Rilo̧mo̧o̧r enaaj kar “ilo̧k ilubwiljin armej raņ, jerbali mennin kabwilōn̄lōn̄ ko rekajoor, āinwōt kōmour rinan̄inmej, kōjerkak ro remej, kōm̧m̧an bwe rikūrro ren etetal, ripilo n̄an bōk aer loļo̧kjeņ,” (Mosaia 3:5; bar lale Aiseia 35:4–5).3
Kōn menin, mennin bwilōn̄ ko kōn kōjepļaakļo̧k loļo̧kjeņ eo n̄an ripilo eo ej kapen naan in kanaan ko kōn itok eo an Rilo̧mo̧o̧r im jerbal in karejar eo An n̄an ajri ro nejin Anij.
2. Jisōs Ej Meram eo an Laļ in
M̧ool in ekar alikkar an ba ke Jisōs ekar itok im ioon juon em̧m̧aan eo me ekar pilo jān ke ekar ļotak (lale Jon 9:1–11). Ke rikaļoor ro raar kajjitōk eļan̄n̄e em̧m̧aan eo ekar ļotak tok in pilo kōnke kōn jerawiwi, Jisōs ekar ba jaab, “a bwe jerbal ko an Anij ren waļo̧k kōn e” (eoon 3). Innām, m̧okta jān kōjepļaakļo̧k loļo̧jeņ eo an em̧m̧aan eo, Rilo̧mo̧o̧r ekar kean̄ “Ke Ij pād i laļ, Ij meram in laļ” (eoon 5).
Elder Bruce R. McConkie (1915–1985) jān Doulul eo an Jon̄oulruo Rijilōk ro ekar kōmeļeļeik: “M̧okta jān kōpeļļo̧k māj ko mejān ripilo eo, ilo kanniōk, Jisōs ekar kakeememej riron̄jake ro an kōn kōjjeļā eo an im̧aanļo̧k, ‘Ij meram in laļ,’ āinwōt n̄e ekar katakin: ‘Jabdewōt iien kwoj keememej bwe Ikar kōpeļļo̧k mejān ripilo eo, ilo kanniōk, keememej barāinwōt bwe Ikar itok n̄an bōktok meram eo n̄an māj ko, ilo jetōb.’”4
Jej aikuj keememej ewi emakijkij an jerawiwi watōke ilo jeje ko rekwojarjar jabwe meļeļe kōn ta eo juon armej ej kōm̧m̧ane im lo̧mo̧o̧ren jān jerawiwi āinwōt kōm̧akūtļo̧k pilo in. E eo ej “meram in laļ” me kar kōjerbale ilo iien in n̄an kakōļļeik jerbal eo eutiejļo̧k me E ekar itok n̄an laļ in n̄an kōtōprake.
3. Tōmak ej Kwaļo̧k Mennin Bwilōn̄ ko
Ke Jisōs ekar eļļāļo̧k ilo iaļ ko an Capernaum, ruo em̧m̧aan pilo raar ļo̧o̧rļo̧k E, lam̧ōj, “Kwon Nejin Devid, kwon tūriam̧o kake kōm.” Innām Ekar kōnono n̄an er, kajjitōk “Koṃro tōmak bwe Ij maron̄ kōṃanṃan men in ke?” Im raar uwaak, “Aet, Irooj.”
Kein kam̧ool eo kōn tōmak eo aer bwe Irooj emaron̄ kar jipan̄ er ekar pād ilo kijejeto eo aer ilo ļoor E im ilo uwaak eo aer em̧ōkaj ej kwaļo̧k kōn tōmak eo bwe n̄e jej kajjitōk. Rilo̧mo̧o̧r ekar un̄ur māj ko mājeer, ba, “Āinwōt ami tōmak, en āindein n̄an kom̧.” Tōprak eo ekar m̧ōkaj: “im mejeir re loḷọkjeṇ” (Matu 9:27–31).
Elder McConkie ekar kwaļo̧k: “Emakijkij ilo an kōlo̧ļo̧kjeņ ripilo eo, Jisōs āinwōt ilo bwebwenato in, ekar kobaik kakien eo an ippān jet jerbal ko. Ilo bwebwenato in im iien ko jet ekar un̄ur māj ko raar jar loļo̧kjeņ.”
Etke Rilo̧mo̧o̧r ekar kōm̧m̧an menin? “Ejjeļo̧k iaan men kein raar jab jeļā kaki … jerbal ko raar aorōk n̄an kōjerbal kajoor in kemour eo,” Elder McConkie ekar kōmeļeļeik. Bōtaab jejeļā bwe tōmak ej kwaļo̧k mennin bwilōn̄ ko, im āindein “Jibadbad eo alikkar an M̧aajta eo ekar n̄an kōkajoorļo̧k tōmak eo an armej eo epilo ak ejaron̄ron̄.”5
4. Mennin Bwilōn̄ ko Jet Iien rej Itok Ļain im bar Ļain
Ilo Bethsaida, armej ro raar bōktok juon em̧m̧aan epilo n̄an Jisōs. Ālkin tōlļo̧k em̧m̧aan eo jān bukōn eo, Jesus “kapilouik mejān im likūt pein ioon.” Lo̧ļo̧kjeņ eo an em̧m̧aan eo ekar jab jimettan wōt an jepļaak ilo iien in, im kōn menin Rilo̧mo̧o̧r ej “bar likūt pein ṇa ioon mejān,” kōro̧o̧ltok aolepān kōjepļaaktok eo. (Lale Mark 8:22–26.)
Elder McConkie ekar kalikkar m̧ool ko jemaron̄ ekkatak jān iien in:
“Ekar waļo̧k bwe iien ko rewejepedik an an̄ur ilo kanniōk ippān Jisōs ekar wōr kilaer ilo kobaiktok kōjatdikdik, kam̧ool, im tōmak n̄an eo ekar jab loļo̧kjeņ.
“… Em̧m̧aan raar aikuj pukōt kōmour in jouj eo an Irooj kōn aolepān aer kajoor im tōmak, men̄e menin ebwe n̄an jidik in kemour wōt. … Innām remaron̄ in kar koabiktok kam̧ool eo im tōmak eo n̄an kar kōm̧m̧an bwe en mour im dipio. Em̧m̧aan ro emakijkij aer kar mour jān nan̄inmej in jetōb ko aer kōn jon̄ak ko, bun̄tōn kōn bun̄tōn ilo aer kajetjet mour ko aer ippān karōk ko im jibadbad ko an Anij.”6
Jān kōm̧m̧ane mennin bwilōn̄ in ilo bun̄tōn ko rooktak jān doon, Irooj ekar jipan̄ em̧m̧aan eo epilo n̄an pojak n̄an bōk dipio in kōjeraam̧m̧an eo. Jemaron̄ ke lo jon̄an in barāinwōt ilo kappok mennin bwilōn̄ ko ad make—jet iien ej men eo jej aikuji n̄an kōm̧m̧ane, ak jaab, m̧okta jān ad pojak n̄an juon iien kitōltōl eutiejļo̧k?
Tōmak Ejjab n̄an Kōmour
Men̄e jemaron̄ lo aorōk eo an tōmak n̄an kōtōprak mennin bwiļōn̄ ko, ej aorōk n̄an kile bwe jet iien jekdo̧o̧n Armej ro Rekwojarjar retiljek tata rejjamin naaj bōk kōņaan ko aer im an uwaak akweļap ko aer.
Elder David A. Bednar jen Doulul eo an Jon̄oulruo Rijilōk ro ekar katakain kōj:
“Jim̧we im tōmak em̧ool rej lukkuun aorōk ilo kōm̧akūtļo̧k mālijjon̄ ko—Eļan̄n̄e kōm̧akūtļo̧k mālijjon̄ ko rej kōtōprak jibadbad ko an Anij im ej ekkar n̄an Ankilan. Jim̧we im tōmak rej ilo m̧ool lukkuun aorōk ilo kemour rinan̄inmej, rijaron̄ron̄, im riajukukuk—eļan̄n̄e kain kemour in ej kōtōprak jibadbad ko an Anij im ej ekkar n̄an Ankilaan. Kōn menin, jekdo̧o̧n eļan̄n̄e ewōr ad tōmak ekajoor, elōn̄ mālijjon̄ ko rejjamin em̧m̧akūt. Im ejjab aolep rinan̄inmej im rim̧ōjņo̧ renaaj mour. Eļan̄n̄e aolep jum̧ae ko raar dikļo̧k, eļan̄n̄e aolep nan̄inmej ko kar kōm̧akūtļo̧k, innām jibadbad ko reļļap tata an karōk eo an Jemed renaaj kar bōbrai.
“Elōn̄ iaan katak ko jenaaj ekkatak ilo mour in maron̄ būki wōt kōn men ko jej en̄jaki im jet iien en̄taan. Im Anij ej kōtmene im ej lōke kōj n̄an jelm̧ae apan̄ eo an mour in ekadu kitien kōn jipan̄ eo An bwe jen maron̄ ekkatak ta eo jej aikuj in ekkatak im āliktata ta eo jenaaj erom ilo mour indeeo.”7
Ikōņaan kobaiktok naan in kam̧ool eo aō n̄an naan in kam̧ool ko an rikanaan ro etto im raan kein. Mennin bwilōn̄ ko rekabde waļo̧k ibwilijiid. Rilo̧mo̧o̧r Jisōs Kraist ej unjen aolep kajoor, meram, im kemour. Ij kam̧ool bwe kōn tōmak eo ad ilo E, jemaron̄ mour, im n̄e jejjab mour, jej maron̄ wōt in lo aenōm̧m̧an kōn Irooj in Aenōm̧m̧an eo, Meram eo an Laļ in, im Rikemour eo an Rikemour ro.