“Im̧we ko ilo Tampeļ,” Liaona, Juļae 2023.

Im̧weo ko ilo Tampeļ

Jān Norman Hill

M̧weo im̧ōn Irooj ej juon jikin revelesōn. An ļapļo̧k an emakijkij ad etal n̄an tampeļ eo, enaaj ļapļo̧k ad bōk revelesōn.

Im̧weo im̧ōn Irooj ejjab baj juon em̧ ekwojarjar ijo jej kōm̧m̧an jerbal in lo̧mo̧o̧r bōtaab ej bar juon jikin revelesōn, ijo im̧weo ko reļlap im iddik remaron̄ waļo̧k, ijo kinej ko ilo jetōb ko ad remaron̄ kemour, im ijo Irooj emaron̄ ļujir būruōd ilo wāween ko jab kōtmene kake.

Juon Im̧we Ejenolo̧k

Ke ikar jerbal āinwōt juon rijerbal in kain̄i ilo Houston Taxes Tempeļ, juon kumi in riwōtbai ro raar jeertok n̄an jikin baak ko am im kar kajjitōk eļan̄n̄e remaron̄ deļo̧n̄e tampeļ eo. Tampeļ būreejtōn eo, Richard Sutton, ekar kōmeļeļeik kumi eo jibadbad eo an tampeļ eo im aikuj eo n̄an juon peba in mālim deļo̧n̄ tampeļ n̄an deļo̧n̄e m̧weo. Ritōl eo an riwōtbai eo im eo m̧ōttan raar lukkuun leļo̧k aer im ron̄jake.

“Ikar en̄jake juon men ke kōm kar eļļāļo̧k jān m̧win im̧ōmi,” ekar ba. “Ijjab maron̄ kōmeļeļeiki, bōtaab ekar juon en̄jake ejenolo̧k jon̄an ikar kōņaan kappukōt ta eo emaron̄ in kar kōm̧m̧an bwe en waļo̧k.”

Ripālele in ekar kōņaan jeļā eļapļo̧k, kōn menin Būreejtōn Sutton ekar kōm̧m̧an karōk bwe mijenede ro ren loļo̧k e.

Eļapļo̧k jān juon im jimettan iiō, juon kaļļaļļaļ ilo kōjām in opiij eo an Būreejtōn Sutto ilo tampeļ eo. “Kwoban kile eō, bōtaab jidik iien emootļo̧k ikar itok n̄an ijin ippān jet m̧ōtta ilo wōtbai ko waam. Tōre eo, ikar maron̄ in kalimjōke wōt jān tulik.” Kwaļo̧k juon peba in mālim in deļo̧n̄ tampeļ, ekar wōnm̧aanļo̧k, “Rainin ij tōn kalimjōke jān itulowa.”

Kajin eo Kein Karuo

Ke Dean im Bonnie Hill kar kūr n̄an jerbal āinwōt mijenede rūtto ro ilo Cochabamba Bolivia Tampeļ, Bonnie ekar leļn̄o̧n̄. Liin ejjan̄in kar ekkatak kajin Spanish im ekar jab jeļā kōn kekemo̧o̧j eo an n̄an kōm̧mani kain̄i ko remenin aikuj ak reiookļo̧k ko jet ilo juon kajin jab jeļā. Juon kōjeraam̧m̧an an priesthood kar kallim̧uri bwe enaaj kar maron̄ kōnono jim̧or ilo naan im ilo jetōb ilo kajin Spanish.

“Ijjab maron̄ lukkuun kōnono eļap kajin Spanish itulikin tampeļ eo,” liin ej ba. “Bōtaab ilo im̧weo im̧ōn Irooj, ej āinwōt epidodo an itok n̄an n̄a.”

Em̧ool jekdo̧o̧n ālkin an liin im ļeo plāeen kar jepļaak n̄an kapijuknen im etal n̄an jājen ko ilo kajin Spanish ilo Ogden Utah Tampeļ, patron ro raar bwilōn̄ kōn an jejet an kōnono.

Kōm̧m̧ane Juon Men n̄an En̄jake Lan̄lōn̄

Būreejtōn Russell M. Nelson ekar ba: “Jemaron̄ im̧we aolepān raan eo kōn jerbal im menmenbwij an baam̧le im en̄jake ko ippān ro jet. Bōtaab jej aikuj in kōm̧m̧ane juon men n̄an kanooj en̄jake lan̄lōn̄ eo kōn kōj make.”¹

Lan̄lōn̄ eo im en̄jake eo barāinwōt im̧we ko im kam̧ool ko rej kōttar kōj ilo tampeļ eo. Ewōr juon kajin lan̄ kōnono kake im meļeļe ijōņ me ejjab pād ilo aolep jikin ilo laļ in. Jej bōk revelesōn eo Irooj ej kōņaan letok n̄an kōj ilo tampeļ eo n̄e jejjab etal wōt n̄an tampeļ eo ak jej barāinwōt etal n̄an ijōņ kōtmene n̄an bōk revelesōn. Erkein rej jet waanjon̄ak ko an en̄jake eo kar bōk:

Martin Goury jān Cote d’Ivoire ekar kappukōt tōl ilo tampeļ eo kōn juon men aorōk an mour im ekar bōk juon kapene ekabwilōn̄lōn̄ me ekar wōr ippān kadede ilo an uwaak jar ko an kake. Menin ej pedped in katak eo Irooj ekar katakin Oliver Cowdery: “Keememej ilo ļōmņak bon̄ōn eo kwaarkūr n̄an Eō ilo būruōm̧. … Iaar jab kwaļo̧k aenōm̧m̧an n̄an am ļōmņak kōn menin ke?” (Katak im Bujen Ko 6:22, 23).
Randy Bronson ekar jokwe epakeļo̧k Payson Utah Tampeļ im ekar joļo̧k iiō ko kōm̧man etale menmenbwij an baam̧le. “Bōtaab ewōr juon nejū ļaddik ejjab niknik, im ikar jab aolep iien jeļā ta eo in maron̄ kōm̧m̧ane n̄an e. Kōn menin ikar baj likūt etan ilo jāljel ko an jar, bōtaab ikar lukkuun jar ilo tampeļ eo, kajjieon̄ pukōt ta eo imaron̄ kōm̧m̧ane n̄an e. Ekar dik aō meļeļe kōn ta eo imaron̄ ba ak kōm̧m̧ane n̄an e.”
“Kwoj juon em̧m̧an,” Stephanie Fackrell Hill ekar ba n̄an juon ruwaimejet ilo Logan Utah Tampeļ. “Ekōjkan am̧ jeļā?” m̧am̧a in edik ekar pere ilo an kajjitōk. Sister Hill ekar ba, “Ikar lo pija in ajri ro nejūm ilo peiūm, im ke ikar loi, ikar en̄jake im̧we jān Jetōb eo n̄an jiron̄ eok.” M̧am̧a in edik ekar kajjieon̄ n̄an ņooj pein. Kar bōk kūtuwōn, kiiō liin ekar en̄jake aer ļōmņak kake im jab kowaane.

Tampeļ ej juon jikin ejjab wōt n̄an jipan̄ lo̧mo̧o̧ren ro jibūd im jim̧aad ak barāinwōt n̄an bōk kain revelesōn jab in me emaron̄ tōl kōj im ro jet ilo iaļ in bujen eo. Būreejtōn Nelson ekar ba, “Kōj kajjojo ej aikuj kōkajoor in jetōb eo ejjab bōjrak im ekkatak eo me emaron̄ wōt kōm̧m̧an ilo m̧weo im̧ōn Irooj.”² Im̧we kein im en̄jake ko kar būki ilo m̧weo Im̧ōn Ekwojarjar rej katakin kōj n̄an lo āinwōt an Jisōs loe, ron̄ āinwōt An ron̄jake, im mour āinwōt An kar mour.

Rijeje eo ej jokwe ilo Utah, USA.