“Jen Jab Leln̄o̧n̄” Liaona, Juļae 2023.
Ainikien ko an Armej ro Rekwojarjar ilo Raan Ko Āliktata
Jen Jab Leln̄o̧n̄
Ijeļā jenaaj m̧ōņōņō ilo ad kwaļo̧k gospel eo ippān lōn̄ in wōt armej ro jemaron̄.
Pija eo kōn jipan̄ an rijeje eo
Elōn̄ ro m̧ōtta im m̧ōtta rijikuuļ me rejjab uwaan Kabun̄ eo an Jisōs Kraist im Armej ro Rekwjarjar ilo Raan Ko Āliktata emakijkij aer kōn kajjitōk ippā kōn Kabun̄ in. Ālkin jidik iien, ikar m̧ōk in uwaake ejja kajjitōk ko wōt aolep iien, kōn menin ikar walōn̄atak kōn juon uwaak.
Ij iakwe kōm̧m̧ani pija in alooj ko ilo intōrnet n̄an kam̧ōņōņōik armej ro. Ij kōm̧m̧an music video ko, informational video ko, im parody ko. Juon raan ke ikar ļōmņak kōn ta eo inaaj kar kōm̧m̧ane n̄an pija in alooj eo tok aō juon, ikar kāālet n̄an kōm̧m̧ane juon pija in alooj me ekar uwaake kajitōk ko kōn Kabun̄ in.
Ikar jibwetok kemera eo aō. Innām, kōn jab je ta eo ikar tōn ba bōtaab keememej eoon ko raorōk ikar kōņaan kōnono kaki, ikar kōm̧m̧ane pija in alooj eo. Ejjeļo̧k aō ļōmņak ta eo enaaj kar waļo̧k. Ikar en̄jake im̧we n̄an kōm̧m̧ane pija in alooj eo. “Im Jetōb eaar tōl eō, jab jeļā m̧okta men ko in kar kōm̧m̧ani.” (1 Nipai 4:6).
Ilo ejjeļo̧k inepata ekōjkan an ro m̧ōtta, rijikuuļ ro m̧ōtta, im ro nuku—ro uwaan Kabun̄ in ak jaab—maron̄ kar uwaak, ikar upload i.
Jejjo wiik ālkin upload i pija in alooj eo, ikar jino bōk enaan ilo social media akkaun ko aō. Armej ro ikar jab jeļā kajjier raar jino kwaļo̧k aer naan im kam̧m̧oolol eō kōn pija in alooj eo. Kōnke kōn pija in alooj eo aō, juon armej ekar jino bōk katak ko an mijenede. Tokālik, armej in ekar kāālet n̄an kar peptaij.
Kōn aō kar kōm̧m̧ane pija in aloooj eo, armej ro ikar jeļā kajjier me rejjab uwaan Kabun̄ in ekar jab oktak jon̄an ao em̧m̧an ippāer—bōlen em̧ool ļapļo̧k. Elōn̄ iaer rekar bōjrak jān aer kōknanaik Kabun̄ in. Ro jet ekar bōjrak aer kajjitōk ejja kajjitōk eo wōt kōn Kabun̄ in kōnke kiiō euwaak kajjitōk ko aer.
Jen jab leln̄o̧n̄ n̄an kōm̧m̧ane ta eo Irooj ekar kakien e kōj. Eaar ba, “Kom̧win ilo̧k n̄an aolepen laļ, im kwaļo̧k gospel eo n̄an armej otemjeļo̧k” (Mark 16:15).
Ij kallim̧ur bwe jejjamin naaj inepata bwe jej pokake E.