“Oktak ko Jej Kōm̧m̧ani—im Jab—Kōņaan Jelm̧ai,” Liaona, Juļae 2023.
Rūm̧m̧an Ded ro
Oktak ko Jej Kōm̧m̧ani—im Jab—Kōņaan Jelm̧ai
Ta kōttōpar eo am̧ aitok kitien? Eļan̄n̄e kwojeļā ta eo kwoj jibadōke, kwonaaj pojak, im em̧ool itoklimo, n̄an kōm̧m̧ani oktak ko ilo mour eo am̧.
Kwonan̄in ke kar aikuj in kōm̧m̧ane juon oktak eo me kwojjab lukkuun wōr am̧ ellowetak n̄an kōm̧m̧ane? Ak juon oktak eo me kwar jab kōtmene bwe kwonaaj kar aikuj in kōm̧m̧ane?
Emaron̄ 15 iiō ko remootļo̧k taktō eo aō ekar jiron̄ eō bwe ij aikuj in kar kōm̧m̧ane juon oktak in wāween mour: “Jino kāājemourur, ak n̄e jaab eban aitok aō mour,” ekar jiron̄ eō. Ikar bōk kakkōl eo an ilo m̧ool. Ikar kāālet n̄an jino ettōr.
N̄an kōm̧m̧ane oktak in wāween mour in bwe en juon oktak ejetjet, ikar aikuj in dāpij wōt menin enaaj kōjeraam̧m̧an eō ilo ļōmņak kōnke eļan̄n̄e inaaj kōkadu aō lale, eban kanooj aitok aō mour.
Kōjeraam̧m̧an eo aitok kitien ej juon kōttōpar ej waļo̧k im bar waļo̧k n̄an ettōr ilo juon ettōr aitok kajjojo iiō. Kōttōpar in ej jipan̄ eō jerkak im ettōr aolep raan kōnke ijeļā bwe ilo juon raan iiō tok juon, inaaj aikuj in ettōr 26.2 mile (42.2 killometer). Ikar kilep eō n̄an kaminene im tōpar kōttōpar ko aō ekadu kitier kajjojo wiik kōnke ijeļā rej kōpooj eō n̄an raan in iaekwōj eo.
Jet iien ewōr men ko me rej kajjieon̄ im kabōjrak eō, āinwōt katu eo. Bōlen elukkuun bwil ak elukkuun m̧ōļo nabōj, ak bōlen ewōt. Kōn menin ij aikuj ettōr ilowa ioon treadmill eo, jekdo̧o̧n men̄e ekkōt wōt aō ba ettōr ilo iaļ eo. Jorrāān ko rej barāinwōt kajjieon̄ im kabōjrak eō. Bōlen ekar jab jetjet aō kankan m̧okta jān aō ettōr, kōn menin ikar in̄ūt hamstring eo aō. Ak bōlen ekar jab aō bōd bwe ikar jorrāān. Bōtaab jekdo̧o̧n ta ekōjkan an kar walo̧k, ijjab maron̄ ebbwer kōnke ijeļā bwe inaaj ettōr ilo juon ettōr aitok iiō in laļ. Kōn menin ij kōm̧m̧ani jekjek ko jet n̄an kaminene eo aō. Ij kāājemourur im bar ro̧o̧l in ettōr.
Ettōr ekar katakin eō eļap kōn gospel eo. Ewōr ad aolep juon kōttōpar aitok kitien an gospel eo n̄an niknik n̄an jem̧ļo̧kin im bōk mour ijo eutiej tata. Bōtaab jej kōm̧mani kōttōpar ko ekadu kiteir āinwōt bōk kwojkwoj eo ilo m̧ōn jar eo kajjojo wiik bwe ejipan̄ kōj tōpar ijōņ. Jej būk jorrāān ilo jetōb eo n̄e jej kōm̧m̧ani bōd ko. Bōtaab jej jab ebbwer. Jej ukweļo̧k, im jej bar ro̧o̧l n̄an ijo. Wāween eo de eo jemaron̄ bōk kōttōpar eo ad aitok kitien ej jān kōm̧m̧ani oktak jiddik ko ilo iaļ eo ļo̧k n̄an jipan̄ kōj pād wōt ioon iaļ eo.
Kāālet n̄an Oktak
Ium̧win n̄oul iiō ko, ikar jerbal āinwōt serior vice president n̄an Walmart ilo Brazil. Baam̧le eo aō ekar bwe aer jāān n̄an mour, ikar lem̧ōņōņō ilo jerbal eo aō, im mour ekar em̧m̧an. Bōtaab jerbal eo ekar pen. Ekar aikuji eō n̄an itok itak eļap, eo ekar jelet jerbal in jipan̄ eo aō an baam̧le im ippān Kabun̄ in. Ālkin 11 ak 12 iiō ko, ekar kanooj in tōr jān jon̄an.
Lio pāleō im n̄a kar kapilōk ippān doon im kar ļōmņak bwe in etal jān jerbal eo. Kōm kar kōnono kake ippān ajri ro nejim, im ippān doon kōm kar ba, “Etōreen n̄an kōj n̄an kōm̧m̧ane juon oktak.”
Ke ikar kam̧ōj eō, ikar etal jān senior vice president n̄an ejjeļo̧k an jerbal. Ekar bōk epaakeļo̧k juon iiō n̄an lo im bōk bar juon jerbal. Āliktata ke ikar bōk juon jerbal ippān juon kom̧bani in wia kake em̧ edik ilo United States, ekar em̧m̧an aō en̄jake kake. Jerbal in ej kōtļo̧k aō ajeļo̧k eļapļo̧k iien n̄an men ko me rej lukkuun aroōk.
Bōtaab armej ro jet raar jiron̄ eō bwe iudiākāk. Etke etal jān juon jerbal em̧m̧an n̄an juon kom̧bani in wia kake em̧ ejjeļo̧k juon enan̄in kar ron̄ kake? Im em̧m̧akūt jān jimettan in laļ in n̄an United States?
Raar jim̧we bwe menin ekar juon oktak kileplep kō kar kāālet n̄an kōm̧m̧ane. Bōtaab raar bōd bwe ekar juon kāālet enana.
Ekar bōk eļap tōmak n̄an kōm n̄an ukōt jerbal ko im em̧m̧akūt n̄an juon laļ kāāl, bōtaab Irooj ekar bōk eddoim. Im ekar ļap aō iien n̄an kakūrm̧ool eddo ko aō āinwōt ļeo pālele, baba, im ward membōr.
Ij tōmak oktak eo ej menin aikuj n̄an bōk kōjatdikdik eo am. Kōmij jamin naaj kar erom ta eo Jemedwōj Ilan̄ ekōņaan bwe kōmin erom eļan̄n̄e kōm kar jab kōm̧m̧an wōnm̧aanļo̧k ilo mour ko am. Im kōmij erom āinwōt E ilo am kōm̧m̧ani oktak ko kar tōn kōm̧m̧an ilo tōmak.
Kipel n̄an Oktak
Bar juon oktak kileplep me ekar waļo̧k ilo baam̧le eo aō ke ļeo jatū ekar mej ilo juon itak in waan ettōr. Kōm kar jab kāālet ak kōņaan bwe en aindein n̄an e ak kōm, im ekab metak de, jekdo̧o̧n ālkin 10 iiō ko. Kipel oktak ejjamin pidodo.
Bōtaab oktakko jejjab kāāleti remaron̄ barāinwōt erom iien ko rem̧m̧an n̄an kalōk ad tōmak ilo Jemedwōj Ilan̄ im Jisōs Kraist. Epidodo n̄an pād wōt ilo tiljek n̄en men ko waļo̧k ilo wāween eo ad. Bōtaab jemaron̄ ke dāpij tōmak eo im wōnm̧aanļo̧k wōt n̄e oktak ko rejjab waļo̧k ilo ad kōņaan?
Jepel, jab neji, ejjeļo̧k jerbal, nan̄inmej, im en̄jake ko jet rekōmetak āinwōt kein rejjab en̄jake ko jej kōjatdikdik kake im karōki. Remaron̄ kōm̧m̧an ad en̄jake āinwōt mour in kōm̧m̧an itulikin maron̄ eo ad. Bōtaab ejjab kanooj in m̧ool—ibwilijin jekjek ko kwojjab kajjitōk kaki, ej wōr wōt men ko kwojjab maron̄ kōjbwebweik. Kwomaron̄ kōm̧m̧ani kōttōpar ko reddik, jekdo̧o̧n n̄e juon kōttōpar n̄an debļo̧ke bar juon raan. Kwomaron̄ kōm̧m̧ane! Kwomaron̄ ineek aolep men ko kōn kijenmej (lale Alma 38:4).
Josep in Egypt eo ej juon waanjon̄ak ejetjet kōn menin. Mour eo an ekar obrak kōn oktak eo kipel—ekar luuji anemkwoj eo an ruo alen! (Eo kein kajuon ke ļōm̧aro jein raar wia kake n̄an kōm̧akoko, im bar juon ke Potipar ekar likūt e ilo kalbuuj). Bōtaab Josep ekar jab bōjrak kōnke kōn jekjek ko an raar jab kōņaan ak jab karōki. Ekar okoktak im eddōkļo̧k ilo en̄jake ko an. Im ilo jem̧ļo̧kin, ekar lo̧mo̧o̧ren baam̧le eo an im aolepān laļ eo. Irooj ekar ļōme e im kōpooj e ilo aolepān iien eo (lale Jenesis 37–46).
Epen n̄an kijenmej n̄e oktak kipel eo ej kakkure karōk eo am̧, bōtaab keememej bwe kōttōpar eo aitok kitien ej n̄an bōk mour eo eutiej tata. Jemedwōj Ilan̄ ejeļā ta eo jej aikuj n̄an tōpar ijōņ; “Kom̧ij jab maron̄ mour im̧aan mejān Anij kiiō, im jab ilo jerbal ko an enjeļ raņ; kōn menin, wōnm̧aanļo̧k wōt ilo kijenmej m̧ae ami weeppān” (Katak im Bujen ko 67:13).
Oktak ej Jipan̄ Kōj Erom Āinwōt Rilo̧mo̧o̧r
Jemedwōj Ilan̄ ej iakwe eok im kōņaan bwe kwon jeraam̧m̧an. E ekōņaan bwe kwon m̧ōņōņō. Im E ej kōm̧m̧ane juon karōk n̄an kwe n̄an bōk jim̧or men ko.
N̄e ij lo mour wabanban kōn ta eo enaaj kar meļeļe—kaminene—oktak ko ilo mour eo eļapļo̧k aer wōr meļeļeir. Oktak ej jipan̄ eō bōk kōttōpar eo aitok kitien aō, eo ej n̄an erom āinwōt aō Rilo̧mo̧o̧r Jisōs Kraist. Ijeļā Jemedwōj Ilan̄ ej kwaļo̧k ejja kōttōpar eo aitok kitien n̄an n̄a im n̄an aolep ajri ro Nejin. Ejja āinwōt an taktō eo aō kar jeļā ikar aikuj in ukōt juon men n̄an jibabad eo an ājmour eo aō, alikkar Anij ej lo oktak ko jej aikuji n̄an kōm̧m̧ani n̄an erom āinwōt E. E ej rejtake kōj im letok kein jipan̄ ko āinwōt jeje ko rekwojarjar, juon jarlepju ijo jokwe ie, im juon rikanaan emour n̄an jipan̄ kōj ilo jibadbad eo ad n̄an oktak n̄an em̧m̧anļo̧k.
Ilo raan ko reppen tata—raan ko n̄e epen n̄an jerkak jān jikin kiki im kōņak juuj in ettōr ko am̧, n̄e kwojeļā kwoj aikuj in ukweļo̧k, ak n̄e kwoj kakkōk ippān jet bar oktak ko jab kōtmeni kaki—jej kakeememej kōj kōn iakwe eo ejjeļo̧k jem̧ļo̧kin an Anij im kōn ikdeelel eo An n̄an kōj n̄an ilo m̧ool m̧ōņōņōļo̧k jān ad m̧ōņōņō kiiō.
Kakeememej jab in ej letok n̄an kōj kōkajoor eo n̄an kōm̧m̧ani oktak ko Jetōb eo ej im̧we kōj n̄an kōm̧m̧ani. Im ej jipan̄ kōj lōke bwe oktak ko jab kōtmeni jej kipel n̄an kōm̧m̧ane rej m̧ōttan karōk eo An n̄an m̧ōņōņō eo ad eļap tata.