“Kūr eo Ad n̄an Kwaļo̧k Gospel eo an Rilo̧mo̧o̧r,” Liaona, Juļae 2023.
Kūr eo Ad n̄an Kwaļo̧k Gospel eo an Rilo̧mo̧o̧r
Āinwōt ro rikarejeran Anij, jej kūr n̄an kwaļo̧k kōjatdikdik eo Rilo̧mo̧o̧r ej letok kōn mour eo An, katak ko, Pinmuur eo, im gospel eo kar kōjepļaaktok.
Āinwōt mijenede ro reddik ilo England, eo m̧ōtta im n̄a kar katakin juon em̧m̧aan eo me ekar ioon iien ko renana, kauwōtata an mour ilo Pata an Laļ in II. Ekar koba ilo juon jorrāān in tariņae ilo āne innām kar mour jān juon jodik enana n̄an wa eo ekar pād ioon m̧okta jān an jepļaak n̄an ijo jikin ilo England. Āliktata ke ekar itakļo̧k ilo England, ekar kanooj in lutōkleplep kōn en̄jake im kam̧m̧oolol kōn an kar jepļaak n̄an ijo jikin ilo ejjeļo̧k jorrāān jon̄an ekar bukwelōlō, um̧m̧aik bwidej, im leļo̧k kam̧m̧oolol.
Ke kōm kar katakin e kōn Jepļaaktok eo im kar kōmeļeļeik Visōn eo M̧oktata an Josep Smith, ekar kanooj jan̄. Kōn dān in kōmejaaļaļ ko ilo mejān, ekar kōmeļeļeik kam̧ool eo etōr jān jon̄an ekar bōke. Ekar kōmeļeļeik bwe ennaan eo an Jepļaaktok eo ekar leļo̧k n̄an e en̄jake ko reier wōt juon n̄an ta eo ekar en̄jake ke ekar jepļaak ilo ejjeļo̧k jorrāān n̄an bwidej in England. Ekar en̄jake bwe ekar wōr juon an mejān kajjik indeeo.
“Gospel eo kar kōjepļaaktok ej letok ejja meram wōt ajri ro nejin Anij rej aikuji iien ko rekauwaron̄ron̄,” Elder Quentin L. Cook ej ba (ļain eo ilōn̄, kōļalem jān tuanbwijmaron̄) eo ekar jerbal ilo British Mission ippān Elder Jeffrey R. Holland (ļain eo itulōn̄, kein kajiljilimjuon jān tuanmiin̄).
Anbwijmaron̄: pija eo kōn jipan̄ an rijeje eo
Kūr eo Ad āinwōt ro Rikarejeran Anij
Āinwōt ro uwaan Kabun̄ eo an Jisōs Kraist im Armej ro Rekwojarjar ilo Raan Ko Āliktata, jej ro rikarejeran Anij. Āinwōt ro Rikarejeran, mijen eo ad ej n̄an kwaļo̧k ippān ro jet—āinwōt ro ikar katakin ilo England—kōjatdikdik eo Rilo̧mo̧o̧r ej letok kōn mour, kataki ko, Pinmuur eo, im gospel eo An kar kōjepļaaktok (lale 3 Nipai 27:13–14). Ejjab juon jerbal epidodo ilo juon laļ eo eobrak kōn pere, ebbweer, im marok, bōtaab gospel eo kar kōjepļaaktok ej letok ejja meram in wōt ajri ro nejin Anij rej aikuji ilo iien ko rekauwaron̄ron̄.
Būreejtōn Russell M. Nelson ekar kean̄ bwe laļ in ej aikuji gospel eo an Jisōs Kraist kiiō eļapļo̧k jān m̧okta “Gospel eo An wōt ej uwaak eo n̄e elōn̄ ro iaad ilo laļ in rej ilbōk kōn mijak. Men in ej kwaļo̧k aorōk in kōmeļeļe ko an Irooj n̄an rikaļoor ro An n̄an ‘ilo̧k … ilo aolepān laļ, im kwaļo̧k gospel eo n̄an aolep armej otemjeļo̧k’ [Mark 16:15, kōmejaja kar kobaiktok; lale barāinwōt Matu 28:19]. Ewōr juon ad eddo ekwojarjar n̄an jaketo jaketak kajoor im aenōm̧m̧an eo an Jisōs Kraist ippān aolep ro renaaj ron̄jake im ro renaaj kōtļo̧k bwe Anij en anjo̧ ilo mour ko aer.” Būreejtōn Nelson ekar kakobaba, “Kōj kajjojo ewōr juon ad eddo n̄an kōm̧m̧ane ilo aiintok Israel.”1
Juon wāween jej kakūrm̧ool jerbal jab in ej kōn bōk kūr ko n̄an jerbal āinwōt mijenede ro rej jerbal aolep raan. Jej jeļā, āinwōt an Būreejtōn Nelson kar kōmejajaik jidik iien emootļo̧k, bwe eddo eo an jerbal in mijenede ej jerbal aolep raan ej pād eļap tata ioon likao ro me kar kōjparok er n̄an aintok eo ilo raan ko āliktata. N̄an er, jerbal in mijenede ej juon “eddo an priesthood.” Men̄e jerbal in mijenede ej an wōt pepe n̄an jiron̄ ro, Būreejtōn Nelson ekar kajjitōk ippāer n̄an kajjitōk ippān Irooj eļan̄n̄e Enaaj kōm̧m̧an bwe ren jerbal barāinwōt. “Ta eo kwoj jipan̄ n̄an jerbal in ej ļap!” ekar jiron̄ er. Im, aaet, Irooj ej aikuji ripālele rūtto ro n̄an jerbal ilo an jekjek ko aer kōtļo̧k. “Kijejeto ko aer,” ilo naan ko an Būreejtōn Nelson, “ilo m̧ool reban bōk jikier.”2
Bar juon wāween jej kakūrm̧ool jerbal eo ad ilo aintok Israel ej n̄an keememej bujen eo ad n̄an “rikam̧ool ro an Anij ilo aolep iien ko im ilo aolep men otemjeļo̧k” (Mosaia 18:9). Jejjab aikuji juon kūr an mijenede ej jerbal aolep raan n̄an jutak āinwōt juon rikam̧ool. Ilo ad mour kōn gospel eo, iakwe im jerbal n̄an ro jet, jutak kajoor n̄e jelm̧ae kapo im kakkure, im kwaļo̧k naan in kam̧ool ilo naan im jerbal, jenaaj kepaakļo̧k ro jet n̄an Jisōs Kraist.
Kwaļo̧k gospel eo emaron̄ pen, jekdo̧o̧n n̄an ro me em̧ōj kadede aer kar jerbali mijen ko. Ak n̄e ewōr juon ad naan in kam̧ool ekajoor kōn Rilo̧mo̧o̧r im Jepļaaktok eo, jejjab maron̄ dāpiji ak kwaļo̧k naan in kam̧ool kōn ta eo jejeļā.
Aorōk eo an Naan in Kam̧ool
Ekōjkan ad kōkajoor naan in kam̧ool eo ad bwe jen maron̄ erom̧ mijenede ro rōwejepedik? Jej aikuj in ļoor kapilōk eo an rikanaan eo ad emour. Naan in kam̧ool ko ad rej eddōkļo̧k ilo ad:
-
Kōļapļo̧k kajoor in jetōb eo ej im̧we jerbal eo am̧.3
-
Kōm̧m̧an iien n̄an Irooj.4
-
Kōkajoorļo̧k pedped ko in jetōb ko ad.5
-
Kōtļo̧k bwe Anij en anjo̧ ilo mour ko ad.6
-
Ron̄jake E.7
Ilo ad ekkatak naan ko an Būreejtōn Nelson im ron̄jake kapilōk eo an, jenaaj kōkajoorļo̧k naan in kam̧ool eo ad kōn Rilo̧mo̧o̧r im gospel eo An, jerbal eo Rikanaan Josep Smith ekar kōm̧m̧ane ilo Jepļaaktok eo, tarlep in Bok in Mormon, im kūr rikanaan ro im rijilōk ro raan kein. Juon naan in kam̧ool kar kōkajoorļo̧k enaaj kōpooj kōj—im kōļapļo̧k ikdeelel ko ad—n̄an ron̄jake kūr in kanaan eo an Būreejtōn Nelson n̄an aintok Israel ilo rejet ko ruo an rōn̄ōl eo.
N̄an kwaļo̧k gospel eo ilo wejepedik, jejjab aikuji juon rikōnono in lo̧bwilej etijem̧ļo̧k. Jejjab aikuj in jeļā aolep tipdik in katak an gospel eo. Jejjab aikuj in kakilōklōk būjin eoon ko. Em̧ool jejjab aikuj in ļap jeļāļo̧kjeņ eo ippād. Men kein rej jipan̄ kōj kwaļo̧k ennaan eo ad, ak kajoor in oktak eo em̧ool ej itok jān juon bōro ettā, juon naan in kam̧ool ekajoor, im juon kam̧ool epen jān Jetōb Kwojarjar.
“Ejjeļo̧k armej,” Rikanaan Josep Smith ekar ba, “emaron̄ kwaļo̧k Gospel eo ilo an ejjeļo̧k Jetōb Kwojarjar.”8
“Kijek ilo Āinbwinū”
Ilo 1830 eo, ālkin ron̄jake an mijenede ro katak ennaan eo an gospel eo kōjepļaaktok, Brigham Young ekar kōņaan n̄an jeļā kōn e make m̧ool eo kōn ta eo raar katakin. Ilo jekjek eo ellaajrak, ekar ekkatak Bok in Mormon barāinwōt m̧wil eo an ro me raar kam̧ool kake im an Rikanaan Josep Smith.
Juon men kōn mijenede ro jinoin tata ekar un̄ur būruon im an Brigham. “Naan in kam̧ool eo aer ekar āinwōt kijek ilo aolepān ānbwinū,” ekar ba.9
Juon iaan mijenede ro, Eleazer Miller, kar membōr in Kabun̄ in ium̧win emen wōt allōn̄ ko.10 E ekar, ilo kōnono an mijenede in raan kein, juon “rikāāl,” im ekar juon rikōnono ilo̧bwilej. Bōtaab men ko rejjab aorōk.
Eleazer Miller
Iiō ko tokālik, Būreejtōn Brigham Young ekar kean̄: “Ke ikar lo juon em̧m̧aan ejjab wejepedik, ak tōļan ko n̄an kōnono ilo̧bwilej, eo ekar maron̄ in ba, ‘Ijeļā jān kajoor eo an Jetōb Kwojarjar bwe Bok in Mormon eo ej m̧ool [im] bwe Joseph Smith ej juon rikanaan an Irooj[,]’Jetōb Kwojarjar eo ej jino jān armej eo [e]kar kōmeramļo̧k meļeļe eo aō, im meram eo, aiboojoj eo, im mour jab wabanban [raar] pād im̧aaō.”
Būreejtōn Young ekar ba bwe ekar doulul im obrak kōn meram jab in im aiboojoj im bwe ekar jeļā kōn e make bwe naan in kam̧ool eo an Eleazer ekar m̧ool.
“Laļ in kōn aolep māletlet im kajoor, kōn aolep aiboojoj, im m̧weie eo an kiin̄ ro im irooj ro,” Būreejtōn Young ekar ba, “jakoļo̧k im erom̧ jab aorōk ļo̧k wōt n̄an jidik keidi ippān naan in kam̧ool eo eļem waan, keidi ippān naan in kam̧ool eo eļem waan, ejjab alikkar an juon rikarejeran Anij.”11
Ewi Jon̄an Lan̄lōn̄ eo Ad
Rikanaan Josep Smith ekar kean̄, “Ālkin ba men otemjej, jerbal eo aorōk eļap tata im aorōk tata ej n̄an kwaļo̧k gospel eo.”12
Kautiej bujen ko ad āinwōt ro uwaan aelōn̄ in kiin̄ eo an Anij ej koba kwaļo̧k gosepl eo an Jisōs Kraist. Kwaļo̧k gospel eo ej juon iaan kakōļļe ko rōutiej tata an iakwe ro rūtudid im āinwōt kōj make (lale Matu 22:37–39). Kwaļo̧k gospel eo ej kean̄ eo eļap an Rilo̧mo̧o̧r.
Ro iaad me raar jipan̄ bōktok jetōb ko an Kraist kar nemak lan̄lōn̄ indeeo kar kallim̧ur kake n̄an ro rej jerbal n̄an lo̧mo̧o̧ren ajri ro nejin Anij (lael Katak im Bujen ko 18:15–16. Ij ļōmņak likļo̧k wōt kōn jerbal in mijenede eo aō aolep raan āinwōt juon mijenede edik ilo England—ro m̧ōtta ikar jerbal ippāer, armej ro kōm kar ioon er, ļaddik im leddik ro nejin Anij kōm kar jipan̄ bōktok er n̄an oror eo An. Mour eo aō ekar jab āinwōt ālkin.
Jān en̄jake eo aō make, Ij bar kwaļo̧k kallim̧ur eo an Būreejtōnji eo Kein Kajuon n̄an aolep ro me rej “bōktok n̄an laļ in an m̧ool,”13 men̄e ilo ijo jikūm̧ ak ijo ettoļo̧k: “Irooj enaaj nōbar im kanooj kōjeraam̧an eok ilo am̧ ettā im jar n̄an jerbal n̄an E. Eļapļo̧k m̧ōņōņō ej kōttar kom̧ jān ami kar en̄jake ilo ami jerbal ibwilijin ajri ro Nejin.”14