Jerbal in Karejar kōn Iakwe Erreo

Jemaron̄ kōm̧m̧ane juon oktak ekajoor jān kwaļo̧k iakwe ilo wāween ko jeminene kaki.

Juon Waanjon̄ak in Iakwe Erreo

Tabitha (kar bar jeļā kajjien āinwōt Dorkas) ekar juon rikaļoor an Jisōs Kraist me ekar jokwe ilo Joppa. Liin ekar juon kōrā eo kar jeļā kake āinwōt juon kōrā “e obrak kōn jerbal ko rem̧m̧an im m̧weien tūriam̧o ko” (Jerbal 9:36). Kar iakwe liin kōnke liin ekar kanooj ļap an kōm̧m̧an n̄an iakwe ro jet. Āinwōt Rilo̧mo̧o̧r, liin ekar kōmaat an maron̄ n̄an jerbal. Liin ekar lōn̄ an kapeel ko im tōļan ko me ekar kōjerbali n̄an kōm̧m̧ane juon oktak.

Juon iaan kapeel ko an ekar kōm̧m̧an kopā ko im karmen ko, eo jet iaer raar etal n̄an kōrā ro emej pāleer rej aikuj. N̄an ro me raar bōk menin leļo̧k ko an liin, liin kar jilkinļo̧k in Anij. Ke Piter ekar itok n̄an loe liin ālkin mej eo an, “kōra ro otemjej e jako pāleir rej jutak ippān im jan̄, im kwaļo̧k nuknuk ko im kopā ko Dorkas ear kōm̧m̧ani ke e kar pād ippāer” (Jerbal 9:39). Ekar kanooj m̧weiur jon̄an ekar kōjerkak liin jān mej, eo ekar kōm̧m̧an bwe en lōn̄ ro ren tōmak ilo Rilo̧mo̧o̧r (Jerbal 9:40–42).

Jerbal in Karejar kōn Iakwe Erreo

Iakwe Erreo ej iakwe eo ewōr ippān Jisōs n̄an kōj im iakwe eo E ej kōtmene bwe en wōr ippād n̄an doon. Ej iakwe eo rūturiid āinwōt kōj make (lale Matu 22:37–39), kōm̧m̧an n̄an er kōn ejja meanwōd, kōmmaan wa, im tūriam̧o in wōt me jenaaj kar kōņaan n̄an kōj make (lale Matu 7:12). Ej n̄an jerbal n̄an er, āinwōt Tabitha, kōjerbal menin leļo̧k ko im tōļan ko kar litok n̄an kōj.

Jemaron̄ kōm̧m̧ane juon oktak ekajoor kōn kwaļo̧k ad iakwe ilo wāween ko me rej make waļo̧k n̄an kōj—jekdo̧o̧n eļan̄n̄e men eo jej kōm̧m̧ane eļem waan. Eļan̄n̄e tōļan eo am̧ ej keke, menin emaron̄ in juon wāween n̄an jerbal in karejar, bōtaab bōlen eļap am̧ jeļā ļoonm̧oor jān juon mejin in keke. Ak bōlen kapeel eo am̧ ej jeļā ewi wāween kanooj ron̄jake im pād ijo āinwōt juon m̧ōttā em̧ool.

Ejake Iakwe Erreo

Ekōjkan ad maron̄ ejake m̧wil eo an iakwe erreo āinwōt eo an Kraist?

Iakwe Erreo ej juon menin letok me Jemedwōj Ilan̄ ej likūt ioon aolep ro me rej rikaļoor m̧ool an Jisōs Kraist. “kom̧in jar n̄an Jemād kōn aolep kajoor in bōro, bwe kom̧in maron̄ obrak kōn iakwe eo An” (Moronai 7:48).
Mormon ekar katakin ta in iakwe em̧ool: “Iakwe-em̧ool ej meanwōd im e jouj, im ej jab juunm̧aade, ej jab kappukot men ko an, ej jab illulu, ej jab ļōmņak nana, im jab lan̄lōn̄ ilo nana ak lan̄lōn̄ ilo m̧ool eo, ej kijenmej ilo men otemjej, ej tōmak ilo men otemjej, ej kōjatdikdik ilo men otemjej, ej niknik ilo men otemjej” (Moronai 7:45). Men kein rejjab baj wāween ko n̄an kwaļo̧k n̄aat eo kwoj obrak kōn iakwe; rej barāinwōt iookļo̧k m̧wil ko me renaaj jipan̄ n̄an kōļapļo̧k maron̄ eo n̄an iakwe ilo ad kōļapļo̧k er.
Tōnkwadik ej kwaļo̧k meļeļe en̄jake.¹ Ilo ad kappukot n̄an meļeļe kake ro jet, jej leļo̧k iakwe em̧ool juon iien em̧m̧anļo̧k n̄an an eddōkļo̧k. Kaminene kajjitōk kajjitōk ko ilo juon wāween ejipan̄ im iakwe, innām ron̄jake kōn kijenmej im meļeļe.
Kaminene iakwe em̧ool. Leļo̧k iien eo am̧ im kein jipan̄ ko jet, ekoba am̧ jeorļo̧k bōd, n̄an ro me rej aikuiji. Būreejtōn Thomas S. Monson (1927–2018) ekar katakin: “Jeorļo̧k bōd rej aikuj ippān doon ilo iakwe. … Jekpen ņae ro ej kōpeļļo̧k kinej ko. Jeorļo̧k bōd wōt ej kōmour.”²