Ainikien ko an Armej ro Rekwojarjar ilo Raan Ko Āliktata

Kwōj Ke Tōmak ilo Anij?

Jān Shirl Brown Jr., Nevada, USA

Ke eo m̧ōtta ekar kwaļo̧k n̄ūrbōktak ko an, em̧ōj an jiebtok meļeļe ilo n̄a kōn men ko.

Kōmeļeļe jān Katy Dockrill

Rūttoļo̧k, ijjan̄in kar lukkuun pere tarlep in gospel eo. Ke ikar pād ilo iiō in jodikdik ko aō, ijo wōt ke, ikar kajjitikin eļan̄n̄e em̧ool ewōr juon aō naan in kam̧ool ak baj bōk wōt ta eo jinō im jema im ro m̧ōtta raar tōmake. Ikar jar bwe in maron̄ jeļā bwe gospel eo ej m̧ool.

Kōjekdo̧o̧n apan̄ ko aō, juon jiron̄ ikar ioone ilo community college eo ekar jiron̄ eō ekar arromeļo̧k bwe ikar meļeļe jibadbad eo aō im iaļ eo ilo mour.

“Kwōj ke tōmak ilo Anij?” liin ekar kajjitōk.

Ikar jiron̄ e ikar im bwe kabun̄ eo aō ej katakin kōn kadkad eo ad ippān Anij im unin mour in. Ikar barāinwōt jiron̄ liin kōn Rikanaan Josep Smith im Jepļaaktok eo. Liin ekar kanooj ron̄jake.

Jabōt eo tok juon ilo m̧ōn jar eo, ikar bōk juon bok jidikdik kōn Josep Smith im karōk in lo̧mo̧o̧r n̄an eo m̧ōtta. Ālkin an liin kar riiti bok ko im kar jino riiti Bok in Mormon, ikar bōk liin n̄an jar.

Tokālik liin ekar jiron̄ eō bwe ekar kanooj epaake ļeo jein. Ekar juon rikāke ilo baļuun eo ekanooj in m̧ōkade me ekar ekāke ilo iien kaloojoj an air show ko ijo. Būrom̧ōj, jōm̧m̧ar eo m̧okta jān am kar ioon doon, ekar mej ke ekar ekkāke ilo juon show. Liin ekar kanooj būrom̧ōj jān jako eo an im ekar n̄ūrbōktak kōn ļeo jein kōnke ekar juon rijab tōmak. Liin ekar jar n̄an jeļā ta jekjek eo an im m̧wilin im̧aan Anij.

Ke liin ekar kwaļo̧k n̄ūrbōktak ko an, em̧ōkaj an jiōbtok meļeļe ilo n̄a kōn men ko. Ekar wōr juon m̧ool im meram ekabwilōn̄lōn̄. Ikar meļeļe bwe arro ioon doon ekar jab waļo̧k kōn jide. Ijello̧kin, Anij ekar ron̄ im uwaak n̄an jar eo em̧ool an jiron̄ in ekar rub būruōn.

Ikar ettā n̄an jeļā bwe Jemedwōj Ilan̄ ekar jeļā kōn n̄a im naaj kar watōk eō juon erreo n̄an juon kein jebral ilo Pein ilo uwaake jar eo an liin. Ikar meļeļe māletlet eo An eļap ilo kōjerbal en̄jake in n̄an barāinwōt uwaake jar eo aō n̄an jeļā bwe gospel eo ej m̧ool.

Ālkin m̧aanjabpopo, ikar kanne nien nuknuk ko aō n̄an iiō ko ruo rem̧m̧an tata ilo mour eo aō. Ilo tōre in, eo m̧ōtta ekar bōk katak ko an mijende ro ippān leddik eo jaitn. Erro jim̧or raar kobatok ilo Kabun̄ in im ālkin iien eo kar jerbali mijen ko. Ālkin mijen eo aō, eo m̧ōtta ekar kajjitōk ippa n̄an kōm̧m̧nae kain̄i ko an tampeļ n̄an ļeo jein.

Ijeļā bwe Anij ej ron̄jake im uwaake jar ko rem̧ool, men̄e jet iien ilo juon jekjek eo ak ilo juon tōre eo jejjab kōtmene.